سوعىس قۇپيالارى: ەۋرازيا ءبىرىنشى ارناسىندا تاريحي سەريال كورەرمەنگە جول تارتادى
استانا. قازاقپارات - 5-9 -مامىر ارالىعىندا «ەۋرازيا ءبىرىنشى ارناسىندا» كوپ ءبولىمدى «الليگاتور» كوركەم فيلمى جارىققا شىعادى. تەلەتۋىندى بۇرىن قۇپيا سانالعان ارحيۆ ماتەريالدارى نەگىزىندە تۇسىرىلگەن تىلداعى سوعىس تۋرالى باياندايدى.
فيلم - رەسەيدىڭ (ءبىرىنشى ارنا) جانە قازاقستاننىڭ (ەۋرازيا ءبىرىنشى ارناسى) بىرلەسكەن جوباسى.
تاريحي سەريالدا ەكىنشى دۇنيەجۇزىلىك سوعىسى كەزىندە الماتى قالاسىندا بولعان وقيعالار نەگىزىندە ءوربيدى. سول كەزەڭدە قالاعا زاۋىتتار، تەاترلار مەن كينوستۋديالار ەۆاكۋاتسيالانعان. سونىمەن قاتار ماسكەۋ، كيەۆ، حاركوۆ، كيشينيەۆ، مينسك قالالارىنان ۇرىلار مەن پاتەر توناۋشىلار دا تىلعا اعىلدى. ولاردىڭ قاتارىندا كەيىننەن ستانيسلاۆ گوۆورۋحيننىڭ «كەزدەسۋ ورنىن وزگەرتۋگە بولمايدى» فيلمىندە بەينەلەنگەن «قارا مىسىق» (چەرنايا كوشكا) اتتى قاتىگەز قىلمىستىق توپتىڭ مۇشەلەرى دە بار.
قازاقستاننىڭ باي پايدالى قازبا قورلارى دا «ترەتيي رەيح» اگەنتتەرىنىڭ نازارىن اۋدارعان. سەريالدا پارتيا جانە شارۋاشىلىق باسشىلارىنا جاسالعان قاستاندىقتار، ەۆاكۋاتسيالانعان كاسىپورىندارداعى تەراكتىلەر مەن رەجيمگە نارازى ازاماتتاردى ءوز جاقتارىنا تارتۋمەن اينالىسقان ديۆەرسانتتاردى جويۋ بويىنشا ارنايى وپەراتسيالار باياندالادى.
- بۇل فيلم - قازاقستاننىڭ جەڭىسكە قوسقان وراسان زور ۇلەسى تۋرالى. 528 كەڭەس وداعىنىڭ باتىرى - وسىنىڭ ايقىن دالەلى. ولاردىڭ ىشىندە ءاليا مولداعۇلوۆا مەن مانشۇك مامەتوۆا دا بار - ەكەۋى دە مايدانعا شاقىرتىلماسا دا، ءوز ەرىكتەرىمەن اتتاندى. بۇل - پاتريوتيزمنىڭ بۇرىن-سوڭدى بولماعان كورىنىسى، ونى ۇمىتپاۋىمىز كەرەك. فيلم قىزىقتى، شيەلەنىستى ءارى شىنايى شىقتى. ءول وز كورەرمەنىن تاباتىنىنا جانە حالىق اراسىندا كەڭ تارالاتىنىنا سەنىمدىمىن، - دەدى «ەۋرازيا ءبىرىنشى ارناسى» باس ديرەكتورىنىڭ مىندەتىن اتقارۋشى ارمان قۇدايبەرگەنوۆ.
سەريالدىڭ رەجيسسەرى - ۆلاديمير ۆوروبيەۆ. اكتەرلىك قۇرامدا - قازاق كينوسىنىڭ اڭىزى، قازاقستاننىڭ حالىق ءارتىسى مەرۋەرت وتەكەشيەۆا، رەسەيدىڭ ەڭبەك سىڭىرگەن ءارتىسى تاتيانا دوگيليەۆا، پاۆەل ترۋبينەر، ايدانا ەلەمەس، دميتريي استراحان، ەربولات توعىزاقوۆ، ەركەن عۇباشيەۆ، ءاليحان كارىبايەۆ جانە ازامات نىعمانوۆ بار.
اۆتور
داۋلەت ىزتىلەۋ
