سپورتشىعا ءتورت كۇن قاتارىنان جارىسقا شىعۋ قيىن - الەكساندرا لەنىڭ جاتتىقتىرۋشىسى

الماتى. KAZINFORM - وليمپياداشىلارعا ۇلكەن مىندەت جۇكتەلدى. الەكساندرا لە وزىنە ارتىلعان جاۋاپكەرشىلىكتى سەزىنىپ، ەل نامىسىن بارىنشا ابىرويمەن قورعادى. مۇنداي پىكىردى سپورتشىنىڭ جاتتىقتىرۋشىسى ولگا دوۆگۋن ايتتى.

ولگا دوۆگۋن الەكساندرا لەنىڭ جۇلدەلى ورىننان كورىنە الماۋىنىڭ بىرنەشە سەبەبىن اتادى.

«جۇكتەلگەن مىندەتتى جاۋاپكەرشىلىكپەن ورىنداۋ وتە ۇلكەن جۇمىس، اسىرەسە پسيحولوگيالىق تۇرعىدان. كەشە عانا قولا مەدال الىپ، كەلەسى كۇنى فينالعا شىقتى. ءتورتىنشى كۇنى جارىسقا قايتا شىقتى. بۇل سپورتشىعا وتە قيىن. سونىمەن قاتار جاس سپورتشى مۇنداي جارىس دارەجەسىنە العاش رەت شىعىپ تۇر. جارايدى، ونىڭ الدىندا ءالى تالاي بەلەس بار. ول اقىلدى»، - دەدى جاتتىقتىرۋشى.

ول سونداي-اق الماتىلىقتار مەن قازاقستاننىڭ بارلىق تۇرعىنىنا سپورتشىلاردى قولداعانى ءۇشىن العىسىن ءبىلدىردى.

ايتا كەتەيىك، بۇگىن قازاقستاندىق مەرگەن الەكساندرا لە وليمپيادانى 6-ورىنمەن اياقتادى.

ەستەرىڭىزگە سالا كەتەيىك، الەكساندرا لە بۇعان دەيىن ارالاس جۇپتىق سايىستا يسلام ساتپايەۆپەن بىرگە پاريج وليمپياداسىنىڭ قولا جۇلدەسىن جەڭىپ العان ەدى.

اۆتور
الما مۇقانوۆا