سەربيا پرەزيدەنتى الماتىنىڭ ايگىلى اپورتىن سىيعا الدى
استانا. KAZINFORM - سەربيا پرەزيدەنتى الەكساندر ۆۋچيچ بەلگرادقا رەسمي ساپارمەن كەلگەن قاسىم-جومارت توقايەۆتى ىقىلاسپەن كۇتىپ العانىن جازدى، دەپ حابارلايدى اقوردا.
«سەربيا پرەزيدەنتى الەۋمەتتىك جەلىلەردەگى پاراقشالارىندا مەملەكەت باسشىسى قاسىم-جومارت توقايەۆتىڭ قۇرمەتىنە كەشكى اس بەرىلگەنىن جانە الماتىنىڭ ايگىلى اپورتىن سىيعا العانىن جاريالادى. سونداي-اق سەربيانىڭ دوستاس ەلدەرگە قۇشاعى ءاردايىم اشىق ءارى بۇگىنگى كەش سونىڭ تاعى ءبىر دالەلى ەكەنىن اتاپ ءوتتى»، - دەلىنگەن اقوردا تاراتقان حابارلامادا.
ەسكە سالساق، كەشە قاسىم-جومارت توقايەۆتى بەلگراد اۋەجايىندا سەربيا پرەزيدەنتى الەكساندر ۆۋچيچ قارسى الدى.
قازاقستان پرەزيدەنتىنىڭ بورتىن سەربيا اسپانىندا وسى ەلدىڭ اسكەري اۋە كۇشتەرىنىڭ ۇشاقتارى الىپ ءجۇردى.
مەملەكەتتەر باسشىلارى ەكى ەلدىڭ ساياسي، ساۋدا- ەكونوميكا، كولىك- لوگيستيكا جانە مادەني-گۋمانيتارلىق سالالارداعى ءوزارا ىنتىماقتاستىعىنىڭ پەرسپەكتيۆالارىن تالقىلايدى.
