ەسەت ءبيدىڭ ولەڭدەرى

ەسەت 18- عاسىردىڭ اياعى، 19- عاسىردىڭ العاشقى جارتىسىندا قازىرگى اتىراۋ وبلىسىنىڭ قىزىلقوعا اۋدانىندا تۋىپ-وسكەن. سوزگە شەشەن ءبي، توپ باستاعان باتىر رەتىندە بۇكىل جايىق وڭىرىنە تانىلادى، ەل ىشىندە ۇلكەن قۇرمەتكە جەتەدى. ەسكى ەل اڭگىمەلەرى، كونە جىراۋلار مۇراسىنىڭ بىلگىرى ەسەت ءوزىنىڭ جاقىن تۋىسى مۇرات اقىننىڭ العاشقى ۇستازى بولعان.اقىننىڭ «مەن، مەن ەدىم، مەن ەدىم!»، «قارتايدىم دا قور بولدىم»، «قاس قارا نار مەن ەدىم» سەكىلدى تۋىندىلارى بەرىلدى.

ەسەت ХVIII عاسىردىڭ اياعى، ХIХ عاسىردىڭ العاشقى جارتىسىندا قازىرگى اتىراۋ وبلىسىنىڭ قىزىلقوعا اۋدانىندا تۋىپ-وسكەن. سوزگە شەشەن ءبي، توپ باستاعان باتىر رەتىندە بۇكىل جايىق وڭىرىنە تانىلادى، ەل ىشىندە ۇلكەن قۇرمەتكە جەتەدى. ەسكى ەل اڭگىمەلەرى، كونە جىراۋلار مۇراسىنىڭ بىلگىرى ەسەت ءوزىنىڭ جاقىن تۋىسى مۇرات اقىننىڭ العاشقى ۇستازى بولعان.

مەن، مەن ەدىم، مەن ەدىم!

مەن، مەن ەدىم، مەن ەدىم!

قاتارعا سالساڭ، قايىسپاس

قاس قارا نار مەن ەدىم،

شابۋىل سالسا شارشاماس

شىنى تۇلپار مەن ەدىم.

سۋ شاشىراپ، جەل تيمەس،

اۋدارىلماس قارا كەمە ەدىم.

قاسارىسىپ كەلگەندە،

قاپ تۇبىنە سىيماعان

قارا بولات مەن ەدىم.

قياننان ۇشقان قۋ ىلگەن

انىق سۇڭقار مەن ەدىم.

تەگەۋرىنىم تەرىس بىتكەن،

تەپسەم، جىلىك سىندىرعان

قىران بۇركىت مەن ەدىم!

 

قارتايدىم دا قور بولدىم

قارتايدىم دا قور بولدىم،

كۇن سەنىكى، جاستارىم!

كارىلىككە جەتكىزسە،

تالايدى كورەر باستارىڭ.

زامانىمدا ءوزىمنىڭ

ەڭسەرىسكەن ەر كوردىم.

بەلسەنىسكەن بەل كوردىم.

جاسانىسقان جاۋ كوردىم،

تىزەلەسكەن داۋ كوردىم.

ءبىر وتىرىك بولماسىن،

تابانىم تايىپ قاشپادىم.

تۇگەل ەردىڭ جولداسى -

تىلەكتەس بولعان دوس-جارىم.

سول داۋلەتتىڭ تۇسىندا

سامارقانداي ساپىرىپ،

شاپقان شوپتەي جاپىرىپ،

اسپادىم دا، تاسپادىم،

قاندى كويلەك جولداستى

سارى التىنداي ساقتادىم.

مەنىڭ كورگەن زاتىم بۇل،

توكپەي- شاشپاي قولدانىپ،

ورتاڭا سۇيرەپ تاستادىم.

قاس قارا نار مەن ەدىم

تاۋعا بىتكەن قايىڭنىڭ

سولقىلدار باسى جەل وتسە.

توعايعا بىتكەن جوڭىشقا

سولعىن تارتار كۇن وتسە.

ەرنى سالپى ەر اتى

سەمىرمەس قايتا ەر وتسە.

ەڭكەيىڭكى تارتادى،

ەر قولىنان مال كەتسە.

اربادان ۇركىپ جامان ات،

ەر سالدىرماس جال بىتسە.

قايىرى بولماس عارىپكە،

اسىلسىزعا مال بىتسە.

تاڭىردەن تىلەپ العان ۇلدارىڭ

ءتىل قايىرار ەر جەتسە.

حان بۇرىلىپ قاراعان،

ءبي بۇرىلىپ سۇراعان -

اجارى بولماس ارۋدىڭ

ەكى ون بەستەن جاسى وتسە.

سىلدىراپ بەلىن شەشىنگەن،

نازدانىپ اياق كوسىلگەن -

العانىڭا، جاندارىم،

قادىرىڭ كەتەر كۇن بولار

ەر قارتايىپ، جاس جەتسە.