سولتۇستىك قازاقستاندا 2400 ءۇيدى سۋ باسقان

استانا. KAZINFORM - سولتۇستىك قازاقستان وبلىسى توتەنشە جاعدايلار دەپارتامەنتىنىڭ باسپا ءسوز حاتشىسى ەۆگەني جۋراۆليەۆ سولتۇستىك قازاقستان وبلىسىنداعى جاعداي ءالى كۇردەلى ەكەنىن ايتتى.

«وبلىسىمىزداعى جاعداي ءالى دە كۇردەلى. سەرگەيەۆ سۋ قويماسى %149 تولىپ، سۋ بوگەت شىڭىنان 2 مەتر 61 سانتيمەتر استى. تاۋلىك ىشىندە 9 سانتيمەتر تومەندەدى. ەسىل وزەنىندە سۋ دەڭگەيى كوتەرىلىپ كەلەدى. وزەن جاعاسىنىڭ ماڭىندا ورنالاسقان قىزىلجار اۋدانىنىڭ ەلدى مەكەندەرى مەن پەتروپاۆل قالاسىندا ۇيلەردى سۋ باسۋ دەرەكتەرى تىركەلگەن. قازىرگى ساتتە وبلىستا 2401 ءۇي جانە 1115 ءۇي ماڭىنداعى اۋماقتاردى سۋ باسقان»، - دەدى دەپارتامەنت وكىلى.

جالپى وبلىس اۋماعىندا 12235 ادام قاۋىپسىز جەرگە كوشىرىلگەن. ونىڭ 2919 ى - بالا. تاۋلىك ىشىندە 2947 ادام، ونىڭ ىشىندە 488 بالا ەۆاكۋاتسيالانعان.

ازىرگە تەك 44 ادام ۇيىنە قايتىپ بارعان. ەۆگەني جۋراۆليەۆتىڭ ايتۋىنشا، وڭىردە 3590 باس مال قاۋىپسىز جەرلەرگە كوشىرىلگەن.

«تاسقىننىڭ نەگىزگى تولقىنى قىزىلجار اۋدانىنىڭ تەپليچنوە، پريبرەجنوە كەنتتەرىنە كەلدى. بۇل ەلدى مەكەندەردە 565 ءۇيدى سۋ باسىپ، 2 287 ادام ەۆاكۋاتسيالاندى. سوڭعى تاۋلىك ىشىندە سۋ بولشايا مالىشكا، سوكولوۆكا، ۆيشنيەۆكا، ولشانكا ەلدى مەكەندەرىنە كىرىپ، 317 ءۇيدى سۋ باستى، 1562 ادام ەۆاكۋاتسيالاندى. سۋ دەڭگەيى اسىرەسە پەتروپاۆل قالاسىندا كوتەرىلىپ تۇر. الايدا جۋىر ماڭدا بىرتىندەپ تۇسەدى دەپ وتىرمىز»، - دەدى ول.

اۆتور

ەسىمجان ناقتىباي