سولتۇستىك كورەيا وڭتۇستىك كورەياعا ءناجىس زاتتار تولتىرىلعان شارلاردى ۇشىردى

  استانا. قازاقپارات - Yonhap اقپارات اگەنتتىگىنىڭ حابارلاۋىنشا، وڭتۇستىك كورەيانىڭ بىرىككەن شتابى سولتۇستىك كورەيانىڭ وڭتۇستىك كورەياعا قاراي ءناجىس پەن قوقىس تولتىرىلعان كوپ مولشەردەگى شارلاردى جىبەرە باستاعانىن مالىمدەدى.

وسى ۋاقىتقا دەيىن وڭتۇستىك كورەيانىڭ كوپتەگەن ايماعىندا سولتۇستىك كورەيادان ۇشىرعان 150 اۋە شارى تابىلدى. شارلاردىڭ كەيبىرى قوندى، ال باسقالارى ءالى دە اۋادا قالقىپ تۇر. شارلارمەن تاسىمالداناتىن زاتتاردىڭ بارلىعى قوقىس پەن ءناجىس ەكەنى راستالدى.

بۇل شارلاردى جيناۋ جانە تالداۋ جۇمىستارىن جۇرگىزۋگە وڭتۇستىك كورەيا اسكەريلەرىنىڭ بيوحيميالىق شابۋىلداردىڭ الدىن الۋ جونىندەگى «CRRT» دەپارتامەنتى مەن جارىلعىش وق- دارىلەردىڭ الدىن الۋ جونىندەگى «eOD» دەپارتامەنتى بولىمشەلەردىڭ جەكە قۇرامى جۇمىلدىرىلدى.

وڭتۇستىك كورەيا سولتۇستىك كورەيانى حالىقارالىق قۇقىقتى بۇزدى جانە وڭتۇستىك كورەيا ازاماتتارىنىڭ قاۋىپسىزدىگىنە ەلەۋلى قاتەر ءتوندىردى دەپ ايىپتاپ جاتىر.

وڭتۇستىك كورەيا اسكەريلەرى قازىرگى جاعدايدى شەشۋ ءۇشىن بىرىككەن ۇلتتار ۇيىمىنىڭ قولباسشىلىعىمەن بىرلەسىپ جۇمىس اتقاراتىنىن مالىمدەدى جانە ازاماتتارعا سولتۇستىك كورەيانىڭ اۋە شارلارىن بايقاعان جاعدايدا دەرەۋ پوليتسياعا حابارلاسۋ كەرەكتىگىن ەسكەرتتى.

Yonhap اگەنتتىگىنىڭ حابارلاۋىنشا، سولتۇستىك كورەيانىڭ رەسمي اقپارات قۇرالدارى 26- كۇنى وڭتۇستىك كورەيانىڭ كەيبىر ازاماتتىق قوعامدارىنىڭ سولتۇستىك كورەياعا ۇگىت- ناسيحات پاراقشالارىن تاستاۋىنا بايلانىستى جاۋاپ رەتىندە ارەكەت جاسايتىنىن حابارلاعان.

سولتۇستىك كورەيا 2016 -جىلى دا وڭتۇستىك كورەياعا قوقىس تاسىمالدايتىن شارلار جىبەرگەن ەكەن.

اۆتور

مۇقتار مۇرات