سەناتور تالعارداعى جاس ءوسپىرىمنىڭ ءولىمى جايىندا: زاڭدى كۇشەيتۋمەن ماسەلە شەشىلمەيدى

استانا. KAZINFORM - ىشكى ىستەر ءمينيسترىنىڭ بۇرىنعى ءبىرىنشى ورىنباسارى جانە جاقىندا سەناتور بولعان مارات قوجايەۆ تالعار اۋدانىندا جاس ءوسپىرىمنىڭ ولىمىنەن كەيىن زاڭنامانى كۇشەيتۋگە قاتىستى سۇراققا جاۋاپ بەردى.

«ءبىزدىڭ زاڭدار جەتكىلىكتى دەڭگەيدە قاتال ەكەنىن ايتا الامىن. ال قوعامداعى قاتىگەزدىك نەمەسە زورلىق-زومبىلىق ماسەلەسىن تەك زاڭنامانى قاتايتۋ ارقىلى شەشۋ ناتيجەلى بولادى دەپ ايتۋ قيىن. شىن مانىندە، بۇل تۇرعىدا الەۋمەتتىك ماسەلەلەردى تۇتاس قاراستىرۋ كەرەك. تاربيەدەن، العان بىلىمنەن باستاپ قامتىپ، ادامنىڭ وسكەن ورتاسىنا نازار اۋدارۋ قاجەت»، - دەدى م. قوجايەۆ سەناتتىڭ جالپى وتىرىسىنان كەيىن تىلشىلەر سۇراعىنا جاۋاپ بەرە وتىرىپ.

ونىڭ ايتۋىنشا، كورشىلەس قىتايدىڭ كەيبىر زاڭدارى قازاقستانعا قاراعاندا وتە قاتال.

«ولاردا كەيبىر قىلمىستار ءۇشىن اتۋ جازاسى قاراستىرىلعان. دەگەنمەن، قىتايدا بۇل قىلمىستار ءالى دە بولىپ جاتىر»، - دەدى سەناتور.

بۇدان بۇرىن حابارلانعانداي، تاياۋدا پرەزيدەنت جارلىعىمەن مارات قوجايەۆ قازاقستان پارلامەنتى سەناتىنىڭ دەپۋتاتى بولىپ تاعايىندالدى. ول ىشكى ىستەر ءمينيسترىنىڭ ءبىرىنشى ورىنباسارى لاۋازىمىنان بوساتىلدى.

ەسكە سالايىق، بۇعان دەيىن 4-قازان كۇنى تالعار قالاسىنداعى توبەلەستەن جاس ءوسپىرىم قايتىس بولعانىن جازعانبىز.

الماتى وبلىسىنىڭ پوليتسيا دەپارتامەنتى تالعار قالاسىندا 16 جاستاعى جاس ءوپىرىمنىڭ ولىمىنە قاتىسى بار كۇدىكتىلەردىڭ قونايەۆ قالاسىنا جەتكىزىلگەنىن حابارلادى.

ىشكى ىستەر ءمينيسترى تالعارداعى جاس ءوسپىرىمنىڭ ولىمىنە قاتىستى ءىستى باقىلاۋعا الدى.

اۆتور
رۋسلان عابباسوۆ