سولتۇستىككە بارعان تۇلەكتەردىڭ قايتىپ كەتۋىنە ورىس ءتىلىن بىلمەۋى سەبەپ بولعان

پەتروپاۆل. KAZINFORM - سولتۇستىك قازاقستان وبلىسىندا ون جىلدا «سەرپىن» باعدارلاماسىمەن 1,4 مىڭعا جۋىق جاس جوعارى ءبىلىم العان. الايدا تۇلەكتەردىڭ %48 عانا سولتۇستىك وڭىردە تۇراقتاپ قالعان.

پەتروپاۆلدا «ادىلدىك جانە وركەندەۋ» قوعامدىق قورى فيليالىنىڭ ۇيىمداستىرۋىمەن «ماڭگىلىك ەل جاستارى - يندۋسترياعا» - «سەرپىن - 2050» مەملەكەتتىك باعدارلاماسىمەن ءبىلىم العانداردى جۇمىسقا ورنالاستىرۋ ماسەلەسىنە قاتىستى جيىن ءوتتى. تۇلەكتەردىڭ تۇراقتاماي كەتۋىنىڭ وبەكتيۆتى سەبەپتەرى جانە وسى پروتسەستى شەشۋ جولدارى ايتىلدى.

بيىل بۇل باعدارلامانىڭ ىسكە قوسىلعانىنا 10 جىل تولىپ وتىر. سۇرانىسقا يە پەداگوگيكالىق، تەحنيكالىق، اۋىل شارۋاشىلىعى ماماندىقتارىن مەڭگەرتۋ ءۇشىن الماتى، جامبىل، قىزىلوردا، وڭتۇستىك قازاقستان، ماڭعىستاۋ وبلىستارىنىڭ جاستارىنا مەملەكەتتىك ءبىلىم بەرۋ گرانتتارى بەرىلدى.

جوبا ەلىمىزدىڭ ەڭبەك تاپشىلىعى بار وڭىرلەرىندەگى كادرلىق الەۋەتتى تولىقتىرۋعا، تۇلەكتەردى سولتۇستىك قازاقستان وبلىسىندا جۇمىسقا تارتىپ، وسى جاقتا قالدىرۋعا نەگىزدەلگەن.

2014 -جىلدان 2024 -جىلعا دەيىنگى ارالىقتا م. قوزىبايەۆ اتىنداعى سولتۇستىك قازاقستان ۋنيۆەرسيتەتىن 1373 جاس مامان ءبىتىردى. الايدا، سولاردىڭ تەك %48 عانا قالىپ، جۇمىسقا ورنالاسقان.

«سۋبسيديا ءبولىنىپ جاتىر، ءبىراق ول ادامنىڭ تۇرۋ جاعدايىنا بەرىلەدى. بىزدە ودان دا باسقا ماسەلە بار. ءبىز وقۋ بىتىرگەسىن جۇمىسقا ورنالاسا الامىز با؟ ءبىز بۇل جەردە جۇمىس تاپپاساق، باسپانانىڭ نە قاجەتى بار؟ جۇمىس بولماسا باسقا جاققا كەتەمىز. مىنە ساعان جۇمىس، ەندى سەن مىنا باسپانادا تۇراسىڭ دەسە - مۇنىمەن كەلىسەمىن.

ستاتيستيكاعا قارايتىن بولساق، ءجۇز ادامنىڭ تەك جارتىسىنا جۋىعى عانا قالعان. دەمەك بۇل باعدارلامانىڭ قازىر جالعان ءجۇرىپ جاتقاندىعىنىڭ بەلگىسى. بىزدە وڭىرگە كەلۋشىلەردىڭ سانى كوپ بولعانىمەن، قالۋشىلاردىڭ سانى شامالى. قازىرگى ۋاقىتتا كەلتىرۋ ماسەلەسىنە كوپ نازار اۋدارىپ جاتىر، ال قالدىرۋ جاعى اقساپ تۇر. بۇل جاقتا جاعداي جاسالسا، ەشقانداي جارنامانىڭ قاجەتى بولمايدى، حالىق ءوزى كەلەدى»، - دەيدى وسى باعدارلامامەن ءبىلىم الىپ جاتقان ستۋدەنت دياس ءىزباسار.

بيىل مەملەكەتتىك باعدارلامامەن جوعارى وقۋ ورنىن 71 تۇلەك اياقتاعان. ولاردىڭ 33-ىنە بوس جۇمىس ورنى ۇسىنىلسا، وقۋ بىتىرىسىمەن تەك 10-ى عانا ورنالاسقان. 36 تۇلەك ماگيستراتۋراعا تۇسۋىنە جانە ەكەۋى دەكرەتتىك دەمالىسقا بايلانىستى بوساتىلعان.

م. قوزىبايەۆ اتىنداعى سولتۇستىك قازاقستان ۋنيۆەرسيتەتى وكىلدەرىنىڭ ايتۋىنشا، تۇلەكتەردىڭ قايتىپ كەتۋىنىڭ بىرنەشە سەبەبى بار، ولار: قولجەتىمدى باسپانانىڭ جوقتىعى، تومەن ەڭبەكاقى، جاقىن تۋىستارىنىڭ بولماۋى، قولايسىز اۋا رايى جانە ورىس ءتىلىن جەتىك بىلمەۋ.

2024-2025 وقۋ جىلىنا «حالىق تىعىز قونىستانعان جانە باتىس وڭىرلەردەگى جاستارعا ارنالعان گرانتتار» كۆوتاسى بويىنشا 25 ستۋدەنت، «ق ر ۇكىمەتى ايقىنداعان وڭىرلەرگە قونىس اۋداراتىن اۋىل جاستارى» كۆوتاسى بويىنشا 23 ستۋدەنت الىنعان.

جالپى قازىر «سەرپىن» باعدارلاماسى بويىنشا جەرگىلىكتى جوعارى وقۋ ورنىندا 204 ستۋدەنت ءبىلىم الىپ جاتىر، ولاردىڭ 68- ءى 4 كۋرستا وقيدى.

بۇعان دەيىن س ق و- دا 45 اۋىل جابىلاتىندىعىن جازعان ەدىك.

اۆتور

اقەركە داۋرەنبەك قىزى