سەناتورلار وسى اپتادا قانداي زاڭداردى قارايدى
استانا. KAZINFORM - سەنات سپيكەرى ماۋلەن اشىمبايەۆتىڭ توراعالىعىمەن پالاتا بيۋروسىنىڭ وتىرىسى ءوتتى. وندا دەپۋتاتتار وسى اپتاعا جوسپارلانعان ءىس-شارالاردى پىسىقتاپ، 18-ءساۋىر كۇنى وتەتىن سەنات وتىرىسىنىڭ كۇن ءتارتىبىن بەكىتتى.
سوعان سايكەس پالاتانىڭ الداعى وتىرىسىندا ق ر كەيبىر زاڭنامالىق اكتىلەرىنە حالىقتىڭ كوشى-قونى جانە قىلمىستىق-اتقارۋ جۇيەسى سالالارىنداعى زاڭنامانى جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى زاڭ ەكىنشى وقىلىمدا قارالادى.
دەپۋتاتتار باستاماشى بولعان بۇل قۇجات حالىقتىڭ كوشى-قونى جانە قىلمىستىق-اتقارۋ جۇيەسى سالاسىنداعى زاڭنامانى جەتىلدىرۋدى كوزدەيدى.
بۇعان دەيىن ايتىلعانداي، زاڭدا وڭىرلەرگە قونىس اۋدارۋشىلار ءۇشىن جاعداي جاساۋعا، «قانداس» مارتەبەسىن بەرۋ ءراسىمىن جەتىلدىرۋگە ارنالعان وزگەرىستەر جانە تاعى باسقا تۇزەتەلۋەر بار.
سونىمەن قاتار سەناتورلار پالاتا وتىرىسىندا ق ر ۇكىمەتى مەن تۇركيا رەسپۋبليكاسىنىڭ ۇكىمەتى اراسىنداعى حالىقارالىق قۇرامداستىرىلعان جۇك تاسىمالدارى تۋرالى كەلىسىمدى راتيفيكاتسيالاۋ تۋرالى زاڭدى قارايدى.
كەلىسىم كولىكتىڭ ءارتۇرلى تۇرلەرىن پايدالانا وتىرىپ، حالىقارالىق جۇك تاسىمالدارىن جەڭىلدەتۋگە، سونداي-اق، قازاقستان مەن تۇركيا اراسىنداعى ترانزيتتىك-كولىكتىك الەۋەتتى جانە ساۋدا-ەكونوميكالىق قاتىناستاردى دامىتۋعا باعىتتالعان.
الداعى بەيسەنبىدە دەپۋتاتتار قر كەيبىر زاڭنامالىق اكتىلەرىنە عىلىم جانە ءبىلىم بەرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى زاڭدى دا قارايدى.
اتالعان زاڭ عالىمدار ءۇشىن الەۋمەتتىك كەپىلدىكتەردى جاقسارتۋعا جانە عىلىمداعى قارجىلىق رەسۋرستاردى پايدالانۋدى وڭتايلاندىرۋعا ارنالعان.
