سەنات وقۋشىلارعا ساباق كەزىندە تەلەفون پايدالانۋعا تىيىم سالاتىن زاڭدى ماقۇلدادى
استانا. KAZINFORM - بۇگىن سەناتتىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ءبىلىم بەرۋ، تالىمگەرلىك جانە بالالاردىڭ قاۋىپسىزدىگى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭى ماقۇلداندى.
زاڭ پارلامەنت دەپۋتاتتارىنىڭ باستاماسىمەن ازىرلەندى. قۇجاتتى قابىلداۋداعى نەگىزگى ماقسات - ءبىلىم بەرۋ سالاسىنداعى جانە جەتىم بالالار مەن اتا-اناسىنىڭ قامقورلىعىنسىز قالعان بالالاردىڭ قۇقىقتارىن قورعاۋ سالاسىنداعى ۇلتتىق زاڭنامانى ودان ءارى جەتىلدىرۋ.
«زاڭ جەتىم بالالار ءۇشىن تالىمگەرلىك ينستيتۋتىن ەنگىزۋدى، بالالاردىڭ قاۋىپسىزدىگىن قامتاماسىز ەتۋدى جانە ءبىلىم بەرۋ ۇيىمدارىنىڭ باسقارۋ ەركىندىگىن كەڭەيتۋدى كوزدەيدى. بىرىنشىدەن، جەرگىلىكتى اكىمدىكتەر ءبىلىم بەرۋ ساپاسىن قامتاماسىز ەتۋ بويىنشا ءتيىستى اۋماقتىڭ ءبىلىم بەرۋدى دامىتۋ جوسپارىنىڭ جوباسىن ازىرلەۋ جانە ونى ءماسليحاتتىڭ بەكىتۋىنە ۇسىنۋى ەسكەرىلگەن. سونداي-اق، جەرگىلىكتى اكىمدىكتەر ءتيىستى اۋماقتا ءبىلىم بەرۋ ۇيىمدارىن ماتەريالدىق-تەحنيكالىق قامتاماسىز ەتۋ جونىندە شارالار قابىلداۋىن مىندەتتەيتىن جانە اپاتتىق جاعدايعا جول بەرمەۋى مەن سەيسميكالىق ورنىقتىلىعىن ارتتىرۋ ماقساتىندا ولاردىڭ جاي- كۇيىن باقىلاۋدى بەس جىل سايىن جۇزەگە اسىرۋ تۋرالى نورمالارى ۇسىنىلعان»، - دەدى سەناتور التىنبەك نۋح ۇلى.
بۇدان بولەك، بالالاردىڭ قاۋىپسىزدىگى ءۇشىن تەرەزەلەردى قاۋىپسىزدىك قۇلىپتارىمەن قامتاماسىز ەتۋ مىندەتى تۋرالى نورما ۇسىنىلعان. سونىمەن قاتار، جاڭا ىقشام اۋداندارىندا كوپپاتەرلى تۇرعىن ءۇي سالۋ كەزىندە، قۇرىلىس جوبالاۋ قۇجاتتارىندا الەۋمەتتىك ماڭىزى بار - ءبىلىم بەرۋ جانە دەنساۋلىق ساقتاۋ وبەكتىلەرىنىڭ مىندەتتى تۇردە بولۋىن ەسكەرۋ تۋرالى نورمالار ەنگىزىلگەن. ياعني، دەنساۋلىق ساقتاۋ جانە ءبىلىم بەرۋ وبەكتىلەرىن ورنالاستىرۋ ەسەپكە الىنباسا، وندا بۇل اۋماقتا كوپپاتەرلى تۇرعىن ۇيلەردى سالۋعا تىيىم سالىنادى. جاڭا تالاپ ءۇش اۋىسىمدى مەكتەپتەر ماسەلەسىن شەشۋگە، ساپالى ءبىلىم بەرۋگە جانە تۇرعىندارعا مەديتسينالىق كومەكتى وڭاي ءارى جىلدام الۋعا مۇمكىندىك بەرەدى.
«مۇنىمەن قوسا، ارنايى ءبىلىم بەرۋ ۇيىمدارىنداعى جەتىم بالالاردىڭ، اتا- اناسىنىڭ قامقورلىعىنسىز قالعان بالالاردىڭ ءوز بەتىنشە ءومىر سۇرۋگە دايىندالۋىنا جەكە قولداۋ مەن كومەكتەسۋگە باعىتتالعان تالىمگەرلىك قىزمەتىن ەنگىزۋ قارالىپ وتىر. اتالعان نورمانى قابىلداۋ - بالالاردى تولىققاندى الەۋمەتتەندىرۋگە، پسيحولوگيالىق قولداۋعا جانە الەۋمەتتىك قورعاۋعا ىقپال ەتەدى»، - دەدى دەپۋتات.
ونىڭ سوزىنە قاراعاندا، وقۋ پروتسەسىندە ۇيالى تەلەفونداردى پايدالانۋعا شەكتەۋ قويۋدى ەنگىزۋ، تەستىلەۋسىز ءبىرىنشى سىنىپقا قابىلداۋ، بالاباقشالارعا ورىن بەرۋ بويىنشا ءبىرىڭعاي كەزەكتىلىكتى قامتاماسىز ەتۋ، ءبىلىم بەرۋ ۇيىمدارىندا زورلىق-زومبىلىقتى ناسيحاتتايتىن، ءدىني سيپاتتاعى اقپاراتتىڭ تارالۋىنا جول بەرمەۋ جانە سۋيتسيدكە شاقىرۋدى بولدىرماۋ شارالارىن قابىلداۋدى كوزدەيتىن نورمالار ۇسىنىلعان.
«قورىتا ايتقاندا، زاڭ - ءبىلىم بەرۋ سالاسىنداعى قولدانىستاعى زاڭناماداعى قۇقىقتىق ولقىلىقتاردى جويۋ ماقساتىن كوزدەيدى جانە ەلىمىزدەگى ءبىلىم بەرۋدىڭ ساپاسىن ارتتىرۋ مەن رەتتەۋدىڭ ۇلتتىق جۇيەسىنىڭ تيىمدىلىگىن ودان ءارى كۇشەيتۋگە باعىتتالعان»، - دەدى سەناتور.
اۆتور
رۋسلان عابباسوۆ
