سەناتور شەتەلدىكتەر اسىراپ العان بالالار تۋرالى تولىق اقپارات بەرۋدى سۇرادى
سەناتور عالياسقار سارىبايەۆ ۇكىمەت باسشىسىنىڭ اتىنا جولداعان دەپۋتاتتىق ساۋالىندا شەتەلدەگى قازاقتاردى قولداۋ تۋرالى ءبىرقاتار ماسەلە كوتەردى، دەپ حابارلايدى قازاقپارات ءتىلشىسى.

سەناتوردىڭ ايتۋىنشا، رەسمي مالىمەتتەرگە سايكەس شەتەلدە 4 ميلليونعا جۋىق، ال بەيرەسمي مالىمەتتەرگە سايكەس 7 ميلليونعا جۋىق قازاق تۇرادى. دەپۋتات ولاردىڭ كوپشىلىگىنىڭ تاريحي وتانىنا ورالۋ نيەتى بار ەكەنىن ايتتى. الايدا، مۇنداي قادام جاساۋعا ولارعا تۇساۋ بولاتىن ءبىرقاتار سەبەپ بار.
«قانداستاردىڭ ەلىمىزگە كوپتەپ كەلە الماۋى سەبەبىنە توقتالساق، باسقا مەملەكەتتەردە وزدەرىنىڭ ۇلتى قازاق ەكەندىگىن دالەلدەي الماي جاتادى. ال ءبىلىم بەرۋ سالاسىنداعى ايىرماشىلىقتار جانە باسقا دا ماسەلەلەر كەلگەندەردىڭ مۇمكىندىگىن شەكتەپ جاتادى»، - دەدى ع. سارىبايەۆ ۇكىمەت باسشىسى ءاليحان سمايىلوۆتىڭ اتىنا جولداعان ساۋالىندا.
سونىمەن قاتار دەپۋتات حالىقتىڭ كوشى-قون ماسەلەلەرىنە قاتىستى قولدانىستاعى نورماتيۆتىك-قۇقىقتىق اكتىلەرگە ءجيى وزگەرىستەر مەن تولىقتىرۋلار ەنگىزىلەتىنىن ايتتى. سەناتور وسىعان بايلانىستى ۇكىمەتتەن كوشى-قون سالاسىندا جۇزەگە اسىپ جاتقان مەملەكەتتىك باعدارلامالار تۋرالى تولىق اقپارات بەرۋدى سۇرادى.
«ق ر سىرتقى ىستەر مينيسترلىگىنىڭ شەتەلدىك ديپلوماتيالىق مەكەمەلەرىندە قۇرىلعان ارنايى كوميسسيالاردىڭ جۇمىستارىن قايتا جانداندىرۋ كەرەك. ءارتۇرلى سەبەپتەرمەن شەتەلدە جۇرگەن وتانداستارىمىزدىڭ قيىن جاعدايلارعا تاپ بولعاندا ولارعا كورسەتىلەتىن كومەكتەردى قايتا زەردەلەۋدى، سونداي-اق 1990-2000-جىلدارى بالا كەزىندە شەتەلدىكتەر اسىراپ العان جەتىم بالالاردىڭ جاعدايى تۋرالى تولىق اقپارات بەرۋدى سۇرايمىن»، - دەدى عالياسقار سارىبايەۆ.