سەنات ترامپتىڭ مەملەكەتتىك شىعىستاردى قىسقارتۋ تۋرالى زاڭىنا داۋىس بەردى

استانا. KAZINFORM – ا ق ش پرەزيدەنتى دونالد ترامپ اكىمشىلىگىنىڭ باستاماسىمەن دايىندالعان مەملەكەتتىك شىعىستاردى قىسقارتۋ تۋرالى زاڭ جوباسىنا ا ق ش كونگرەسىنىڭ سەناتىندا سەنبى كۇنى پروتسەدۋرالىق داۋىس بەرۋ شاراسى ءوتتى، دەپ حابارلايدى ت ا س س.

قۇجاتتى 51 زاڭ شىعارۋشى قولدادى، 49 ادام قارسى داۋىس بەردى. قورىتىندى داۋىس بەرۋ جاقىن كۇندەردە وتەدى. كونگرەستىڭ ەكى پالاتاسىن دا باقىلاپ وتىرعان رەسپۋبليكالىقتار وسىعان دەيىن زاڭ جوباسى 4-شىلدەدەن كەشىكتىرىلمەي ماقۇلدانادى دەپ ەسەپتەپ وتىرعاندارىن مالىمدەگەن بولاتىن.

ترامپ «بىرەگەي، اۋقىمدى، ادەمى زاڭ جوباسى» دەپ اتاعان قۇجات ءبىرقاتار سالادا سالىق پەن مەملەكەتتىك شىعىستاردى ايتارلىقتاي قىسقارتۋدى قاراستىرادى. بۇل رەتتە ول قورعانىس سالاسىنا، ناقتىراق ايتقاندا Golden Dome (التىن كۇمبەز) زىمىرانعا قارسى قورعانىس جۇيەسىنە بولىنەتىن قارجى كولەمىن ارتتىرۋدى كوزدەپ وتىر.

سونىمەن قاتار قۇجاتقا شەكارالىق باقىلاۋدى قاتايتۋدى قاراستىراتىن شارالار كىرگەن، وسى سالاعا دا شىعىنداردى ارتتىرۋ قاراستىرىلعان.

وسىعان دەيىن امەريكا ۇكىمەتىنىڭ جۇمىس تيىمدىلىگىن ارتتىرۋ جونىندەگى ۆەدومستۆونىڭ ۇيلەستىرۋشىسى بولعان امەريكالىق كاسىپكەر يلون ماسك زاڭ جوباسىن بىرنەشە رەت سىناعان بولاتىن. بۇل رەتتە كاسىپكەر قۇجاتتاعى مەلەكەت قارىزىنىڭ ەڭ جوعارى دەڭگەيىن $5 تريلليون- عا جەتكىزۋ تۋرالى تالاپتى سىناعان. قازىرگى تاڭدا ا ق ش- تىڭ مەملەكەتتىك قارىزى $36 تريلليون.

ماۋسىم ايىنىڭ باسىندا اقش كونگرەسىنىڭ بيۋدجەت باسقارماسى باعالاۋ قورىتىندىسىن جاريالادى. وندا زاڭ جوباسىندا قامتىلعان شارالاردى جۇزەگە اسىرۋ الداعى ونجىلدىقتا ا ق ش- تىڭ بيۋجەت دەفيتسيتىن $2,4 تريلليون ارتتىرۋى مۇمكىن ەكەنى كورسەتىلگەن.

اتالعان ەسەپ بويىنشا، الداعى 10 جىلدا بيۋدجەتتىڭ كىرىسى $3,6 تريلليونعا ازايادى، ال شىعىستار $1,2 تريلليونعا كەميدى.

22-مامىر كۇنى كونگرەستىڭ تومەنگى پالاتاسى اتالعان زاڭ جوباسىنا قاتىستى وزدەرىنىڭ نۇسقاسىن ماقۇلدادى.

وسىعان دەيىن قىتايدىڭ ا ق ش- پەن ساۋدا كەلىسىمى جاسالعانىن راستاعانى تۋرالى جازدىق.