سەرىك جۇمانعارين ازىق-تۇلىك باعاسىنا قاتىستى تۇسىنىك بەردى
استانا. KAZINFORM - قازاقستاندا وندىرىلەتىن ازىق-تۇلىككە ۆاليۋتا باعامىنىڭ وزگەرۋى اسەر ەتپەۋى ءتيىس. بۇل تۋرالى ۇكىمەت باسشىسىنىڭ ورىنباسارى سەرىك جۇمانعارين ايتتى.
بۇگىن پارلامەنت ماجىلىسىندە تىلشىلەر تاياۋدا دۇكەن سورەلەرىندە ازىق-تۇلىكتىڭ قىمباتتاۋى مۇمكىندىگىنە قاتىستى سۇراق قويدى.
ءوز كەزەگىندە س. جۇمانعارين ازىق-تۇلىكتىڭ ايتارلىقتاي قىمباتتامايتىنىن ايتتى.
- جاڭاجىلدىق مەرەكە قارساڭىندا قانداي دا ءبىر دۇربەلەڭ بولۋى مۇمكىن. ءداستۇرلى تۇردە جىل اياعىندا سۇرانىستىڭ تىم جوعارى بولۋى سالدارىنان باعانى كوتەرىپ جاتادى. ياعني تۇرعىندار وسى ۋاقىت ارالىعىندا ازىق-تۇلىك پەن تاۋارلاردى بىردەن كوپ كولەمدە ساتىپ الادى. بۇل رەتتە نارىقتا ۇسىنىستان سۇرانىس كولەمى ارتا تۇسەدى دە، باعا وسەدى، - دەدى ۇكىمەت باسشىسىنىڭ ورىنباسارى.
سەرىك جۇمانعارين قىسقا مەرزىمدە دوللار باعامىنىڭ وزگەرۋى ازىق-تۇلىكتىڭ قۇنىنا اسەر ەتپەيتىنىن ايتتى.
- يمپورتتالاتىن ونىمدەردىڭ كەيبىر قىمبات سەگمەنتتەرىندە باعا ءوسۋى ىقتيمال. ماسەلەن، فرانسياداعى فۋا-گرانى الساڭىز، قىمباتقا تۇسەتىنى بەلگىلى. ويتكەنى ءسىز ونى شەتەل ۆاليۋتاسىنا ساتىپ الاسىز. سونداي-اق شەتەلدىك قىمبات شاراپتاردى ساتىپ الاتىندار دا وسىنداي جاعدايعا تاپ بولادى. ال قازاقستاندا وندىرىلەتىن قۇس ەتىنە نەمەسە ءوزىمىزدىڭ نانعا دوللاردىڭ قانداي قاتىسى بار؟، - دەدى پرەمەر-ءمينيستردىڭ ورىنباسارى.
بۇعان دەيىن پرەمەر-ءمينيستردىڭ ورىنباسارى سەرىك جۇمانعارين ءبىرىڭعاي ۋاقىت بەلدەۋىنىڭ ادامدارعا اسەرىن زەرتتەۋ ماسەلەسىنە قاتىستى پىكىر ايتتى.
