سولتۇستىك وڭىرلەرگە قونىس اۋدارۋ: بيىل قانداي مەملەكەتتىك قولداۋ كورسەتىلەدى

شىمكەنت. KAZINFORM - باسقا وڭىرگە كوشىپ بارعان ازاماتتارعا اۋقىمدى قارجىلىق جانە الەۋمەتتىك قولداۋ قاراستىرىلعان. اتاپ ايتقاندا، ءار ادامعا 300 مىڭ تەڭگەدەن استام ءبىرجولعى كومەك تولەنىپ، اي سايىنعى تۇرعىن ءۇي جالداۋ شىعىندارى وتەلەدى.

سونىمەن قاتار، جۇمىسقا ورنالاسۋعا كومەك كورسەتىلىپ، 7 ميلليون تەڭگەگە دەيىن تۇرعىن ءۇي ساتىپ الۋعا سەرتيفيكات ۇسىنىلادى.

كوشۋگە نيەت بولسا، كاسىپ تابىلادى

قونىس اۋدارۋ باعدارلاماسى ەڭبەك رەسۋرستارىن وڭىرلەر اراسىندا ءتيىمدى بولۋگە باعىتتالعان. وڭتۇستىك وبلىستاردا جۇمىس كۇشى ارتىق بولسا، سولتۇستىك جانە وزگە دە وڭىرلەردە كادر تاپشىلىعى بايقالادى. مەملەكەت كوشۋ شىعىندارىن ازايتىپ، ازاماتتاردىڭ جاڭا جەردە تۇراقتى جۇمىس تابۋىنا جاعداي جاسايدى.

جۇمىسپەن قامتۋ جانە الەۋمەتتىك قورعاۋ باسقارماسىنىڭ مالىمەتىنشە، باعدارلاما قاتىسۋشىلارىنا كەشەندى قولداۋ كورسەتىلەدى. بۇل كوشۋ پروتسەسىن جەڭىلدەتىپ، جاڭا ورتاعا بەيىمدەلۋدى جەدەلدەتەدى.

- باعدارلاما بىرنەشە باعىتتاعى كومەكتى قامتيدى. ەڭ الدىمەن، كوشۋگە بايلانىستى نەگىزگى شىعىنداردى جاباتىن ءبىرجولعى تولەم قاراستىرىلعان، - دەدى ۆەدومستۆو وكىلدەرى.

ءبىرجولعى تولەم ءار وتباسى مۇشەسىنە 70 ا ە ك مولشەرىندە قاراستىرىلعان. 2026-جىلى ونىڭ كولەمى ءبىر ادامعا - 302750 تەڭگە.

اۋىلدا دا، قالادا دا قولداۋ بار

قاتىسۋشىلارعا تۇرعىن ءۇيدى جالعا الۋ جانە كوممۋنالدىق قىزمەتتەر شىعىنى دا وتەلەدى. بۇل تولەمدەر ءبىر جىل بويى اي سايىن راستايتىن قۇجاتتار نەگىزىندە بەرىلەدى.

- تولەم كولەمى وتباسى قۇرامىنا جانە تۇراتىن جەرىنە بايلانىستى وزگەرەدى. قالالاردا سوماسى جوعارىراق، ال اۋىلدىق جەرلەردە ءسال تومەنىرەك بولادى، - دەپ ءتۇسىندىردى ماماندار.

قالاعا قونىس اۋدارعاندار ءۇشىن:

1 ادامعا - 20 ا ە ك (86500 تەڭگە)؛

2-4 ادامنان تۇراتىن وتباسىعا - 25 ا ە ك (108125 تەڭگە)؛

5 جانە ودان كوپ ادامعا - 30 ا ە ك (129750 تەڭگە).

اۋىلدىق جەرلەر ءۇشىن:

1 ادامعا - 15 ا ە ك (64875 تەڭگە)؛

2-4 ادامعا - 18 ا ە ك (77850 تەڭگە)؛

5 جانە ودان كوپ ادامعا - 21 ا ە ك (90825 تەڭگە).

شىمكەنتتە جۇمىسسىزداردىڭ سانى وسكەن

باعدارلاما تەك قارجىلاي كومەكتەن تۇرمايدى. قاتىسۋشىلارعا جۇمىس ورىندارى ۇسىنىلىپ، قاجەت بولعان جاعدايدا كاسىبي وقىتۋعا جىبەرىلەدى. سونداي- اق شاعىن نەسيە بەرۋ ارقىلى جەكە كاسىپ باستاۋعا مۇمكىندىك قاراستىرىلعان.

- نەگىزگى ماقسات - ازاماتتى كوشىرۋ عانا ەمەس، ونىڭ تۇراقتى تابىس تابۋىنا جاعداي جاساۋ. ءبىز قاتىسۋشىلارعا جۇمىسقا ورنالاسۋىنا جانە تۇراقتى تابىس كوزىن قالىپتاستىرۋعا كومەكتەسەمىز، - دەدى ماماندار.

بۇدان بولەك، قونىس اۋدارۋشىلار مەن قانداستارعا تۇرعىن ءۇي ساتىپ الۋ ءۇشىن ەكونوميكالىق ۇتقىرلىق سەرتيفيكاتى بەرىلەدى.

- سەرتيفيكات تۇرعىن ءۇي قۇنىنىڭ 50 پايىزىنا دەيىن قامتيدى، ءبىراق 1625 ا ە ك- تەن اسپايدى. بۇل شامامەن 7028125 تەڭگە، - دەپ ناقتىلادى ۆەدومستۆو.

ستاتيستيكاعا سايكەس، 2026-جىلعى 1-ناۋرىزداعى جاعداي بويىنشا شىمكەنتتە 17293 جۇمىسسىز تىركەلگەن. بۇل جۇمىس كۇشىنىڭ - 3,6 پايىزى. ءبىر اي بۇرىن بۇل كورسەتكىش 13888 ادام نەمەسە 2,9 پايىز بولعان.

قالادا باستى نازار قايتا دايارلاۋ مەن جەدەل جۇمىسقا ورنالاستىرۋعا بولىنگەن. جۇمىسسىزدار قىسقا مەرزىمدى كۋرستاردان ءوتىپ، شاكىرتاقى نەمەسە جالاقى الادى. وقىتۋ نارىقتا سۇرانىسقا يە تىگىنشى، ەسەپشى-كاسسير، اسپاز، كونديتەر، شاشتاراز-ستيليست، كومپيۋتەر وپەراتورى، وفيس-مەنەدجەر، ديزاينەر ماماندىقتارى بويىنشا جۇرگىزىلەدى.

ايتا كەتەيىك، 2025-جىلى شىمكەنتتەن 700 گە جۋىق ادام ەڭبەك كۇشى تاپشى وڭىرلەرگە قونىس اۋدارعان. ولاردىڭ باسىم بولىگى پاۆلودار وبلىسىن تاڭداعان.