«سۋپەر قىز: الەمگە ايگىلى ايەلدەر» كىتابى جارىق كوردى
استانا. KAZINFORM - استانادا «Super قىز: الەمگە ايگىلى ايەلدەر» اتتى كىتابىنىڭ تۇساۋكەسەرى ءوتتى. بۇل - قازاقستاننىڭ كورنەكتى قىز-كەلىنشەكتەرى جايلى ادەبي تىلمەن باياندايتىن ەل تاريحىنداعى العاشقى كىتاپ.
«Super قىز. الەمگە ايگىلى ايەلدەر» - بۇل ءارتۇرلى سالالاردا تابىسقا قول جەتكىزگەن قازاقستاننىڭ ايگىلى ايەلدەرى تۋرالى 70 اڭگىمە. كىتاپ كورنەكتى زامانداس ايەلدەرمەن، سونداي-اق جاڭا، اسا تانىلا قويماعان قازاقستاننىڭ ايتۋعا تۇرارلىق ايەل ازاماتتارىمەن دە تانىستىرادى.
كىتاپ قاھارماندارى قاتارىندا: كاسكادەر ءاليا ىسقاقوۆا، ونەرتاپقىش ياروسلاۆا كراۆچۋك، شىعارماشىلىق ستراتەگ ايشا شاياحمەتوۆا، كاسىپكەر ءارى مەتسەنات گاۋھار قاپپاروۆا، پروديۋسەر بايان الاگوزوۆا، سۋرەتشى جانە مودەل ايا شالقار، ءانشى روزا رىمبايەۆا، بوكسشى فيرۋزا ءشارىپوۆا، ارفاشى ماعرۋفا مۇقاجانوۆا، مادەنيەتتانۋشى، جازۋشى زيرا ناۋرىزباي جانە تاعى باسقالارى. سونىمەن قاتار كىتاپتا ەسىمى ب ۇ ۇ-نىڭ «عالامشاردىڭ كورنەكتى ايەلدەرى» كىتابىنا ەنگەن العاشقى قازاق ايەلى تۋرالى، لا-مانش بۇعازىن ءجۇزىپ وتكەن العاشقى قازاق ايەلى تۋرالى، قازاقستاننىڭ اسكەري- تەڭىز كۇشتەرىندە قىزمەت ەتەتىن العاشقى ايەل تۋرالى، «الەم شىڭى» ەۆەرەستى باعىندىرعان العاشقى قازاقستاندىق ايەل تۋرالى جانە باسقا دا اڭگىمەلەر جارىق كورگەن.
كىتاپ اۆتورى - ءۇش قىزدىڭ اناسى، كوۋچ، كاسىپكەر، «بولاشاق» قورىنىڭ قامقورشىلىق كەڭەسىنىڭ ءتورايىمى دينارا گاپلان. كىتاپ ەۋرازيا بانكىنىڭ، مەتسەنات گاۋھار قاپپاروۆانىڭ قولداۋىمەن جارىق كوردى، سەرىكتەستەرى: «Arizar» دۇكەنى، «Weproject.media» مەديا- باسلىمى، «العا كازاحستان» جوباسىنىڭ جۇرگىزۋشىسى يۆان چەرۆينسكي.
«Super قىز. الەمگە ايگىلى ايەلدەر» كىتابىنىڭ ماقساتى - قىز بالالاردى ءوزىن-ءوزى جەتىلدىرۋگە، لايىقتى ءبىلىم الۋعا، الدىنا ۇلكەن ماقسات قويىپ، وعان باتىلدىقپەن قول جەتكىزۋگە شابىتتاندىرۋ. تاعدىردىڭ سىنىنا توتەپ بەرۋ، تاۋەلسىزدىك پەن وي ەركىندىگى، ماقساتكەرلىك، ەرىك- جىگەر، ءبىلىم مەن بىلىكتى جەتىلدىرۋ، ادامدارعا دەگەن سۇيىسپەنشىلىك پەن سەنىم كىتاپتىڭ ارقاۋى بولدى.
فورماتى بويىنشا كىتاپ 6+ بالالارعا ارنالعان، الەمنىڭ تۇكپىر-تۇكپىرىندەگى سۋرەتشىلەر سالعان ءتۇرلى ءتۇستى يلليۋستراتسيالارى بار. كىتاپقا 50 يلليۋستراتور، جازۋشىلار، ديزاينەرلەر، رەداكتورلار، اۋدارماشىلار، بەتتەۋشىلەر بار ەڭبەگىن سالعان. كىتاپ قازاق جانە ورىس تىلدەرىندە جارىق كوردى. سونىمەن قاتار كىتاپتا ەموتسيونالدى ينتەللەكتتى دامىتۋ بويىنشا 2 تەراپيالىق بلوك بار، ولار وقىرماندارعا ءوز ەموتسيالارىن تۇسىنۋگە، ولارمەن جۇمىس ىستەۋگە كومەكتەسەدى. مۇنداي قۇرالدار اسىرەسە جاس ءوسپىرىم بالالارعا پايدالى بولادى.
«گەندەرلىك الشاقتىق يندەكسىنىڭ» (Global Gender Gap Index) سوڭعى رەيتينگىنە سايكەس قازاقستان 146 ەلدىڭ اراسىندا 62-ورىندا. قازاقستاندا ءارتۇرلى كومپانيالاردىڭ ديرەكتورلار كەڭەسىنىڭ قۇرامىنا ايەلدەردىڭ %10 عانا كىرەدى. ال شوب دەڭگەيىندە ايەلدەر كومپانيالاردىڭ %45 دان استامىن باسشى نەمەسە مەنشىك يەسى رەتىندە باسقارادى.
رەسمي ستاتيستيكا بويىنشا 2022 -جىلى جالاقىداعى گەندەرلىك ايىرماشىلىق %18,5 قۇرادى. سوتسيولوگيالىق زەرتتەۋلەر كورسەتكەندەي، ايەلدەردىڭ قوعامداعى ءرولى مەن ورنى تۋرالى ءداستۇرلى تاپتاۋرىنداردىڭ كەڭ ەتەك الۋى ايەلدەر مەن ەرلەر اراسىنداعى تەڭدىككە قول جەتكىزۋگە باستى كەدەرگى بولىپ تابىلادى.
- «Super قىز» كىتابىنىڭ ماقساتى - قىزدارعا، بويجەتكەندەرگە، ايەلدەرگە ءوز جولىن تاۋىپ، سونى ۇستانۋعا كومەكتەسۋ. جولدى تابۋ ءۇشىن باتىل بولۋ كەرەك. سوندىقتان بۇل كىتاپ باتىلدارعا ارنالعان. ەگەر ءسىز قىزىڭىزدىڭ، ءسىڭلىڭىز، قۇربىلارىڭ شابىتتانىپ، وزىنە سەنىمدى بولعانىن قالاساڭىز، ولارعا قولداۋ بولاتىن جاڭا «Super قىز» كىتابىن سىيعا تارتىڭىز.
ءبىزدى ءوزىمىزدى، ءوز جولىمىزدى، ءوز تىرەگىمىزدى سەزىنۋگە ۇيرەتكەن جوق. وزىڭىزگە اپاراتىن جول بىردەن بولا قويمايدى، ال باتىلدىق ءوز قورقىنىشىڭىزعا بوي الدىرۋدا. بۇل كىتاپ وزىڭە اپاراتىن جولدىڭ ءارتۇرلى بولۋى مۇمكىن ەكەنىن، ايەلدەردىڭ ءارتۇرلى ماماندىقتارعا قابىلەتتى ەكەنىن كورسەتەدى. ءۇش قىزدىڭ اناسى رەتىندە مەن قىزداردىڭ ءوسىپ كەلە جاتقان بۋىنى، ەڭ الدىمەن، وزىنە دەگەن قۇرمەت سەزىمىمەن، ءوزىن قۇنسىزداندىرمايتىن سەزىممەن، وزىنە دەگەن تەرەڭ سەنىمى بار، اياعىن نىق باسقان قىز بولىپ وسكەنىن قالايمىن. مەن كىتاپتى جاساۋعا كومەكتەسكەن، قولداعان جانە قاتىسقانداردىڭ بارلىعىنا: جازۋشىلارعا، قاھارماندارعا، يلليۋستراتورلارعا، رەداكتورلارعا جانە ارينە، دەمەۋشىلەر مەن سەرىكتەستەرگە العىس ايتامىن»، - دەدى كىتاپ اۆتورى دينارا گاپلان.
«بۇگىنگى تاڭدا قوعامدا ءبىزدىڭ باستى قۇندىلىقتارىمىزبەن بىرگە قازىرگى الەمدەگى ايەلدىڭ مۇمكىندىكتەرى مەن ءرولىن كەڭەيتۋ اراسىنداعى تەپە-تەڭدىكتى ساقتاۋ وتە ماڭىزدى. بۇل كىتاپ ايەلدەردىڭ وسى نازىك تەپە-تەڭدىكتى ساقتاي وتىرا جاڭا رولدەرگە تالانتتى تۇردە بەيىمدەلە الاتىنىنىڭ دالەلى بولىپ كەلەدى. مەنىڭ ءۇش قىزىم بار جانە مەن ولاردىڭ جەكە دامۋعا دەگەن ۇمتىلىسىن، ارمانداۋعا جانە ارەكەت ەتۋگە باتىلدىعىن وياتۋ قانشالىقتى ماڭىزدى ەكەنىن تۇسىنەمىن. ءبىزدىڭ سۋپەر ايەلدەردىڭ كەرەمەت جەتىستىكتەرى جارقىن، ينكليۋزيۆتى بولاشاققا جول اشادى. ءبىز ەلدىڭ كورنەكتى ايەلدەرى تۋرالى super قىز كىتابىنىڭ ەكىنشى باسىلىمىن قولداعانىمىزعا قۋانىشتىمىز»، - دەپ ءبولىستى ەۋرازيالىق بانكتىڭ باسقارما ءتوراعاسى ءلاززات ساتيەۆا.
كىتاپتىڭ تۇساۋكەسەرىنە جوبا جاساۋشىلارى، يلليۋستراتورلار، بلوگەرلەر، سونىمەن قاتار كىتاپتىڭ قاھارماندارى، ونىڭ ىشىندە گاۋھار قاپپاروۆا، فيرۋزا ءشارىپوۆا، ماعرۋفا مۇقاجانوۆا، زيرا ناۋرىزباي جانە باسقالارى قاتىستى. تۇساۋكەسەرگە قاتىسۋشىلار بۇل كىتاپتىڭ قازىرگى قازاقستان ءۇشىن ماڭىزدىلىعىن اتاپ ءوتتى، ال كىتاپ قاھارمانى زيرا ناۋرىزباي ءداستۇرلى تۇركى قوعامىنداعى ايەلدىڭ ءرولى مەن تۇركى ميفولوگياسىنداعى ايەل بەينەلەرى تۋرالى ايتىپ بەردى.
