ۇستازدار كۇنى مەرەكەسى بەلگىلى ءبىر داتاعا رەسمي تۇردە بەكىتىلدى

بيىل العاش رەت ۇستازدار كۇنىن اتاپ ءوتۋ 5- قازانعا بەكىتىلدى.

وقۋ-اعارتۋ مينيسترلىگىنىڭ مالىمەتىنشە، بۇل كۇن دۇنيەجۇزىلىك مۇعالىمدەر كۇنىمەن سايكەستەندىرىلگەن. مەرەكە ەڭ اسىل، جاۋاپتى ءارى ماڭىزدى ماماندىق وكىلدەرىن بىرىكتىرەدى.

بۇل كۇنى ەلوردادا پەداگوگتەردىڭ رەسپۋبليكالىق سەزى وتەدى. وعان ەلىمىزدىڭ بارلىق ايماعىنان 700 گە جۋىق ۇستاز قاتىسادى. كەزدەسۋ الاڭىندا پەداگوگتەر ەڭ وزىق جانە حالىقارالىق تاجىريبەلەرىن بولىسە الادى.

ايتا كەتسەك، بۇگىندە قازاقستاننىڭ ءبىلىم بەرۋ سالاسىندا 500 مىڭعا جۋىق مەكتەپكە دەيىنگى، ورتا، تەحنيكالىق جانە كاسىپتىك ءبىلىم بەرۋ پەداگوگى جۇمىس ىستەيدى. مەملەكەت باسشىسىنىڭ قولداۋىمەن 2019-جىلى ماڭىزدى ماسەلەلەردىڭ ءبىرى - پەداگوگ ماماندىعىنا ەرەكشە مارتەبە بەرۋ تۋرالى شەشىم قابىلداندى.

ءتورت جىل ىشىندە پەداگوگتەردىڭ جالاقىسى 2 ەسە وسكەن. 220 مىڭعا جۋىق مۇعالىمگە تاعايىندالعان ساناتتارىنا قاراي 50 پايىزعا دەيىن ۇستەمەاقى تولەنىپ جاتىر. وندىرىستەن قابىلدانعان تەحنيكالىق جانە كاسىپتىك ءبىلىم بەرۋ پەداگوگتەرى جالاقىسىنا 35 پايىزعا دەيىن قوسىمشا اقى الادى. وسى جىلدىڭ قىركۇيەك ايىنان باستاپ 97 مىڭ مۇعالىمنىڭ جالاقىسى تاعى 30 پايىز ءوستى.

Halyq Uni