سولتۇستىك قازاقستاندا مالدىڭ اشتان قىرىلىپ جاتقانى راس پا

 پەتروپاۆل. KAZINFORM - سولتۇستىك قازاقستان وبلىسىنىڭ اكىمى عاۋەز نۇرمۇحامبەتوۆ بەيرەسمي جاعدايدا ءوڭىردىڭ تىلشىلەر قاۋىمىمەن كەزدەستى.

وڭىردە قولعا الىناتىن ءىرى جوبالارمەن تانىستىرىپ، جۋرناليستەردىڭ سۇراقتارىنا جاۋاپ بەردى.

س ق و- دا قازىرگى ۋاقىتتا وزەكتى ماسەلە كوپ: قالىڭ جاۋعان قاردىڭ ەلدى مەكەندەردەن دەر كەزىندە شىعارىلۋى، كوكتەمگى سۋ تاسقىنى سالدارىن بارىنشا ازايتۋ، جولداردىڭ ساپاسى.

سونداي-اق جۇرتتىڭ قىسقا دايىنداعان جەم- ءشوبى ازايىپ، ۇزىننىڭ قىسقارعان، جۋاننىڭ جىڭىشكەرىپ، جىڭىشكەنىڭ ۇزىلەر شاعى.

قويان جىلى ادەتتەگىدەي مال ءۇشىن جايسىز بولدى. وسىعان وراي تىلشىلەر س ق و اكىمىنەن مال شىعىنى جايىندا سۇراپ ءبىلدى.

ءوڭىر باسشىسىنىڭ ايتۋىنشا، س ق و بويىنشا 135 مىڭ جىلقى بار. اقجار اۋدانىندا 16 مىڭ، ال 1 ميلليون 270 مىڭ گا اۋماقتى الىپ جاتقان ءۋاليحانوۆ اۋدانىندا 21 مىڭ جىلقى ۇستايدى.

بۇل اۋدانداردىڭ تۇرعىندارى قوراداعى مالىنا جەتكىلىكتى مولشەردە قىسقا ءشوپ- سابان جيناپ العان. شارۋاشىلىقتاردا دا مۇنداي ماسەلە جوق.

«بيىل قىس جاعدايى وتە قيىن. قىستا جاڭبىر جاۋىپ، قاتىرىپ تاستادى. قازىر قاي اۋدانعا بارساڭىز دا، جابايى جانۋارلار - ەلىك، مارالدار جولداردىڭ، اۋىلداردىڭ ماڭىندا ءجۇر. ويتكەنى تەبىندەي المايدى. بىرەر كۇن بۇرىن ءۋاليحانوۆ اۋدانىنداعى قايرات پەن جاسقايرات اۋىلدارىنا بارىپ، حالىقپەن كەزدەسىپ، جاعدايدى ءبىلدىم. جالپى وڭىردە مالدىڭ جاپپاي قىرىلۋ فاكتىلەرى تىركەلگەن جوق. بىرەن-ساران بار. ولگەن مال شەتتەن كەلىپ، ۇيىرگە جىلقىلارىن قوسقانداردىكى. ياعني مالدى اكەلىپ قوسادى، ول قىسى-جازى جىلقىشىنىڭ باقىلاۋىندا دالادا جۇرەدى. بيىلعىداي قالىڭ قاردا، كوك مۇزدا ولار تەبىندەي الماي، سالدارىنان بىرەن- ساران ولگەن مال بار. مۇنى ەستىگەننەن كەيىن كاسىپكەرلەرمەن سويلەسىپ، ارزان باعادا جەم- ءشوپ الا باردىق. مالعا ازىق جىبەرگەن جىگىتتەرگە العىس ايتامىن»، - دەدى عاۋەز نۇرمۇحامبەتوۆ.

وبلىس اكىمىنىڭ ايتۋىنشا، اۋدان، اۋىل اكىمى وزىنە بەكىتىلگەن اۋماقتاعى جاعدايدى ءبىلىپ، ءبىر-ەكى ايعا بۇرىن بولجاپ وتىرۋ كەرەك.

«قازىر اۋدانداردا ەسەبى جوق، ەشقايدا تىركەلمەگەن مال كوپ. ول قايدان كەلدى، يەسى كىم، قىسقا تيىسىنشە جەم-ءشوپ دايىندادى ما، قاي جەردە جايىلىپ ءجۇر - حاباردار بولىپ وتىرۋى ءتيىس. ەگەر قىس قاتتى بولسا جىلقىلارمەن نە ىستەيسىڭ؟ -- دەپ سۇراۋى كەرەك. بۇل-حالىقتىڭ مالى عوي. اۋىل شارۋاشىلىعى باسقارماسىنا، ءبىرىنشى ورىنباسارىما، ۆەتەرينارلىق دارىگەرلەرگە سوڭىن، ياعني كوكتەمگى سۋ تاسقىنى مەن كۇننىڭ جىلىنۋىن كۇتپەي انىقتاۋدى تاپسىردىم. دالادا ولگەن نەمەسە ارىق مال بولسا جيناپ الۋ قاجەت»، - دەدى عاۋەز نۇرمۇحامبەتوۆ.

اقجار، ءۋاليحانوۆ اۋداندارىنا ارزانداتىلعان باعامەن ءشوپ پەن سابان تيەلگەن العاشقى كولىكتەر كەلدى. بۇل ماسەلەنى س ق و اكىمى جەكە باقىلاۋىندا ۇستاماق.