سەناتور التىن ءوندىرۋ سالاسىنداعى زاڭسىزدىقتاردى جاريالادى

التىن وندىرۋشىلەر حيميالىق رەاگەنتتەردى قولدانىپ، ەكوجۇيەنى بۇزدى، زاڭدار مەن ەرەجەلەردى ساقتاماي كەلەدى.

سەناتور دارحان قىدىرالى ءوزىنىڭ دەپۋتاتتىق ساۋالىندا التىن ىزدەۋشىلەردىڭ تابيعاتقا قالاي زيان كەلتىرگەنىن جانە ادامداردىڭ ءومىر ءسۇرۋ جاعدايىن ناشارلاتىپ جاتقانى تۋرالى ماسەلە كوتەردى، دەپ حابارلايدى Kazinform.

دەپۋتات تۇركىستان وبلىسىنىڭ اباي اۋىلىنىڭ 127 تۇرعىنى قول قويعان ۇجىمدىق حات پروبلەمانى كوتەرۋگە سەبەپ بولعانىن اتاپ ءوتتى. ازاماتتاردىڭ وتىنىشىندە 2019-2023 -جىلدار ارالىعىندا كوكبۇلاق كەنتىندەگى قايىرشاقتى وزەنىندە كومپانيالاردىڭ ءبىرى التىن ءوندىرۋ ءۇشىن گەولوگيالىق بارلاۋمەن اينالىسقانى جازىلعان. ولاردىڭ جۇمىسىنان كەيىن وزەن قازىر ەكولوگيالىق اپات جاعدايىنا ۇشىراعان.

سەناتوردىڭ اقپاراتىنا قاراعاندا، ءدال وسى كومپانيا قازىر ۇلكەن جانە كىشى كوكبۇلاق وزەندەرىندە گەولوگيالىق بارلاۋ جۇمىستارىن جۇرگىزۋگە نيەتتەنىپ وتىرعان كورىنەدى. ايماق تۇرعىندارى وسىدان كەيىن دابىل قاعىپ، ەكولوگيالىق اپاتقا قاتىستى جاعداي قايتالانادى دەپ قاۋىپتەنىپ وتىر.

«شىعىس قازاقستان، اقمولا، الماتى، جەتىسۋ، جامبىل وبلىستارىندا وسىنداي جاعدايلاردىڭ بولعانىن باسپا سوزدەن جاقسى بىلەمىز. ماسەلەن، شىعىس قازاقستان وبلىسىندا التىن ىزدەۋشىلەر ق ۇلىنجون وزەنىنىڭ ارناسىن وزگەرتكەن. ليتسەنزيالارىندا كورسەتىلگەن شەكتەۋلەردەن اسىپ كەتكەن نەمەسە ءتىپتى، ارنايى رۇقساتى، بىلىكتى مامانى جوق وڭاي ولجا ىزدەۋشىلەر ەكولوگيالىق تالاپتاردى ەسكەرمەيدى. قازبا بايلىقتارىن بارلاۋدا جاڭا تەحنولوگيالار قولدانىلمايدى. ەسەسىنە، زاڭسىز جەر قويناۋىن وندىرۋشىلەر جابايى جولمەن تاۋ- تاستى تالقانداپ، بۋلدوزەر، گرەيدەرلەرمەن وزەندەردىڭ استاڭ- كەستەڭىن شىعارادى. حالىق سۋ ءىشىپ وتىرعان وزەندەرگە ءتۇرلى حيميالىق رەاگەنتتەر قولدانادى» - دەدى سەناتور.

دارحان قىدىرالى ۇكىمەت پەن باس پروكۋراتۋرا باسشىلارىن جولداۋدا كورسەتىلگەن گەولوگيالىق بارلاۋ جۇمىسىن جۇرگىزۋ جونىندەگى تاپسىرمانىڭ ساپالى ورىندالۋىنا باقىلاۋدى كۇشەيتۋگە شاقىردى.

دەپۋتات سپۋتنيك ارقىلى مونيتورينگ جۇرگىزۋ، مينەرالدى رەسۋرستاردىڭ سيفرلىق كارتاسىن دايىنداۋ سياقتى جاڭا تەحنولوگيالاردى پايدالانۋدى، سالا ماماندارىن ساپالى دايارلاۋ مەن جەر قويناۋىن پايدالانۋشىلاردىڭ قىزمەتىنە باقىلاۋدى كۇشەيتۋدى جانە زاڭدى بۇزعانداردى جازالاۋدى سۇرادى.

اۆتور

رۋسلان عابباسوۆ