سەنات قازاقستان مەن قىتاي اراسىندا ازاماتتاردىڭ قۇقىعىن قورعاۋ باعىتىنداعى زاڭدى ماقۇلدادى
استانا. KAZINFORM - بۇگىن سەناتتىڭ جالپى وتىرىسىندا «1993 -جىلعى 14-قاڭتارداعى قازاقستان مەن قىتاي اراسىنداعى ازاماتتىق جانە قىلمىستىق ىستەر بويىنشا قۇقىقتىق كومەك كورسەتۋ تۋرالى شارتقا وزگەرىستەر ەنگىزۋ تۋرالى حاتتامانى راتيفيكاتسيالاۋ تۋرالى» زاڭى ماقۇلداندى.
«زاڭ ارقىلى 1993 -جىلعى 14-قاڭتارداعى قازاقستان رەسپۋبليكاسى مەن قىتاي حالىق رەسپۋبليكاسى اراسىنداعى ازاماتتىق جانە قىلمىستىق ىستەر بويىنشا قۇقىقتىق كومەك كورسەتۋ تۋرالى شارتقا وزگەرىستەر ەنگىزۋ تۋرالى حاتتامانى راتيفيكاتسيالاۋ ەسكەرىلگەن. حاتتاماعا 2023 -جىلعى 17-مامىردا قىتاي حالىق رەسپۋبليكاسىنىڭ شيان قالاسىندا قول قويىلعان. جالپى، حاتتامانىڭ نەگىزگى ماقساتى - ەكى ەل ازاماتتارى مەن زاڭدى تۇلعالارىنىڭ قۇقىقتارىن قورعاۋعا باعىتتالعان ازاماتتىق جانە قىلمىستىق ىستەر بويىنشا قۇقىقتىق كومەك كورسەتۋ سالاسىنداعى ەكىجاقتى ىنتىماقتاستىقتىڭ ءتارتىبىن تاعى ءبىر مارتە ناقتىلاۋ. اتاپ ايتقاندا، حاتتامامەن قۇقىقتىق كومەك كورسەتۋ كەزىندەگى تاراپتاردىڭ قارىم-قاتىناس ءتارتىبىن انىقتايتىن شارتتىڭ 2-بابىنا وزگەرىستەر ەنگىزىلەدى. وزگەرىستەرگە سايكەس، ازاماتتىق جانە قىلمىستىق ىستەر بويىنشا قۇقىقتىق كومەك كورسەتۋ تۋرالى وتىنىشپەن جۇگىنگەن كەزدە، تاراپتاردىڭ ورتالىق مەكەمەلەرىنىڭ قاتارى قازاقستان جاعىنان - قازاقستان رەسپۋبليكاسىنىڭ جوعارعى سوتىمەن، قىتاي حالىق رەسپۋبليكاسى تاراپىنان - مەملەكەتتىڭ جوعارعى حالىق سوتىمەن تولىقتىرىلادى»، - دەدى سەناتور امانگەلدى تولاميسوۆ.
وسىلايشا، حاتتامامەن ءوزارا قارىم-قاتىناس جاسايتىن ورتالىق مەكەمەلەر رەتىندە قازاقستان تاراپىنان جوعارعى سوت، باس پروكۋراتۋرا جانە ادىلەت مينيسترلىگى ايقىندالعان بولسا، قىتاي جاعىنان ادىلەت مينيسترلىگى، جوعارعى حالىق پروكۋراتۋراسى جانە جوعارعى حالىق سوتى بەلگىلەنگەن. سونىمەن قاتار حاتتامامەن شارتتىڭ تاراپتارى ورتالىق مەكەمەلەرى وزگەرگەن جاعدايدا ول تۋرالى ءبىرىن- ءبىرى ديپلوماتيالىق ارنالار ارقىلى جازباشا نىساندا دەرەۋ حاباردار ەتۋگە مىندەتتەلەدى.
شارتقا ەنگىزىلگەن وزگەرىستەر ەكى ەل ازاماتتارى مەن زاڭدى تۇلعالارىنىڭ جەكە جانە مۇلىكتىك قۇقىقتارى مەن زاڭدى مۇددەلەرىن قورعاۋ ماسەلەلەرىن تەزىرەك شەشۋگە ىقپال ەتەدى.
«سونداي-اق، ازاماتتارعا قۇقىقتىق داۋلار مەن باسقا دا قۇقىقتىق ماسەلەلەر تۋىنداعان جاعدايدا قاجەت قۇجاتتاردى راسىمدەۋ مەن باسقا دا قۇقىقتىق كومەك الۋلارىنا نەگىز بولادى. مىسالى، ستاتيستيكاعا توقتالاتىن بولساق، 2022-23 -جىلدارى ارالىعىندا قۇقىقتىق كومەك كورسەتۋ بويىنشا ەكى ەل اراسىندا 76 ءوتىنىش ءتۇسىپ، سۇراۋ جىبەرىلدى. ونىڭ ىشىندە قىتاي تاراپىنان – 10، قازاقستاننان - 66. جالپى، بۇگىنگى تاڭدا قازاقستان الىس جانە جاقىن شەت مەملەكەتتەرىمەن ازاماتتىق جانە قىلمىستىق ىستەر بويىنشا ءوزارا قۇقىقتىق كومەك تۋرالى 17 حالىقارالىق شارتتى راتيفيكاتسيالاعان. اتالعان حالىقارالىق شارتتاردى ىسكە اسىرۋ بارىسىندا تۋىنداعان قاجەتتى وزگەرىستەر ەكى جاقتىڭ كەلىسىمىمەن وسىنداي حاتتامالار ارقىلى ەنگىزىلىپ وتىرادى»، - دەدى دەپۋتات.
اۆتور
رۋسلان عابباسوۆ
