سولتۇستىك قازاقستاندا 50 شاقتى ەلىكتى اتقان قىلمىستىق توپقا سوت ۇكىمى شىقتى

پەتروپاۆل. KAZINFORM - پەتروپاۆل قالالىق سوتى 53 ەلىكتى اتقان ءتورت براكونەردى سوتتادى.

سولتۇستىك قازاقستان وبلىستىق سوتى باسپا ءسوز قىزمەتىنىڭ مالىمەتىنشە، 12-اقپان كۇنى پەتروپاۆل قالالىق سوتى قىلمىستىق ءىستى قارادى. ولارعا قىلمىستىق توپ قۇرىپ، زاڭسىز اڭشىلىقپەن اينالىستى دەگەن ايىپ تاعىلعان ەدى.

گ ر. دەگەن قىلمىستىق توپ قۇرىپ 2022-جىلدىڭ كۇزىنەن 2023-جىلدىڭ 27-اقپانىنا دەيىن قارۋ-جاراق پەن اۆتوكولىكتى پايدالانىپ، پەتروپاۆلدىڭ ماڭىندا زاڭسىز اڭ اۋلاعان. وسىلايشا 53 ءسىبىر ەلىگىن اتىپ العان. سالدارىنان س ق و ورمان شارۋاشىلىعى جانە جانۋارلار الەمى اۋماقتىق ينسپەكسياسىنا 68 ميلليون تەڭگەدەن استام شىعىن كەلتىرگەن.

سوتتالۋشىلاردىڭ كىناسى تولىق دالەلدەندى. الايدا ز. ءوز كىناسىن مويىنداماي، اقتاۋدى سۇرادى. باسقالاردا كىناسىن مويىنداماي، جازانى جەڭىلدەتۋدى سۇرادى.

ق ر قىلمىستىق كودەكسىنىڭ 262-باپتىڭ 1-2-بولىگى - ۇيىمداسقان توپ، قىلمىستىق ۇيىم قۇرۋ جانە ولارعا باسشىلىق ەتۋ، سول سياقتى ونىڭ قىزمەتىنە قاتىسۋ بويىنشا جازا 5 جىلدان 10 جىلعا دەيىن قاراستىرىلعان.

ق ر قىلمىستىق كودەكسى 337-باپ - زاڭسىز اڭشىلىق بويىنشا سانكسيا 6 جىلدان 10 جىلعا دەيىن باس بوستاندىعىنان ايىرۋ جازاسىن كوزدەيدى.

پەتروپاۆل قالالىق سوتى كىشكەنتاي بالالارى بارىن جازانى جەڭىلدەتەتىن جاعداي دەپ قارادى. گ ر. -نىڭ قىلمىستى بىرنەشە رەت جاساۋى، قىلمىستىق توپ قۇرۋى - جازاسىن اۋىرلاتتى.

ناتيجەسىندە گ ر. 11 جىلعا سوتتالدى. ول قىلمىستىق اتقارۋ جۇيەسىنىڭ ماكسيمالدى قاۋىپسىزدىك مەكەمەسىنە ورنالاستىرىلادى. قالعان ۇشەۋى 8 جىلعا باس بوستاندىعىنان ايىرىلدى، ولار جازاسىن ورتاشا قاۋىپسىزدىك مەكەمەسىندە وتەيتىن بولادى.

سونداي- اق سوتتالعاندار اڭشىلىقپەن اينالىسۋ قۇقىعىنان ايىرىلدى.

سوت ۇكىمى زاڭدى كۇشىنە ەنگەن جوق.

اۆتور

اقەركە داۋرەنبەك قىزى