ەسسە: «ەگەمەن» مەن ەر توقتار
استانا. قازاقپارات - «قازىر فوتو ءتىلشى تومەنگە ءتۇسۋى كەرەك ەدى، اعا...» - دەگەنىمشە، «نەمەنە، مەن ونى توسۋىم كەرەك پە؟» - دەگەن جاۋاپ الدىم. مۇنداي زور داۋىستى، بالكىم، ءبىرىنشى رەت ءارى توسىن ەستۋلەرى شىعار، رەداكسيانىڭ ەسىگىنەن ەنۋگە وڭتايلانعان ورىمدەي جاس قىز، ارىپتەستەرىم - تىلشىلەر بولۋى ىقتيمال، ۇرپيىسكەن حالدە ەسىكتىڭ تۇتقاسىن ۇستاعان باتىرعا يمەنە شەگىنشەكتەپ جول بەردى.
«جو-جوق، دۇرىس تۇسىنگەيسىزدەر، داڭقتى اعامىزعا قۇداي بەرگەن داۋىس دياپازونى اۋقىمىنىڭ ءوزى وسىنداي... ءدال قازىر «ءيا، توسۋىڭىز كەرەك» دەسەم، ول كىلت توقتاۋعا، ەسىكتىڭ تۇتقاسىنان قولىن كىلت بوساتۋعا دايىن. ءتارتىپتىڭ ادامى. دەمەدىم. تەك «اعا، بايقاساڭىزشى، مىنا قىزدارىمىزدىڭ جۇرەگىن ۇشىراسىز...» دەپ ءازىل تاستاعانسىدىم. وسىلاي ىشكە ەندىك.
ءزاۋلىم حوللداعى «ەگەمەننىڭ» بۇرىنعى-كەيىنگى رەداكتورلارىنىڭ بەينەسى مايلى بوياۋمەن سالىنعان ۇلكەن پاننوعا كوزى تۇسكەن توقتار اۋباكىروۆ سۋرەتكە اسىقپاي زەر سالىپ، ايالدادى. قانداي كەزدەسۋ بولسىن، ەش دايىندىقسىز جۇرمەيتىن كىرپياز ءارى مۇقيات جان ەمەس پە، كەشەگى مەن تەلەفونمەن ايتقان «Egemen Qazaqstan» گازەتىن 100 جىلدىڭ كولەمىندە باسقارعان داڭقتى رەداكتورلاردىڭ - ەكى ءداۋىر الىپتارىنىڭ سۋرەتتەگى سۇلباسىنا تاڭدانا قاراپ، ويلانا تالداپ، ءۇنسىز تۇر: جۇسىپبەك ايماۋىت ۇلى، تۇرار رىسقۇلوۆ، ساكەن سەيفۋللين، مۇحتار اۋەزوۆ، عابيت مۇسىرەپوۆ...
كەنەت:
- نۇرەكەڭدى بىردەن تانىدىم، - دەدى.
- نۇرەكەڭدى ءبارىمىز تانيمىز عوي، - دەدىم كۇمىلجىپ. توقتار اعام ماعان جالت قاراپ:
- نۇرلان ورازاليندى ايتامىن، - دەدى.
مەنىڭ الگى جاۋابىم... ەسكى ءداۋىر مەن جاڭا ءداۋىر رەداكتورلارىنىڭ قاق ورتاسىندا ورىنتاقتا وتىرعان، گازەتتىڭ 90 جىلدىعى مەرەيتويىنا وراي سۋرەتشى قيالىمەن وقشاۋلانىپ سالىنعان پاننوداعى پرەزيدەنت نۇرسۇلتان نازاربايەۆتىڭ سۋرەتىنە قاتىستى ەدى. ءيا... سول قاناتتاعى جاڭا ءداۋىر رەداكتورلارىنىڭ اراسىنداعى نۇرلان اعا ورازاليننىڭ بويشاڭ بەينەسى حالىق قاھارمانىنىڭ كوزىنە بىردەن ءتۇسۋى تەكتەن تەك ەمەس! ولار - قازاق ك س ر جوعارعى كەڭەسىنىڭ دەپۋتاتتارى بولعان، تاۋەلسىزدىكتىڭ ەلەڭ-الاڭىندا جاس مەملەكەتتىڭ تۇعىرىن قالاعان، پارلامەنتتە قاتار وتىرىپ ەلدىك ماسەلەلەردى زاڭداستىرىپ شەشكەن. ول كۇندەردىڭ ەلەسى سانادا قالعانى انىق، تارتىس پەن تايتالاستا وتكەن ساعاتتارى ەستەن ەش كەتپەسى - اقيقات! مەملەكەت جانە قوعام قايراتكەرلەرىنىڭ ءوزارا شىنايى دوستىق قارىم-قاتىناستارى دا جوق ەمەس...
سونىمەن «ەر توقتار» كىتابىنىڭ كەيىپكەرى مەن اۆتورى - كەزدەسۋگە كەلۋىن كەلدىك-اۋ، قاسيەتتى قارا شاڭىراققا ەنۋىن ەندىك-اۋ، قىزىق بولعاندا، الماتىدان جولاۋشىلاردىڭ قالاارالىق جۇردەك اۆتوبۋسىنا بۋىپ-ءتۇيىپ سالعان كىتابىمىز رەداكسياعا جەتە الماي جاتىر... اقشاتاۋدىڭ تۇسىندا اقاۋى شىققان اۆتوبۋس تەك كەشكى بەستە عانا استانا اۋماعىندا شاڭ بەرمەك. كەشكى بەس - كەزدەسۋ بىتەتىن كەز! توقتار اعام بۇل تۋرالى رەداكسيا ەسىگىنەن ەنگەندە عانا حاباردار بولعاندىقتان، «نەگە ماعان ەرتەرەك ايتپادىڭ، 15 كىتاپتى ۇيدەن-اق الىپ كەلەتىن ەدىم» عوي دەۋمەن شەكتەلدى.
ءسوز باستاعان باسىلىم باسشىسى - «قازاق گازەتتەرى» سەرىكتەستىگىنىڭ باس ديرەكتورى ديحان قامزابەك ۇلىنىڭ القالى توپتىڭ الدىندا باتىر تۋرالى جازىلعان «ەر توقتار» كىتابىنىڭ رەداكسيادا ءوتۋى الدىن-الا جوسپارلانعان ءتيىستى تانىستىرىلىمىنا وراي:
- وقاسى جوق، كەيدە ساحنا تورىنە شىققان تانىمال انشىلەردىڭ ميكروفوندارى دا ىستەمەي قالىپ جاتادى عوي، كولىك تە جوندەلەر، كىتاپ تا جەتەر استاناعا، ەڭ باستىسى اۆتورىمىز دا، كەيىپكەرىمىز دە وسىندا. قوش كەلدىڭىزدەر! - دەگەن جاراسىمدى ءازىلى مەنىڭ موينىمنان بەس باتپان جۇك تۇسىرگەندەي بولدى.
«ۇرىستا تۇرىس جوق»، ىسكە شيراق، سوزگە شەشەن عالىم-رەداكتور قازاق باسىلىمىنىڭ قارا شاڭىراعىنىڭ ارعى-بەرگى تاريحىنا ىقشامداپ شولۋ جاسادى. ءسوزىنىڭ سوڭىندا تۇڭعىش عارىشكەرىمىزگە «ەلىمىزدىڭ باس گازەتىنە توقسانىنا ءبىر رەت «مەملەكەتشىلدىك مىنبەرى» اياسىندا ءوزىڭىزدىڭ «جاندى داۋىسىڭىزبەن» وي-پىكىرىڭىزدى ايتىپ تۇرىڭىز» دەگەن ءوتىنىشىن ايتىپ تا ۇلگەردى.
- جوق، توقسانىنا ءبىر رەت... كوپ بولادى، - دەدى وعان اۋباكىروۆ قىسقاشا جاۋاپ قاتىپ.
ديحان قامزابەك ۇلى بۇل جەردە دە الگىندەگىدەي ادەمى ازىلىمەن ۇتىمدى ۇسىنىس جاسادى:
- توقتار اعا، امۋر جولبارىسى كۇللى تايگا ولكەسىن جاڭعىرتىپ، جىلىنا ەكى-اق رەت اقىرىپ قويادى ەكەن. ونىسى «ورمان پاتشاسى قالعىمايدى» دەگەنى-اۋ، سول ايتقانداي، ەندەشە، گازەتىمىزدىڭ بەتىنەن جىلىنا ەكى رەت جارق ەتىپ كورىنىپ، ءۇن قاتىپ تۇرساڭىز دەگەن ويىم بار. بۇعان قالاي قارايسىز؟
حالىق قاھارمانى تانىمال عالىمنىڭ تاۋىپ ايتقان بازىناسىنا شىن ىقىلاسپەن سوندايلىق رازى بولدى-اۋ دەيمىن. وتكىر كوزدەرى ەرەكشە ۇشقىنداپ، رازى كوڭىلمەن راحاتتانىپ، جارقىلداي كۇلدى. ونىسى - كەلىسكەنى.
مەنىڭ قۋانعانىم - ۇجىم ءۇشىن تۇڭعىش قازاق عارىشكەرىنىڭ رەداكسياعا اياق باسۋىنىڭ ءوزى وتە ۇلكەن جاڭالىق بولعان سەكىلدى. باسىلىم باسشىسىنىڭ لەزدەمەدەن باستاپ بارلىق القالى جيىن وتكىزەتىن كەڭ بولمەسىنە ارىپتەستەر تايلى-تاياعى قالماي جينالدى. وسىدان بەس جىل بۇرىنعى كەزەڭمەن سالىستىرعاندا رەداكسيا قۇرامىنىڭ 80-85 پايىزى جاڭارىپتى... كىل جاستار!
اقشاتاۋدا «ايالداعان» اۆتوكولىكتىڭ اۋرەسىنەن كەيىن - كەزىندە ءبىر بۇلاقتىڭ سۋىن ىشكەن، كاسىبي- ءابجىل ارىپتەس ىنىلەرىم، بۇگىنگى تانىمال تەلەجۋرناليست-جەتەكشىلەر يلحام («قازاقستان») مەن نۇربولعا («جىبەك جولى»)، يلزاتقا («الماتى») قايتا تەلەفون شالىپ، كەشىرىم ءوتىنىپ، ءتۇسىرۋ توبىن كەپتەلىستە تۇرعان جەرىنەن، مەكەنجايلارىنا كەرى قايتارعان ەدىم. «ەگەمەن» دە قاراپ جاتپاعان سىڭايلى، ماڭدايداعى بەينەكامەرانىڭ دىبىس جازاتىن ميكروفونىنان «حاباردىڭ» لەيبلىن بايقادىم... موبيلوگرافيانىڭ اقپارات الاڭىنا القىنىپ كىرگەن كەزى عوي، ارىپتەستەر جاپپاي قالتا تەلەفوندارىن ىسكە قوسقان. كوزى مەن قۇلاعى - توردە، كۇرەكتەي قولدارىن وقتىن-وقتىن سىلكي، ويلى سويلەپ تۇرعان عارىشكەردە بولعانىمەن، ساۋساقتارى - ىستە، تىنىم تاپپايدى، عاجاپ... باس قوناق پاۋزا جاساسا، قۇرمەتپەن قول شاپالاقتايدى!..
ءبارى جاراسىمدى، ءبارى دە ساتىمەن ۇيلەسكەنىن قاراڭىزشى. ءدال قازىر عارىشكەرمەن بۇل كەزدەسۋدىڭ جاي-جاپسارى تۋرالى ماعلۇماتتار الەۋمەتتىك جەلى كەڭىستىگىندە جان-جاققا جەلدەي ەسىپ تاراپ جاتقانىنا مەن كەپىل. قانداي كەرەمەت كەزەڭدە تۋعان ەدى بۇل، مەنىڭ ارىپتەستەرىم... بەتاشار اڭگىمەدە باسىلىم باسشىسى بۇگىنگى تاڭدا «ەگەمەندە» ءۇش ءتىلدى جۋرناليست مامانداردىڭ قىزمەت ىستەيتىنىن العا تارتا سويلەگەنى دە بار.
رەداكسيانىڭ اتىنان العاشقى ساۋالدى عارىشكەر- زەرتتەۋشىگە باس رەداكتوردىڭ ورىنباسارى تالعات باتىرحان قويدى. جۋرناليستىك قورجىنى تەلەگەي- تەڭىز دەرەك- دايەككە تولى امبەباپ تاكەڭنىڭ ساۋالدارى دا اركەزدە قىزىق: ءبىرىنشىسى، عارىش ستانساسىندا، سالماقسىزدىق جاعدايىندا اپتالاپ- ايلاپ جاتىپ تاجىريبە جاساپ، ەڭبەك ەتەتىن ايەل عارىشكەرلەر مەن ەر عارىشكەر اراسىندا عىلىم ءۇشىن، بيولوگيالىق ياكي مەديتسينالىق سالادا بەلگىلى ءبىر ەكسپەريمەنتتەردىڭ... بولۋى مۇمكىن بە ەدى؟ دەگەن ساۋال-تىن.
«بىلەتىنى - كوپ، بىلمەيتىنى - «از...» توقتار اۋباكىروۆ بۇل ساۋالعا جىميىپ قانا «بىلمەدىم...» دەدى. عارىشتا بەس مارتە بولعان، بەس مارتە دە كەمە كومانديرى قىزمەتىن اتقارعان تاشكەننىڭ بوستاندىق اۋدانىندا قازاقتار اراسىندا تۋىپ-وسكەن ۆلاديمير جانىبەكوۆتىڭ «قازاقتىعىنا» قاتىستى تاكەڭنىڭ ساۋالىنا وراي توقتار وڭعارباي ۇلى ەل ەستىمەگەن قىزىقتى مالىمەتتەردىڭ شەتىن شىعاردى: اسكەري ۇشقىش جانىبەكوۆتىڭ اۋەلگى اتى-ءجونى - كرىسين. عارىشكەرلەر توبىندا سول اتى-جونمەن دايىندىقتان وتكەن. تەك عارىشقا ۇشار الدىندا مەملەكەتتىك كوميسسيانىڭ تالابىمەن ءبىرىنشى ايەلى ليليا جانىبەكوۆانىڭ اكەسىنىڭ اتى-جونىنە كوشكەن. ال ليليانىڭ اكەسى نەمىس-فاشيستەرمەن سوعىس كەزىندە قارۋلاس دوسىنا ەلگە امان ورالسا، بالالى بولسا، مايدانداس دوسىنىڭ قۇرمەتىنە ونىڭ «جانىبەكوۆ دەگەن اتى-ءجونىن» الۋعا ءسوز بايلاسقان ەكەن دەيدى...
دۇنيەجۇزىلىك اۆياتسيا تاريحىندا تاڭداۋلى ون ۇزدىك اسكەري-سىناقشى مارتەبەسىنە يە بولعان تۇڭعىش قازاقپەن، تۇڭعىش قازاق عارىشكەرىمەن «ەگەمەندەگى» ەمەن-جارقىن اڭگىمە، قىزىقتى سۇراق-ساۋالعا قىزىقتى جاۋاپ بەرۋ سياقتى تاماشا ۇردىستە جالعاستى-اي... تاۋ شاڭعىسىنان دا ەڭبەگى سىڭگەن سپورت شەبەرى ەكەندىگى، دۇنيەجۇزى قازاقتارىنىڭ تۇڭعىش قۇرىلتايىندا كەلەسى باسقوسۋدا تەك قازاق تىلىندە سويلەۋگە ۋادە ەتكەنى، ماسكەۋ تورىندە قازاق بۇلبۇلى بيبىگۇل تولەگەنوۆامەن قوسىلىپ ءان شىرقاۋى، قايماعى بۇزىلماعان قازاقي ءوڭىردىڭ - سىر ەلىنىڭ ءتىلۇستارتۋعا جاساعان ىقپالى، ميكروحيرۋرگياداعى امبەباپ توقپانوۆتىڭ جەتىستىگى، تاۋەلسىزدىگىمىزگە قاتەر توندىرگەن 2022 -جىلدىڭ قارالى قاڭتار وقيعاسى، قازاقتىڭ نامىستان جاراتىلعان حالىق ەكەندىگى - ءبارى-ءبارى ايتىلدى. دەرەكتەر، ەستەلىكتەر، وي-تولعاۋلار باتىردىڭ باتىل كوزقاراسى مەن پايىمى، بولاشاق بولجامدارىمەن ەكشەلەندى.
ارينە، مۇنىڭ بارلىعى دا مۇزتاۋدىڭ (ايسبەرگتىڭ) ۇستىندەگى ءتۇيىندى اڭگىمەلەر بولاتىن-دى، استىنداعى ايتىلماعاندارى شە؟
...ساعاتىنا 4500 كيلومەترلىك جىلدامدىقپەن زىمىراعان جويقىن جارىلعىش راكەتاعا كەڭەستىك ميگ-31م ۇشاعى عانا توسقاۋىل قويار ەدى. نىساناعا العان بويدا جويىپ جىبەرەدى. جەر بەتىنەن 15 مەتردەن 30 مىڭ مەترگە دەيىنگى بيىكتىكتە ۇشىپ كەلە جاتقان كەز كەلگەن «تاجال نىسانىن» (بالليستيكالىق راكەتا) ۇشاق پەن ۇشقىش 300 شاقىرىم جەردەن «كورىپ-بىلەدى». ول ول ما، «31-دىڭ» جەردەگى جانە كوكتەگى التى اسكەري نىساندى ءبىر مەزەتتە جوق قىلۋعا دا الەۋەتى جەتەدى. وسىنداي زىمىران ۇستايتىن-جويعىش دىبىستان جىلدام اسكەري ۇشاقتىڭ تىزگىنىن كادىمگى ءبىزدىڭ توقتار وڭعارباي ۇلى اۋباكىروۆتىڭ، ءيا، قازىر گازەت جۋرناليستەرى الدىندا سابىرمەن عانا سويلەپ تۇرعان، ءسوزىنىڭ ارتىق-كەمى جوق الپامسا ازاماتتىڭ ۇستاعانىن، سىناقتان وتكىزىپ، وندىرىسكە قوسقانىن كوز الدىڭىزعا ەلەستەتىپ كورىڭىزشى!
توقتار اۋباكىروۆتىڭ قىزمەتتىك ءومىربايان جولدارىندا - 1976-1991 -جىل ارالىعىندا، تەك وسى سالاداعى كۇردەلى، قۇپيا ىسپەن اينالىسقانى تاريحي اقيقات. ول - كەڭەس وداعىنىڭ اسكەري اۋە كۇشتەرىنىڭ قۋاتتانۋىنا تەڭدەسسىز ۇلەس قوستى. ول – ك س ر و-عا ەڭبەگى سىڭگەن سىناقشى- ۇشقىش، اسكەري ۇشقىش-ينجەنەر، ينجەنەر- اەروديناميك، ارينە... سىناقشى-عارىشكەر-ۇشقىش! كەڭەس وداعى مەن امەريكا قۇراما شتاتتارىنىڭ اراسىنداعى قارۋ-قۋاتى باسەكەلەستىگىنىڭ قىزعان، كەڭەستىك ايگىلى «ميگتەردىڭ» اسپان كەڭىستىگىندە اتوي ساپ، «قىرعي- قاباق سوعىس» تاجىكەلەسۋىنىڭ شەگىنە جەتكەن كەزى - 1980-1985 -جىلدار. سول جىلدارداعى سيريا مەن الجير، يراك، ليۆيا، مىسىر داعدارىستارى كەزىندە ميگ-25-33 وندىرىستىك كەشەنىنىڭ زىمىرانعا قارسى سەنىمدى قورعانىس امالدارى كۇشەيدى. ول بىردەن قارۋ-جاراق باسەكەلەستەرىنىڭ نازارىن وزىنە اۋداردى.
توقتار اۋباكىروۆ باپتاپ، تىزگىندەگەن ءتورتىنشى بۋىن موديفيكاتسياسىنداعى ميگ-31 اسكەري زىمىران ۇستايتىن-جويعىش ۇشاعى ءدال سول جىلدارى اتاقتى لە-بۋرجە (فرانسيا)، بەرليندە، دۋبايدا، ۆانكۋۆەردە، فارنبورودا (انگليا) وتكەن بايقاۋ اۆياسالوندارىندا تانىستىرىلدى. الەمدىك اسكەري اۆياتسيادا ول ەشبىر تەڭدەسى جوق جويعىش- ۇشاق دەگەن باعا الدى. ايتپاقشى، توقتار وڭعارباي ۇلى سول كەڭەستىك زاماندا قازاقستان اۋماعىنداعى سارىشاعان پوليگونىنان جويعىش- ۇشاقتان جىبەرىلگەن گيپەردىبىستان (!) جىلدام زىمىراننىڭ («كينجال») نوۆوسىبىر اۋماعىنداعى اسكەري پوليگونداعى نىسانعا ءدوپ ءتيىپ، كۇل-تالقانىن شىعارعانىن تىلگە تيەك ەتتى. ول... سول كەڭەستىك زاماندا...
كەزدەسۋدىڭ مارتەبەلى قوناعى، قازاقستاننىڭ ارداقتى اقساقالى - مەملەكەت جانە قوعام قايراتكەرى ورالباي ابدىكارىم ۇلى اعامىز: «ءبىزدىڭ باتىرىمىز توقتار اۋباكىروۆ قانداي كىتاپقا كەيىپكەر بولۋعا دا لايىق تۇلعا. راس، ءومىر وتكەلدەرىندە حالىق قاھارمانىنىڭ تاعدىرى ساياسي تارتىسقا دا ءتۇستى. زاردابىن دا تارتتى. ول دا تاريح، ول دا شەجىرە اراسىندا قۇجاتتالۋدان تىس قالماۋعا ءتيىس. كىتاپ اۆتورى تالعات باۋىرىمنان بىلگىم كەلەتىنى، توقاڭا قاتىستى سول جاعداياتتار تۋرالى اقيقاتتار شىعارمادا ورىن الدى ما ەكەن؟» دەدى. «ءيا، ونداي تۇستار بار...» ابىز اقساقال كىتاپ اۆتورىنا تاڭدانعانداي كوز قىرىن سالدى. ماقۇلداعانى عوي دەپ توپشىلادىم دا:
- ارينە، كىتاپتا ونىڭ بارلىعى توقتار وڭعارباي ۇلىنىڭ ءوز رۇقساتىمەن عانا قاتتالعان دەرەكتەر مەن دايەكتەر، - دەدىم.
شۋاقتى كەزدەسۋدىڭ اياقتالار ءساتى - الەمدە داڭقى اسقان تەڭدەسسىز اسكەري سىناقشى- ۇشقىشپەن، قازاقتىڭ تۇڭعىش عارىشكەرىمەن، كەڭەس وداعىنىڭ باتىرىمەن، قازاقستاننىڭ حالىق قاھارمانىمەن، اسكەري اۆياتسيانىڭ اكادەميگىمەن سۋرەتكە ءتۇسۋدىڭ ءوزى، شىركىن، سالتانات قوي! جاسانىپ كيىنگەن ارىپتەس قىزدارىمىز بەن جىگىتتەرىمىز باتىرىمىزدى ورتاعا الىپ، جۇزدەرى گۇل-گۇل جاينادى، مارە-سارە بولدى.
...ەرلاننىڭ ءبارىمىزدى قىران-توپان كۇلكىگە قارىق قىلعان اڭگىمەسى بۇگىنگى تاماشا كەزدەسۋدىڭ قورىتىندى نۇكتەسىن قويدى.
- نازەركە (جۇماباي) ەكەۋمىز سۇحبات الۋدىڭ جايىمەن بىردە توقتار اعامنىڭ ۇيىنە باردىق، - دەدى ول. - سۇحبات ءبىتتى. مەن اعامىزدىڭ بەينەسىن سان قىرىنان سۋرەتكە ءتۇسىرۋدىڭ اۋرەسىمەن الەكپىن. جازۋ ۇستەلىندە باۋىرجان مومىش ۇلى اتامىزدىڭ بيۋستى تۇردى. توقتار اعام كرەسلوسىندا تاپجىلماي وتىرعان. تاماشا راكۋرستى بايقاپ قالدىم دا، قارسى بەتكە ۇمتىلدىم...
عارىشكەردىڭ جۇمىس بولمەسى - قاراعايدان قيىستىرىپ سالىنعان وتە ۇلكەن، جەكە دارا تۇرعان ءزاۋلىم عيمارات. بولمەنىڭ بەلورتا تۇسىندا قابىرعاعا تاياۋ قويىلعان كومپيۋتەرى شەتكەرىرەك تۇراتىن باتىردىڭ ەكى شىنتاعىنا لايىقتالعان كەڭ جازۋ ۇستەلى، ونداعى كولەمى باتىردىڭ قوس جۇدىرىعىنداي قولادان قۇيىلعان باۋكەڭنىڭ بيۋستى كوز الدىما ەلەستەي
كەتتى.
- الگى تاماشا راكۋرستى قالت جىبەرمەۋ ويىمەن باۋكەڭنىڭ ءمۇسىنىن وڭ قاناتقا ءسال عانا جىلجىتپاق نيەتپەن ۇستاعانىم سول، گەنەرال:
- تيىسپە وعان!.. - دەپ گۇر ەتە قالعاندا قولىمداعى فوتواپپارات پەن بيۋست ەدەنگە توپ ەتىپ ءتۇسىپ كەتە جازادى. قاتتى ساستىم...
- قاجەت بولسا ايت، مەن ورىن اۋىستىرىپ وتىرايىن، - دەدى. سول داۋىس!
سوندا عانا «ءۇھ» دەپ دەم الدىم-اۋ دەيمىن. قىپ-قىزىل بوپ كەتكەم. قاراسام، اعام جىميىپ، تۇك بولماعانداي مەنەن ەكى كوزىن ايىرماي وڭتايلى وتىرىپتى.
رەداكسيا ءدالىزىن كۇلكىگە كومىپ، اڭىز-ادامنىڭ تاڭعاجايىپ بولمىسىن جارىسا اڭگىمەلەپ، كوپكە دەيىن دۋىلداستىق-اي!
...بۇل كەزدە موتورىنىڭ قۋات كولەمى 8 مىڭ تەكشە مەترلىك، تىنىسى كەڭ، قاجەت كەزدە ءتورت دوڭعالاعى كەزەكتەسىپ جۇلقي تارتاتىن اعىلشىندىق قاراگەر «لەند روۆەرىن» تاقتايداي جولدا تايپالتىپ، توقتار اعامىز «ءۇش ايۋداعى» مەكەنجايىنا ىزعىتىپ كەتىپ بارا جاتقان... ادەتتەگىدەي، دىبىستان جىلدام كانىگى اسكەري ۇشاعىنا جايلى جايعاسقانداي-اق، سابىرلى، ساليقالى جۇزبەن بۇگىنگى كەزدەسۋدەن العان جىلى اسەرى - «امۋر جولبارىسى» تۋرالى باسىلىمدار باسشىسىنىڭ تەڭەۋى، ەسىنە ءتۇسىپ، جىميىپ قانا وتىرعانى داۋسىز.
تالعات ءسۇيىنباي،
«Egemen Qazaqstan» گازەتىنىڭ ارداگەر-جۋرناليسى
الماتى
