سەنات قىتايعا اۆتوموبيل جۇك تاسىمالىن دامىتۋعا ارنالعان قۇجاتتى ماقۇلدادى
استانا. KAZINFORM - بۇگىن سەناتتىڭ جالپى وتىرىسىندا «قازاقستان رەسپۋبليكاسىنىڭ ۇكىمەتى مەن قىتاي حالىق رەسپۋبليكاسىنىڭ ۇكىمەتى اراسىنداعى حالىقارالىق اۆتوموبيل تاسىمالدارى تۋرالى كەلىسىمدى راتيفيكاتسيالاۋ تۋرالى» زاڭى ماقۇلداندى.

زاڭ قازاقستان مەن قىتاي اراسىنداعى حالىقارالىق اۆتوموبيل تاسىمالدارى تۋرالى كەلىسىمدى راتيفيكاتسيالاۋعا باعىتتالعان. كەلىسىم 2023-جىلعى 17-مامىردا شيان قالاسىندا جاسالعان.
سەناتتىڭ حالىقارالىق قاتىناستار، قورعانىس جانە قاۋىپسىزدىك كوميتەتىنىڭ مالىمەتىنە قاراعاندا، قۇجاتتىڭ ماقساتى - كەلىسىم تاراپتارىنىڭ اۋماقتارى ارقىلى اۆتوموبيل جۇك تاسىمالدارىن ىلگەرىلەتۋ، اۆتوموبيل كولىگىنىڭ قازىرگى زامانعى جۇيەلەرىن دامىتۋ، اقپاراتتىق تەحنولوگيالاردى ەندىرۋ، سونداي-اق قازاقستان مەن قىتاي اراسىنداعى ترانزيتتىك-كولىكتىك الەۋەتتى جانە ساۋدا-ەكونوميكالىق قاتىناستاردى ودان ءارى دامىتۋ ءۇشىن قولايلى جاعدايلار جاساۋ.
كەلىسىمدە جولاۋشىلار مەن جۇك تاسىمالى ماسەلەلەرى، كولىك قۇرالىنىڭ جۇرۋىنە رۇقسات بەرۋ ءارى ودان بوساتۋ شارتتارى، جۇرگىزۋشىلەر مەن كولىك قۇرالىنا قويىلاتىن تالاپتار، سونداي-اق ساقتاندىرۋ، سالىق سالۋ جانە وتكىزۋ پۋنكتتەرىندە باقىلاۋ ماسەلەلەرى رەگلامەنتتەلگەن.
زاڭ اقپاراتتىق تەحنولوگيالاردى ەندىرۋ، تاسىمالداۋ جاعدايلارىن جەتىلدىرۋ جانە كەلىسىم تاراپتارىنىڭ اۋماقتارى ارقىلى اۆتوموبيل كولىگىمەن جۇكتەردى تاسىمالداۋ كولەمىن ۇلعايتۋ ءۇشىن قولايلى جاعدايلار جاساۋعا مۇمكىندىك بەرەدى.