سەناتتا عالىمداردى قولداۋدى كۇشەيتۋ تۋرالى زاڭ قارالدى

استانا. KAZINFORM - سەناتتىڭ الەۋمەتتىك-مادەني دامۋ جانە عىلىم كوميتەتىنىڭ دەپۋتاتتارى كەڭەيتىلگەن وتىرىستا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە عىلىم جانە ءبىلىم بەرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭدى تالقىلادى.

پارلامەنت دەپۋتاتتارىنىڭ باستاماسى بويىنشا ازىرلەنگەن زاڭ عىلىمي زەرتتەۋلەردىڭ تيىمدىلىگىن ارتتىرۋعا، عالىمدارعا الەۋمەتتىك كەپىلدىكتەردى جاقسارتۋعا جانە عىلىمداعى قارجى رەسۋرستارىن وڭتايلاندىرۋعا باعىتتالعان. قۇجاتتا ءوڭىردىڭ باسىم باعىتتارى بويىنشا عىلىمي جوبالار مەن باعدارلامالار ۇيىمداستىرۋمەن قوسا جەرگىلىكتى اتقارۋشى ورگاندارعا عىلىم سالاسىنداعى مەملەكەتتىك ساياساتتى ىسكە اسىرۋعا قۇقىق بەرۋ كوزدەلىپ وتىر.

قۇجاتتا جوعارى وقۋ ورىندارى مەن عىلىمي ۇيىمدارداعى پەداگوگتەر مەن عىلىمي قىزمەتكەرلەردىڭ جالاقىسىنا قوسىمشا اقى بەلگىلەۋ جونىندەگى نورمالار كوزدەلگەن. سونداي-اق عىلىمي، عىلىمي-پەداگوگيكالىق جانە عىلىمي-تەحنيكالىق جۇمىستاردى اياقتاۋ ءۇشىن شىعارماشىلىق دەمالىسقا قۇقىق بەرىلەدى. «عىلىمي ەتيكا» ۇعىمى عىلىمي جانە عىلىمي-تەحنيكالىق قىزمەتكە قاتىسۋشىلار ۇستاناتىن قاعيدالار، ەرەجەلەر مەن نورمالاردىڭ جيىنتىعى رەتىندە ەنگىزىلەدى. سونداي-اق عىلىمي ادەپكە ۇلگى قاعيدالار ازىرلەۋ جانە بەكىتۋ جونىندەگى ۋاكىلەتتى ورگاننىڭ قۇزىرەتى بەلگىلەنەدى.

زاڭ جوعارى جانە جوعارى وقۋ ورنىنان كەيىنگى وقۋ ورىندارىنا ءتۇسۋ كەزىندە مەرزىمدى اسكەري قىزمەت وتكەرگەن ازاماتتارعا جەڭىلدىكتەر، سونداي-اق جاتاقحانادان ورىن الۋعا باسىم قۇقىق بەرەدى.

سەناتورلاردىڭ ايتۋىنشا، زاڭنىڭ قابىلدانۋى عىلىمي قىزمەتكەردى الەۋمەتتىك قورعاۋدى ودان ءارى كۇشەيتۋگە، عالىمنىڭ بەدەلى مەن ەڭبەك تيىمدىلىگىن ارتتىرۋعا، سونداي-اق عىلىمنىڭ ەلىمىز ەكونوميكاسىن دامىتۋعا قوسقان ۇلەسىن ارتتىرۋعا ىقپال ەتەتىن بولادى.

كوميتەت مۇشەلەرى تالقىلاۋ قورىتىندىسى بويىنشا زاڭدى پالاتا وتىرىسىندا قاراۋعا جىبەرۋ تۋرالى شەشىم قابىلدادى.