سوت قۋاندىق بيشىمبايەۆتىڭ بالالارىنا تولەيتىن اليمەنتتى ازايتۋدان باس تارتتى

استانا. KAZINFORM - ەكس-شەنەۋنىك قۋاندىق بيشىمبايەۆ بالالارىنا تولەيتىن اليمەنتتىڭ كولەمىن ازايتۋ تۋرالى وتىنىشپەن سوتقا جۇگىنگەن. سوت بۇرىنعى ءمينيستردىڭ تالابىن قاناعاتتاندىرۋدان باس تارتتى.

استانا قالاسىنىڭ كامەلەتكە تولماعانداردىڭ ىستەرى جونىندەگى مامانداندىرىلعان اۋدانارالىق سوتى قۋاندىق بيشىمبايەۆتىڭ بۇرىنعى جارى نازىم قاحارماننىڭ بالالارىنا اليمەنت تولەۋ تۋرالى نوتاريالدىق كەلىسىمنىڭ شارتتارىن وزگەرتۋ جونىندەگى ازاماتتىق ءىستى قارادى.

سوت تاراتقان مالىمەتكە سۇيەنسەك، 2020 -جىلى بۇرىنعى ەرلى-زايىپتى اراسىندا نوتاريالدىق كەلىسىم جاسالىپ، وعان سايكەس اكەسى ءۇش كامەلەتكە تولماعان بالانى اسىراۋ ءۇشىن اي سايىن ءار ايدىڭ 20-سىنا دەيىن 1,6 ميلليون تەڭگە كولەمىندە اليمەنت تولەۋگە مىندەتتەلگەن.

تالاپكەر اتالعان كەلىسىمدى وزگەرتىپ، اليمەنت مولشەرىن ازايتۋدى سۇرادى. ول تالابىن جازا وتەپ جاتقانىن جانە جۇمىس ىستەمەيتىندىگىن ايتتى.

سونداي-اق تالاپكەر كەلىسىمنەن كەلەسى تارماقتاردى الىپ تاستاۋدى سۇراعان:

- بالالارىنىڭ كامەلەتكە تولعاننان كەيىن دە اقىلى وقۋ ورنىندا ءبىلىم الۋعا كەتەتىن قوسىمشا شىعىنداردى وتەۋ؛

- بالالاردىڭ مەديتسينالىق تەكسەرىلۋى مەن ەمدەلۋىنە بايلانىستى شىعىنداردى تولەۋ؛

- جىلىنا كەمىندە ءبىر رەت قازاقستاندا جانە شەتەلدە دەمالۋىنا كەتەتىن شىعىنداردى (تۇرۋ، تاماق، ساقتاندىرۋ، كولىك جانە باسقا دا ىلەسپە شىعىندار) وتەۋ.

ءىستى قاراعاننان كەيىن سوت اليمەنت تولەۋ تۋرالى نوتاريالدىق كەلىسىمگە وزگەرىستەر ەنگىزۋگە زاڭدى نەگىز جوق دەگەن قورىتىندىعا كەلدى.

- سوت تالاپكەردىڭ 2024 -جىلدىڭ تامىزىندا ءوز مۇلكىن ءۇشىنشى تۇلعالارعا سىيعا بەرۋ شارتىمەن بەرۋ ارقىلى ادەيى ءوزىنىڭ ماتەريالدىق جاعدايىن ناشارلاتقانىن انىقتادى. سونىمەن قاتار ونىڭ ۇزاق مەرزىمگە باس بوستاندىعىنان ايىرىلعانىن جانە كەلىسىمدى تولىق كولەمدە ورىنداۋ مۇمكىندىگى جوقتىعىن ەسكەرە وتىرىپ، تالاپكەردە وزىنە تيەسىلى مۇلىك ەسەبىنەن مىندەتىن ورىنداۋعا ناقتى مۇمكىندىگى بولعان. بۇل جاعداي سوت تاراپىنان تالاپكەردىڭ ادال ەمەس ارەكەتى رەتىندە باعالاندى. بالالاردىڭ قۇقىعى مەن زاڭدى مۇددەسىن ەسكەرە وتىرىپ، سوت تالاپ ارىزدى قاناعاتتاندىرۋدان باس تارتتى، - دەپ ءتۇسىندىردى سوتتا.

شەشىم زاڭدى كۇشىنە ەنگەن جوق.

ەسكە سالايىق، جىل باسىندا 24 جىلعا سوتتالعان ەكس-شەنەۋنىك قۋاندىق بيشىمبايەۆ قاماۋدا وتىرعان مەكەمە وزىنە ىنتالاندىرۋ شارالارىن قولدانباعانى ءۇشىن سوتقا شاعىمدانعان ەدى.

ايتا كەتسەك، بۇعان دەيىن قۋاندىق بيشىمبايەۆتىڭ بوستاندىقتا جۇرگەنى جايلى قاۋەسەت تاراعان ەدى.

بىلتىر كۇزدە ەكس-شەنەۋنىك قۋاندىق بيشىمبايەۆتىڭ تۇرمەدە جۇمىسقا تۇرماعانى ايتىلدى.

قۋاندىق بيشىمبايەۆ ازاماتتىق نەكەدە بولعان ايەلىن ولتىرگەنى ءۇشىن 24 جىلعا سوتتالدى.

اۆتور

داۋلەت ىزتىلەۋ