سەنات سپيكەرى: جاساندى زەيىندى تەرىس پيعىلدا پايدالانۋ ءدىني قاقتىعىستارعا اكەلۋى مۇمكىن
استانا. KAZINFORM - استانادا ءوتىپ جاتقان الەمدىك جانە ءداستۇرلى دىندەر كوشباسشىلارى سەزى حاتشىلىعىنىڭ 22-وتىرىسىندا سەنات ءتوراعاسى ماۋلەن اشىمبايەۆ جاساندى زەيىننىڭ رۋحاني ديالوگقا اسەرى تۋرالى پىكىر ءبىلدىردى.
«ادامزات الدىندا تۇرعان جانە كوپتەگەن پىكىرتالاس تۋدىرىپ وتىرعان تاعى ءبىر وزەكتى ماسەلە - نەيروندىق جەلىلەر مەن جاساندى ينتەللەكتتىڭ قارقىندى دامۋى. بۇگىنگى تاڭدا تسيفرلىق تەحنولوگيالار پروگرەسكە كەڭ مۇمكىندىكتەر اشىپ جاتىر. ءبىراق، سونىمەن بىرگە، جاڭا قاتەرلەردى تۋىنداتۋى مۇمكىن»، - دەدى سەنات ءتوراعاسى.
ماۋلەن اشىمبايەۆ جاساندى زەيىن جالعان اقپارات تاراتۋدىڭ قۇرالى بولماۋى كەرەكتىگىن اتاپ ءوتتى.
«ساراپشىلاردىڭ پىكىرىنشە، اقپارات سالاسىنداعى باستى قاۋىپتەردىڭ ءبىرى تەرىس پيعىلدى جالعان اقپارات پەن فەيكتىڭ كەڭ تارالۋى بولىپ تۇر. جاساندى ينتەللەكت رەسۋرستارى وسىنداي ماقساتتارعا تارتىلۋى مۇمكىن. بۇل ەتنيكالىق، ءدىني جانە الەۋمەتتىك توپتار اراسىنداعى ءتۇرلى قاقتىعىستارعا اكەلۋى مۇمكىن»، - دەدى ول.
اۆتور
ەسىمجان ناقتىباي
