سۋردليمپياداعا قازاقستاننان 26 سپورتشى اتتانادى

الماتى. KAZINFORM - قىسقى سۋردليمپيادا ويىندارىنا قاتىساتىن ۇلتتىق قۇراما تۇركياعا 29 اقپان كۇنى اتتانادى. سپورتشىلار تاۋ شاڭعىسى، سنوۋبورد، شاڭعى جارىسى، شاحمات، فۋتزال، كەرلينگ بويىنشا سايىسقا تۇسەدى.

XX قىسقى سۋردليمپيادا ويىندارى 2-12- ناۋرىز ارالىعىندا تۇركيانىڭ ەرزۋرۋم قالاسىندا وتەدى.

ءدۇبىرلى دوداعا 36 مەملەكەتتەن 1000 عا جۋىق سپورتشى قاتىسادى.

جارىستا تاۋ شاڭعىسى، سنوۋبورد، شاڭعى جارىسى، شاحمات، فۋتزال جانە كەرلينگ سپورت تۇرلەرىنەن 34 كومپلەكت مەدال ويناتىلادى.

قازاقستان تاراپىنان وسى قىسقى ويىندارعا شاحمات، سنوۋبورد جانە شاڭعى جارىسىنان 26 سپورتشى قاتىسادى.

قازاقستاندىق سپورتشىلارعا دەنە مۇمكىندىكتەرى شەكتەۋلى تۇلعالارعا ارنالعان سپورتتىق دايارلاۋ ورتالىعى ديرەكتورىنىڭ مىندەتىن اتقارۋشى ەرجان ەسىمحان ۇلى ساتتىلىك تىلەدى.

«كوك بايراعىمىزدى جەلبىرەتىپ، حالىقارالىق جارىستا ونەر كورسەتۋ - ءار سپورتشى ءۇشىن تەڭدەسى جوق مۇمكىندىك. وسى ساتكە جەتۋ ءۇشىن سىزدەر كوپ ەڭبەك ەتىپ، تالاي بەلەستى باعىندىردىڭىزدار. جارىسقا دايىندالۋ ماقساتىندا 6 رەسپۋبليكالىق جارىستان جانە 9 وقۋ-جاتتىعۋ جيىندارىن وتتىڭىزدەر. ەندىگى جارىستا لايىقتى ونەر كورسەتىپ، ءوز بىلىكتىلىكتەرىندى بارىنشا كورسەتۋ ءوز قولدارىڭىزدا. ءبىز سىزدەرگە سەنەمىز»، - دەدى ەرجان ەسىمحان ۇلى.