سولتۇستىك ارال تەڭىزىندە سۋ كولەمى ارتتى

استانا. KAZINFORM – ق ر سۋ رەسۋرستارى جانە يرريگاتسيا مينيسترلىگى سولتۇستىك ارال تەڭىزىندەگى سۋ دەڭگەيى تۋرالى اقپاراتپەن ءبولىستى.

ۆەدومستۆونىڭ حابارلاۋىنشا، قۇرامىنا قازاقستان، قىرعىزستان، تاجىكستان، تۇركىمەنستان جانە وزبەكستان كىرەتىن مەملەكەتارالىق ۇيلەستىرۋ سۋ كوميسسياسىنىڭ 86- وتىرىسىندا تاراپتار سۋارۋ ماۋسىمىندا سولتۇستىك ارالعا 997 ميلليون تەكشە مەتر سۋ اعاتىنى تۋرالى كەلىسىمگە كەلگەن. قازىر تەڭىزگە سەكۋندىنا 50 تەكشە مەتر سۋ قۇيىلىپ جاتىر. ءبىر جىل بۇرىن اعىن سەكۋندىنا 6 تەكشە مەتر بولعان ەدى.

«جىل باسىنان بەرى سولتۇستىك ارالعا 1,1 ميلليارد تەكشە مەتر سۋ قۇيىلدى. وسىلايشا، بۇگىندە سولتۇستىك ارالداعى سۋدىڭ كولەمى 21,4 ميلليارد تەكشە مەتر بولىپ وتىر»، - دەلىنگەن مينيسترلىك تاراتقان حابارلامادا.

بۇعان دەيىن سولتۇستىك ارالدى وڭتۇستىكتەن ءبولىپ تۇرعان كوكارال بوگەتىنىڭ قۇرىلىسى اياقتالعان بولاتىن. بوگەت سولتۇستىك ارال تەڭىزىندەگى سۋ دەڭگەيىن كوتەرۋگە مۇمكىندىك بەرەتىنىن اتاپ وتكەن ءجون.

ەستەرىڭىزگە سالساق، بۇعان دەيىن ەكولوگيا جانە تابيعي رەسۋرستار ءمينيسترى ەرلان نىسانبايەۆ Kazinform تىلشىسىنە سۇحبات بەرىپ، ارال تەڭىزىنىڭ احۋالىمەن بولىسكەن ەدى.

اۆتور

ورالحان قوجانوۆ