سوڭعى 10 جىلدا 2 عانا وتاندىق پرەپارات تىركەلگەن - ءاليحان سمايىلوۆ
استانا. KAZINFORM - ق ر جوعارى اۋديتورلىق پالاتاسىنىڭ ءتوراعاسى ءاليحان سمايىلوۆ ءماجىلىستىڭ جالپى وتىرىسىندا فارماتسيەۆتيكا سالاسىندا عىلىمي زەرتتەۋلەردىڭ ناتيجەلىلىگى تومەن ەكەنىن ايتتى.
- بيومەديتسينالىق جانە كلينيكالىق زەرتتەۋلەردىڭ رەتتەۋشىلىك بازاسىندا دا كەمشىلىكتەر بار. بىرنەشە جىل وتسە دە بيومەديتسينالىق زەرتتەۋلەردى تىركەۋ جۇيەسى مەن كلينيكالىق بازالار ءتىزىلىمى ءالى جاسالماعان. وسىنىڭ سالدارىنان عىلىمي زەرتتەۋلەردىڭ ناتيجەلىلىگى وتە تومەن. سوڭعى 10جىلدا ەلىمىزدە نەبارى ەكى ءتۇپنۇسقا وتاندىق پرەپارات تىركەلگەن. ولاردىڭ بىرەۋىن ازىرلەۋگە 4 ميلليارد تەڭگەدەن استام قاراجات جۇمسالعانىنا قاراماستان، ۇلتتىق دارىلىك فورمۋليارعا ەنگىزىلمەگەن، - دەدى جوعارى اۋديتورلىق پالاتاسىنىڭ ءتوراعاسى.
سونداي-اق ول بۇل سالاعا مەملەكەتتىك قولداۋ سوڭعى جىلدارى ايتارلىقتاي وسكەنىن اتاپ ءوتتى.
- مەملەكەت وتاندىق فارماتسيەۆتيكانى دامىتۋ ءۇشىن اۋقىمدى كولەمدە جەڭىلدىكتەر مەن پرەفەرەنتسيالار بەرۋدە. 2022-2024 -جىلدارى وسى سالاعا بەرىلگەن پرەفەرەنسيالاردىڭ جالپى كولەمى 148 ميلليارد تەڭگەگە جەتتى. سونىمەن قاتار ءبىرىڭعاي ديستريبيۋتور وتاندىق تاۋار وندىرۋشىلەردىڭ ءونىمىن 10 جىل بويى ساتىپ الۋعا كەپىلدىك بەرەتىن ۇزاق مەرزىمدى شارتتار جاسايدى. مۇنداي ساتىپ الۋ كولەمى سوڭعى بەس جىلدا 69 ميلليارد تەڭگەدەن 112 ميلليارد تەڭگەگە دەيىن ءوستى، - دەدى ءاليحان سمايىلوۆ.
ودان بولەك، سپيكەر ەلىمىزدە وندىرىلەتىن ءدارى-دارمەكتەر سانى ەكى ەسە ازايىپ كەتكەنىن ايتتى.
«وتاندىق تاۋار وندىرۋشىلەردەن ساتىپ الۋدىڭ جالپى كولەمىنىڭ وسۋىنە قاراماستان، وتاندىق كومپانيالار جەتكىزەتىن ءدارى-دارمەكتەر اسسورتيمەنتى 968-دەن 507-گە دەيىن، ياعني 2 ەسەگە جۋىق ازايعان. باسقاشا ايتقاندا، وتاندىق تاۋار وندىرۋشىلەر ءوندىرىسى جەڭىل مەديتسينالىق بۇيىمدار شىعارۋدى ۇلعايتقانىمەن، ەلىمىزدە وندىرىلەتىن ءدارى-دارمەكتەر سانى قىسقارۋدا»، - دەدى ول.
وسىعان دەيىن قازاقستانداعى فارم نارىقتىڭ 84 پايىزى شەتەلدىك ءونىم ەكەنى تۋرالى جازدىق.
اۆتور
ەربول جانات
