سەرىك ساپيەۆ جاڭا قىزمەتىنە كىرىستى

قاراعاندى. KAZINFORM - اتاقتى بوكسشى، وليمپيادا چەمپيونى جانە ۆەل باركەر كۋبوگىنىڭ يەگەرى سەرىك ساپيەۆ قاراعاندى وبلىسىنىڭ دەنە شىنىقتىرۋ جانە سپورت باسقارماسى باسشىسىنىڭ مىندەتتەرىن ورىنداۋعا كىرىستى، دەپ حابارلايدى Kazinform اگەنتتىگىنىڭ ءتىلشىسى.

ونىڭ كانديداتۋراسىن ق ر تۋريزم جانە سپورت مينيسترلىگىندە ارنايى كوميسسيا كەلىسكەننەن كەيىن تاعايىنداۋ تۋرالى وكىمگە ايماق باسشىسى ەرماعانبەت بولەكپايەۆ قول قويدى.

جاڭا باسشىنى سپورت قوعامداستىعىنا وبلىس اكىمىنىڭ ورىنباسارى وراز تاۋىربەكوۆ تانىستىردى.

- مەملەكەتتىك قىزمەت ىستەرى اگەنتتىگىنىڭ جانە تۋريزم جانە سپورت مينيسترلىگىنىڭ كەلىسىمى بويىنشا سەرىك جۇمانعالي ۇلى ساپيەۆ قاراعاندى وبلىسىنىڭ دەنە شىنىقتىرۋ جانە سپورت باسقارماسىنىڭ باسشىسى بولىپ كونكۋرستان تىس تاعايىندالدى. ونىڭ تاجىريبەلىك داعدىلارى مەن ءبىلىمى جاڭا لاۋازىمداعى الەۋەتىن اشۋعا كومەكتەسەدى دەپ سەنەمىز، - دەدى وراز تاۋىربەكوۆ.

وبلىس اكىمىنىڭ ورىنباسارى باسقارمانىڭ بۇرىنعى باسشىسى تەمىرحان ابىلايەۆقا اتقارىلعان جۇمىستارى ءۇشىن العىسىن ءبىلدىردى.

سەرىك ساپيەۆ وعان سەنىم ارتقانى ءۇشىن العىسىن ءبىلدىرىپ، وبلىستا سپورتتى دامىتۋعا بار كۇش-جىگەرىن سالاتىنىن جەتكىزدى.

- مەملەكەت باسشىسى ايتقانداي، بيلىكتىڭ ۆەرتيكالى قۇرىلۋى ءتيىس. الدا نازار اۋدارۋدى قاجەت ەتەتىن سپورت تۇرلەرى ەسكەرىلەتىن جاڭا زاڭ قابىلدانادى. قاراعاندى سپورتىنىڭ تاريحى كەڭ، ءارى داڭقى زور. جەتەكشى پوزيتسيامىزدى قايتارۋ كەرەك. مەنىڭ ءوز جوسپارلارىم، يدەيالارىم بار. تۋعان جەرىمدى سپورتقا بەيىم ەتكىم كەلەدى. الدىمەن مەن بارلىق ۆەدومستۆولىق باعىنىستى ۇيىمداردى تىڭداپ، ولارمەن كەزدەسپەكشىمىن. سودان سوڭ ايماقتاردى ارالايمىن. كەزدەسۋ قورىتىندىسى بويىنشا شەشىم قابىلدايمىز، - دەدى سەرىك ساپيەۆ.

سەرىك ساپيەۆتىڭ بىرنەشە بىلىكتىلىك بويىنشا جوعارى ءبىلىمى بار: «دەنە شىنىقتىرۋ پەداگوگى»، «قۇقىقتانۋ»، «مەملەكەتتىك جانە جەرگىلىكتى باسقارۋ»، «سپورت مەنەدجمەنتى» ماماندىعى بويىنشا «بولاشاق» حالىقارالىق باعدارلاماسىنىڭ ستيپەندياتى.

ەڭبەك جولىن قازاقستان بوكس فەدەراتسياسىندا باستادى: جاتتىقتىرۋشى-وقىتۋشى، كەيىن سپورت ديرەكتورى بولدى.

«Astana Arlans» كاسىبي سپورت كلۋبىن باسقاردى.

2017 -جىلى ق ر پارلامەنتى ءماجىلىسىنىڭ دەپۋتاتى بولىپ سايلاندى.

2019 -جىلدىڭ قاڭتارىندا مەملەكەتتىك قىزمەتكە اۋىستى - ءۇش جىلعا جۋىق ق ر مادەنيەت جانە سپورت مينيسترلىگىنىڭ سپورت جانە دەنە شىنىقتىرۋ ىستەرى كوميتەتىن باسقاردى.

سودان كەيىن ق ر ۇلتتىق وليمپيادا كوميتەتى باس حاتشىسىنىڭ ورىنباسارى قىزمەتىن اتقاردى.

2022 -جىلدىڭ ساۋىرىنەن باستاپ وسى تاعايىنداۋعا دەيىن «MTEX management» ج ش س سپورتتى دامىتۋ جونىندەگى باسقارۋشى ديرەكتورى بولىپ جۇمىس ىستەدى، ق ر ۇلتتىق وليمپيادا كوميتەتىنىڭ ۆيتسە-پرەزيدەنتى بولىپ تابىلادى.

ەستەرىڭىزگە سالا كەتەيىك، استانادا ق ر تۋريزم جانە سپورت ءمينيسترى ەربول مىرزابوسىنوۆتىڭ توراعالىعىمەن وڭىرلىك سپورت باسقارمالارىنىڭ باسشىلارىن تاعايىنداۋ جونىندەگى كوميسسيانىڭ وتىرىسى ءوتتى. وندا سەرىك ساپيەۆتىڭ قاراعاندى وبلىسى دەنە شىنىقتىرۋ جانە سپورت باسقارماسىنىڭ باسشىسى لاۋازىمىنا كانديداتۋراسى قارالدى.

اۆتور
ايزادا اگيلبايەۆا