سوعىس جاعدايىندا ازاماتتاردى قورعايتىن كونتەينەر: ۇلتتىق ستاندارت ازىرلەندى
استانا. KAZINFORM - ەلىمىزدە سوعىس جاعدايىندا ازاماتتاردى قورعايتىن موبيلدى قورعانىش كونتەينەرلەرىنىڭ ۇلتتىق ستاندارتى ازىرلەندى. بۇل تۋرالى Kazinform-نىڭ رەسمي ساۋالىنا ق ر ت ج م جولداعان جاۋاپتا ايتىلعان.

- ت ج م باستاماسى بويىنشا ساۋدا جانە ينتەگراتسيا مينيسترلىگىنىڭ تەحنيكالىق رەتتەۋ جانە مەترولوگيا كوميتەتى ق ر س ت 3981-2024 «توتەنشە جاعدايلارداعى قاۋىپسىزدىك. ازاماتتىق قورعانىستىڭ موبيلدى قورعانىش قۇرىلىسجايلارى» ۇلتتىق ستاندارتىن ازىرلەدى. بۇل ستاندارت 2025-جىلدىڭ 1-تامىزىنان باستاپ كۇشىنە ەنەدى.
ستاندارت توتەنشە جاعدايلار كەزىندە قاۋىپسىزدىكتىڭ جوعارى دەڭگەيىن قامتاماسىز ەتە وتىرىپ، ازاماتتىق قورعانىستىڭ ءموبيلدى قورعانىش قۇرىلىسجايلارىنا قويىلاتىن نەگىزگى تالاپتاردى، ولاردىڭ فۋنكتسيونالدىق سيپاتتامالارى مەن تەحنيكالىق جاراقتاندىرىلۋىن رەگلامەنتتەيدى، - دەلىنگەن حابارلامادا.
مالىمەتكە ساي، بەلگىلەنگەن تالاپتارعا سايكەس ساناتتالعان ۇيىمدار قورعانىش قۇرىلىستارىنا قاجەتتىلىكتى نەگىزگە الا وتىرىپ، موبيلدى قورعانىش قۇرىلىسجايلارىن دايىنداۋشى زاۋىتتاردان ونى ساتىپ الۋدى دەربەس جۇزەگە اسىرادى.
ەسكە سالساق، بۇل ماسەلە 2023-جىلى كوتەرىلگەن. سول كەزدەگى ت ج م باسشىسى سىرىم ءشارىپحانوۆ ب ا ق وكىلدەرىنىڭ ساۋالىنا جاۋاپ بەرە وتىرىپ، پاركينگتەر، مەترولاردى قورعانىس قۇرىلىسى رەتىندەگى پايدالانۋ مۇمكىندىكتەرىن قاراستىرىپ جاتقانىن ايتقان. ول ءۇشىن عالىمداردىڭ كومەگىمەن ارنايى قورعانىس كونتەينەرى دايىندالىپ، استاناداعى ءورت ءسوندىرۋ بەكەتىندە قويىلعانىن اتاپ وتكەن ەدى.
ازىرلەنگەن ستاندارتتىڭ تۇسىندىرمەسىندە، بۇنداي قورعانىس قۇرىلىسجايلارى اۋەلى ازاماتتىق قورعانىس ساناتتارىنا جاتقىزىلعان ۇيىمداردىڭ ەڭ كوپ جۇمىس ىستەيتىن اۋىسىمىن قورعاۋ ءۇشىن، سونداي-اق ودان ءارى ەۆاكۋاتسيالاۋ جاعدايىنىڭ ناشارلاۋىنا نەمەسە ومىرگە قاۋىپ توندىرەتىن اسقىنۋلارعا اكەلۋى مۇمكىن تاسىمالدانبايتىن ناۋقاستاردى، سونداي-اق مەديتسينالىق ۇيىمداردىڭ مەديتسينالىق جانە قىزمەت كورسەتۋ پەرسونالىن قورعاۋ ءۇشىن قۇرىلادى.
ايتا كەتەيىك، بۇعان دەيىن ەلىمىزدەگى بومبادان قورعاۋ ورىندارىنىڭ 70 پايىزى جەكەنىڭ قولىندا ەكەنىن جازعان ەدىك.