سپورت تۇرلەرى بويىنشا سپورتتىق جارىستارعا قاتىسۋ ءۇشىن ەڭ تومەنگى جاس شاماسى بەلگىلەندى
استانا. KAZINFORM - قازاقستان رەسپۋبليكاسىنىڭ تۋريزم جانە سپورت مينيسترلىگى بۇقارالىق اقپارات قۇرالدارىندا تاراپ جاتقان «بالالارعا سپورتپەن اينالىسۋعا تىيىم سالۋ» جونىندەگى اقپاراتتارعا قاتىستى تۇسىنىكتەمە بەرۋدى قاجەت دەپ سانايدى.
اتالعان مالىمدەمەلەر 2025 -جىلعى 16 -شىلدەدە بەكىتىلگەن №133 بۇيرىققا سايكەس كەلمەيدى.
- بۇگىندە ەلىمىزدە 4 پەن 17 جاس ارالىعىنداعى 5,1 ميلليوننان استام بالا مەن جاسءوسپىرىم تۇراقتى تۇردە سپورتپەن اينالىسادى. جارىستار - سپورتتىق دايىندىقتىڭ ءبىر بولىگى رەتىندە بەلگىلى ءبىر فيزيكالىق جانە ەموتسيالىق جۇكتەمەلەرمەن بايلانىستى. وسىعان وراي، مينيسترلىك جارىستارعا قاتىسۋ ءۇشىن ەڭ تومەنگى جاس شەگىن بەلگىلەدى. بۇل، ەڭ الدىمەن، بالالاردىڭ دەنساۋلىعىن قورعاۋعا جانە ەرتە جاستا جاراقات الۋ قاۋپىن ازايتۋعا باعىتتالعان.
جاس شەكتەۋلەرى سپورت فەدەراتسيالارىنىڭ ۇسىنىسى نەگىزىندە ازىرلەنىپ، دەنساۋلىق ساقتاۋ مينيسترلىگىمەن كەلىسىلگەن جانە حالىقارالىق ستاندارتتارعا ساي كەلەدى. بۇل تالاپتار تەك جارىستارعا قاتىسۋعا قاتىستى. ال بالالاردى سپورت مەكتەپتەرىنە، ۇيىرمەلەرگە جانە سپورت رەزەرۆىن دايارلايتىن وزگە دە مەكەمەلەرگە قابىلداۋعا ەشقانداي شەكتەۋ قويىلمايدى، - دەلىنگەن حابارلامادا.
وسىلايشا، «سپورتپەن اينالىسۋعا تىيىم سالىندى» دەگەن حابارلامالار شىندىققا جاناسپايدى. بۇل جەردە تەك جارىستارعا قاتىسۋعا قويىلاتىن جاس تالاپتارى تۋرالى ايتىلىپ وتىر.
جاس ەرەكشەلىكتەرىنە بايلانىستى قويىلعان شەكتەۋلەر جونىندەگى تولىق اقپارات تومەندەگى كەستەدە كورسەتىلگەن.
ەسكە سالا كەتەيىك، بۇعان دەيىن «اقتوبە» مەن بيىك اراسىنداعى ويىن ايتۋلى وقيعالارمەن ەستە قالعانىن جازعان ەدىك.
