ستيۆ باراكات قازاقستان جايىندا: عاجاپ ديناميكاسى بار تانىمال جەر
استانا. KAZINFORM - ەسىمى الەمگە ايگىلى كومپوزيتور ءارى پيانيست ستيۆ باراكات 8-ناۋرىز - حالىقارالىق ايەلدەر مەرەكەسىنە وراي «استانا وپەرادا» كونسەرت وتكىزۋ ءۇشىن ەلىمىزگە العاش رەت كەلدى. ول Kazinform اگەنتتىگىنىڭ تىلشىسىنە بەرگەن ەسكليۋزيۆتى سۇحباتىندا قازاقستان جانە ونىڭ ادامدارى جايلى اسەرىمەن ءبولىستى.
- قازاقستانعا العاش رەت تابان تىرەگەنىمە جانە «استانا وپەرا» سىندى عاجايىپ مادەني وردادا ونەر كورسەتەتىنىمە وتە قۋانىشتىمىن. بۇل جەردىڭ اۋا رايى كانادانىڭ اۋا رايىنا ازداپ ۇقسايدى ەكەن. سول جاقتا دۇنيەگە كەلگەن سوڭ قىسقى كليماتىن جاقسى بىلەمىن. قازاقستان تۋرالى ايتار بولسام، بۇل ەلدىڭ ادامدارى ەرجۇرەك ەكەنىن سەزىندىم. جاس مەملەكەت بولسا دا ۇلكەن تاريحتارىڭىز، سالت-داستۇرلەرىڭىز بار. استانا مەن قازاقستان توڭىرەگىندەگى ديناميكانى كوردىم جانە بۇل ماعان ۇنايدى، - دەپ اتاپ ءوتتى ستيۆ باراكاتت.
مۋزىكانت قازاقستاننىڭ جىلى قابىل العانىن جانە يۋنيسەف جۇمىسىنىڭ ماڭىزدىلىعىن اتاپ ءوتتى.
- 20 جىلدان استام ۋاقىتتان بەرى يۋنيسەفتىڭ كاناداداعى ىزگى نيەتتى ەلشىسى بولىپ جۇمىس ىستەيمىن. قازاقستاننىڭ بالالارعا كومەك كورسەتۋگە، سونداي-اق ولاردىڭ ءومىر ءسۇرۋ ساپاسىن جاقسارتۋعا وتە ءجىتى قارايتىنىن بىلەمىن، - دەدى ول.
ماەسترو قازاقستاندىقتاردىڭ جۇزدەرى جىلى، مىنەزدەرى جايدارى ەكەنىن ەرەكشە اتاپ ءوتتى.
- ازيادا بىرنەشە مارتە بولدىم جانە بۇل ەۋروپالىق جانە ازيالىق قۇندىلىقتاردىڭ تاماشا ۇيلەسىم تاپقان مەكەنى. مەن تاريحتارىڭىزدىڭ كەڭەس وداعىمەن بايلانىستى ەكەنىن بىلەمىن. قازاقستاندا ونەردىڭ، مۋزىكانىڭ جانە بالەتتىڭ بارلىق سۇلۋلىعىن كورە الاسىز. بۇل تاماشا جەر، - دەدى باراكات.
سونداي-اق مۋزىكانت اڭگىمە اراسىندا قازاقتىڭ ءداستۇرلى مۋزىكاسىنا قىزىعۋشىلىق تانىتىپ جۇرگەنىن، بولاشاقتا جەرگىلىكتى ورىنداۋشىلارمەن تىعىز قارىم-قاتىناس ورناتىپ، بىرلەسە جۇمىس ىستەۋدى جوسپارلاپ وتىرعانىن دا ايتىپ قالدى.
- فولكلورلىق مۋزىكانى جيى تىڭدايمىن. ءارى سىزدەردە ديماش قۇدايبەرگەن سياقتى تانىمال انشىلەر بار ەكەنىن بىلەمىن. الداعى ۋاقىتتا بۇل ەل تۋرالى كوبىرەك بىلگىم كەلەدى. سول سەبەپتى بولاشاقتا جەرگىلىكتى مۋزىكانتتارمەن ىنتىماقتاستىق ورناتۋدى جوسپارلاپ وتىرمىن. بۇل جولى سيمفونيالىق وركەسترمەن ونەر كورسەتەمىز جانە الداعى بىرنەشە جىلدا ءداستۇرلى مۋزىكانى تەرەڭىرەك زەرتتەيمىن، - دەدى ول.
ستيۆ باراكاتتتىڭ شىققان تەگى ليۆاندىق، ءبىراق كانادانىڭ ازاماتى. ول - كومپوزيتور، پيانيست، مۋزىكالىق پروديۋسەر جانە شىعارماشىلىق ديرەكتور. وتىز جىلدان استام ۋاقىتتى قامتيتىن ونەر جولىندا كوپتەگەن ماراپاتتى يەلەنگەن.
كونسەرتتىك پيانيست رەتىندە ستيۆ باراكاتت بەس قۇرلىقتا 500 دەن استام جاندى قويىلىپ قويىپ، كورەرمەندەردى ەموتسيونالدى جانە كۇردەلى كومپوزيتسيالارىمەن باۋراپ الدى. ونىڭ مۋزىكاسى جۇزدەگەن تەلەديدارلىق باعدارلاما مەن حالىقارالىق سپورتتىق ترانسلياتسيالاردا، ونىڭ ىشىندە فۋتبولدان الەم چەمپيوناتى مەن فورمۋلا-1 گران-پريىندە وينالدى.
كوپتەگەن تۋىندىنى جارىققا شىعارعان مۋزىكانت رەتىندە ستيۆ باراكات بۇكىل الەم بويىنشا 5 ميلليوننان استام البومدى ساتتى. ال ونىڭ مۋزىكالىق كاتالوگى YouTube تە 250 ميلليوننان استام قارالىم جينادى. ورىنداۋشى جانە ارتيس رەتىندەگى جەتىستىگىنەن باسقا، باراكاتت الەمدەگى ەڭ تانىمال رەسمي ءانۇرانداردىڭ كومپوزيتورى سانالادى. ونىڭ شىعارمالارىنىڭ اراسىندا «بەسىك جىرى» (يۋنيسەف ءانۇرانى) بىرلىك پەن ءۇمىتتىڭ قۋاتتى ۇندەۋىن ءبىلدىردىپ، بەس قۇرلىققا تارالدى. ءتىپتى حالىقارالىق عارىش ستانتسياسى ەفيرىندە ترانسلياتسيالاندى.
ايتا كەتەيىك، ستيۆ باراكاتت «استانا وپەرا» ساحناسىندا ونەر كورسەتەتىن ءبىرىنشى سولتۇستىك امەريكالىق كومپوزيتور ءارى پيانيست بولماق.
