سپورتشىلارىمىزدى وليمپياداعا دايارلاۋعا شەتەلدىك ماماندار تارتىلدى
استانا. KAZINFORM - فرانسيانىڭ پاريج قالاسىندا وتەتىن XXXIII جازعى وليمپيادا ويىندارىنا ليتسەنزيا جەڭىپ العان قازاقستاندىق سپورتشىلارعا قانداي قولداۋ كورسەتىلىپ جاتقانى بەلگىلى بولدى.
بۇل تۋرالى Kazinform تىلشىسىنە وليمپياداعا دايىندىق شتابىنىڭ جەتەكشىسى ەلسيار قاناعاتوۆ ايتىپ بەردى.
«قازىرگى تاڭدا پاريج وليمپياداسىنا جولداما العان جەتەكشى سپورتشىلار وقۋ-جاتتىعۋ جيىندارىن ارنايى جوسپارمەن وتكىزىپ، تىڭعىلىقتى دايىندىق جۇرگىزىپ جاتىر. ونىڭ ىشىندە بوكس، كۇرەس، تاەكۆوندو، جەڭىل اتلەتيكا، سپورتتىق گيمناستيكا سياقتى سپورت تۇرلەرىندەگى كەيبىر سپورتشىلارىمىز جەكە باعدارلاما بويىنشا دايىندالىپ جاتىر. ديرەكسيا تاراپىنان ولاردىڭ بارلىعى وقۋ-جاتتىعۋ جيىندارىمەن تولىق قامتاماسىز ەتىلدى»، - دەدى شتاب باسشىسى.
سونىمەن قاتار سپورتشىلارىمىز وليمپيادا ويىندارىنا ءساتتى دايىندالۋ ءۇشىن ارنايى شەتەلدىك ماماندار تارتىلعانىن دا اتاپ ءوتتى.
«وليمپيادا ويىندارىنا ءساتتى دايىندالۋ بارىسىندا كوپتەگەن كوماندالاردا شەتەلدىك ماماندار جۇمىس ىستەپ جاتىر. بوكستا (ەرلەر) ليتۆادان جالپى دەنە دايارلىعى بويىنشا جاتتىقتىرۋشى دونوتاس يانۋشيەۆيچ، سپورتتىق گيمناستيكادا اۆستراليادان كەلگەن جاتتىقتىرۋشى-كەڭەسشى ۆلاديمير ۆاتكين، قازىرگى بەسسايىستا ۋكراينادان كەلگەن جاتتىقتىرۋشى- كەڭەسشى سەرگەي تۋروبوۆ، ۇستەل تەننيسىندە اۆستريادان كەلگەن جاتتىقتىرۋشى- كەڭەسشى دميتري ليەۆەنكو، جۇزۋدە ا ق ش- تان كەلگەن جاتتىقتىرۋشى گاراۆي حومايۋن، ستەند اتۋدان رەسەيدەن كەلگەن ەكى جاتتىقتىرۋشى- كەڭەسشى ۆاسيلي موسين مەن ۆيتالي فوكەيەۆ، سەمسەرلەسۋدە ۋكراينا مەن ۆەنگريادان كەلگەن ەكى جاتتىقتىرۋشى- كەڭەسشى الەكساندر تورچۋك پەن فەرەنتس توت، كوركەم گيمناستيكادا رەسەيدەن كەلگەن ەكى جاتتىقتىرۋشى- كەڭەسشى يننا بىستروۆا مەن يرينا زينوۆكا، برەيكينگتە رەسەيدەن كەلگەن جاتتىقتىرۋشى- كەڭەسشى اسلانبەك نىروۆ سياقتى بىلىكتى ماماندار ۇلتتىق قۇراما كوماندامەن بىرلەسىپ جۇمىس اتقارىپ جاتىر»، - دەدى قاناعاتوۆ.
ەستەرىڭىزگە سالا كەتەيىك، كەشە قازاقستان قۇراماسىنا كوركەم گيمناستيكادان ەلجانا تانيەۆا تاشكەنتتە ءوتىپ جاتقان ازيا چەمپيوناتىندا پاريج وليمپياداسىنىڭ 50- جولداماسىن سىيلادى.
اۆتور
كۇنسۇلتان وتارباي
