سنەجاننا يماشەۆا: زاڭ قازاق تىلىندە جازىلۋى ءتيىس

استانا. KAZINFORM - ءماجىلىستىڭ زاڭناما جانە سوت-قۇقىقتىق رەفورما كوميتەتىنىڭ ءتوراعاسى سنەجاننا يماشەۆا «ۋادە» باعدارلاماسىنا بەرگەن سۇحباتىندا زاڭداردىڭ قازاق تىلىندە جازىلۋ كەرەكتىگىن اتاپ ءوتتى.

ساراپشىلاردىڭ پىكىرىنشە، ورىس تىلىندە جازىلعان زاڭداردىڭ ءتىلى تۇسىنىكتى ءارى ناقتى. ال ءدال سول زاڭداردىڭ قازاق تىلىندەگى اۋدارمالارى سايكەس كەلمەيدى. سوت پروتسەسىندە ماماندار زاڭداردىڭ ورىس جانە قازاق تىلىندەگى نۇسقالارىنىڭ اراسىنداعى سايكەسسىزدىكتەرىن ءجيى بايقالاتىنىن «ۋادە» باعدارلاماسىنىڭ جۇرگىزۋشىسى ەربولات مۇحامەدجان اتاپ ءوتتى.

«زاڭ قازاق تىلىندە جازىلۋى كەرەك. تىكەلەي اۋدارما كەزىندە كەيبىر ماعىنالار جوعالۋى مۇمكىن. سوندىقتان زاڭداردى ەڭ الدىمەن قازاق تىلىندە جازۋ قاجەت، بۇل جاعدايدا قايشىلىقتار تۋىندامايدى. مۇنداي سايكەسسىزدىكتەردى بولدىرماۋ ءۇشىن اۋدارما جاساۋشىلار قازاق ءتىلىن تەرەڭ مەڭگەرۋى ءتيىس. ولارعا قاتىستى تالاپتار قويىلىپ، ەسكەرتۋلەر جاسالدى. ەگەر ساپاسىز اۋدارمالار انىقتالسا، دەپۋتاتتار ءوز پىكىرلەرىن بىلدىرەدى. جالپى، بۇل ماسەلە كوبىنەسە اۋدارماشىلاردىڭ جۇمىسىنا بايلانىستى. ماجىلىسكە زاڭدار ەكى تىلدە ۇسىنىلادى، ەگەر قاتەلىكتەر بايقالسا، ءبىز ساپالى اۋدارىلىپ، جازىلعان نۇسقانى تالاپ ەتەمىز. وكىنىشكە وراي، بۇل پروتسەسس ءالى كۇنگە دەيىن تولىق كولەمدە جۇزەگە اسپاي جاتىر. بۇگىنگى تاڭدا تەك بىرنەشە زاڭ قازاق تىلىندە جازىلدى. مىسالى، تۇركىستان قالاسىنىڭ مارتەبەسى تۋرالى زاڭ جاقىندا قازاق تىلىندە دايىندالدى، كەيىننەن ورىس تىلىنە اۋدارىلدى. زاڭداردىڭ قازاق تىلىندە جازىلۋ پروتسەسسى ەندى باستالىپ جاتىر»، - دەدى سنەجاننا يماشەۆا.

سونىمەن قاتار، ءماجىلىستىڭ زاڭناما جانە سوت-قۇقىقتىق رەفورما كوميتەتىنىڭ ءتوراعاسى قازاقستاندا قازاق تىلىندە جوعارى بىلىكتى ماماندار مەن زاڭگەرلەردىڭ سانى وتە از ەكەندىگىن اتاپ ءوتتى.

اۆتور
اسحات رايقۇل