سوت جۇيەسىنىڭ ينستيتۋتسيونالدىق دەربەستىگى نىعايادى - پرەزيدەنت

استانا. KAZINFORM - سوت جۇيەسىندە كادرلاردى ىرىكتەۋ جۇيەسى جاڭارتىلدى. بۇل تۋرالى قازاقستان سۋديالارىنىڭ سەزىندە ق ر پرەزيدەنتى قاسىم-جومارت توقايەۆ ءمالىم ەتتى.

«ءبىز سوتتاردىڭ تاۋەلسىز بولۋىنا باسا ءمان بەرىپ وتىرمىز. وسىعان وراي ءبىرقاتار جۇمىس اتقارىلدى. ەلىمىزدە كونستيتۋتسيالىق سوت قۇرىلدى. سوت جۇيەسىنىڭ ينستيتۋتسيونالدىق دەربەستىگى نىعايادى. كۇشتىك قۇرىلىمدار سۋديالارعا قىسىم كورسەتپەۋى ءۇشىن ءتيىستى شارالار قابىلداندى. كادرلاردى ىرىكتەۋ جۇيەسى جاڭارتىلدى. ءبىرىنشى ساتىداعى سوت ءتوراعاسى قازىلار قاۋىمىنىڭ ۇسىنىسىمەن تاعايدالادى. جوعارعى سوتتىڭ سۋديالارى كونستيتۋتسيادا كورسەتىلگەن جاڭا ءتارتىپ بويىنشا سايلاناتىن بولدى، ياعني ولاردى سەنات بالامالى نەگىزدە تاڭدايدى»، - دەدى قاسىم-جومارت توقايەۆ.

سونىمەن قاتار پرەزيدەنت القابيلەر تاجىريبەسى كەڭىنەن قولدانىلا باستاعانىن ايتتى. قازىر ولاردى ىرىكتەۋ جۇمىسى سيفرلىق جۇيەگە تولىق كوشكەن.

«سونداي-اق اكىمشىلىك ادىلەت قىزمەتى پايدا بولدى. بۇل قۇرىلىم - جەكە ادامداردىڭ جانە كاسىپكەرلەردىڭ قۇقىعىن ءتيىمدى قورعاۋعا مۇمكىندىك بەرەدى. بۇگىندە سوت ىستەرىنىڭ جارتىسىنان استامى ازاماتتار مەن بيزنەستىڭ پايداسىنا شەشىلىپ جاتىر. بۇل - جاقسى ءۇردىس. تۇپتەپ كەلگەندە، مۇنىڭ ءبارى ەكونوميكانى وركەندەتۋگە جانە ەلىمىزدەگى ينۆەستيسيالىق احۋالدى جاقسارتۋعا جول اشادى. ينۆەستورلاردىڭ زاڭعا سايكەس ءارى الاڭسىز جۇمىس ىستەۋى ءۇشىن بارلىق جاعداي جاسالۋى قاجەت. ولار مەملەكەت قورعاۋىندا ەكەنىنە سەنىمدى بولۋى كەرەك»، - دەدى مەملەكەت باسشىسى.

بۇدان بۇرىن حابارلانعانداي، بۇگىن ەلوردادا ق ر پرەزيدەنتى قاسىم-جومارت توقايەۆتىڭ قاتىسۋىمەن قازاقستان رەسپۋبليكاسى سۋديالارىنىڭ IX سەزى باستالدى.