سەنات ءتوراعاسى جاپونيانىڭ قازاقستانداعى ەلشىسىمەن كەزدەستى

استانا. KAZINFORM - پارلامەنت سەناتىنىڭ ءتوراعاسى ماۋلەن اشىمبايەۆ جاپونيانىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى ياسۋماسا يدجيمامەن كەزدەستى. بۇل تۋرالى سەناتتىڭ باسپا ءسوز قىزمەتى ءمالىم ەتتى.

پالاتا سپيكەرى ديپلوماتتى ەلشى بولىپ تاعايىندالۋىمەن قۇتتىقتاي كەلە، جاپونيا قازاقستاننىڭ ازيا-تىنىق مۇحيتى وڭىرىندەگى ماڭىزدى سەرىكتەستەرىنىڭ ءبىرى ەكەنىن اتاپ ءوتتى. بۇگىندە ەكى ەل اراسىندا بارلىق دەڭگەيدە تىعىز ساياسي قارىم-قاتىناس ورنادى. ەكونوميكالىق ءوزارا ءىس-قيمىل دا بەلسەندى دامىپ، ۋاقىت وتكەن سايىن مادەني-گۋمانيتارلىق بايلانىستار نىعايىپ كەلەدى.

سونداي-اق ماۋلەن اشىمبايەۆ جاپونيا پارلامەنتىنىڭ قازاقستانمەن دوستىق ليگاسى قازاقستان-جاپونيا سەرىكتەستىگىن جانداندىرۋعا ەلەۋلى ۇلەس قوسقانىنا نازار اۋداردى جانە ەكى ەلدىڭ پارلامەنتارالىق ىنتىماقتاستىعىن ودان ءارى ارتتىرا ءتۇسۋدىڭ ماڭىزدى ەكەنىن تىلگە تيەك ەتتى.

- ءبىز جاپونيامەن ءداستۇرلى دوستىق قارىم-قاتىناسىمىزدى ءاردايىم جوعارى باعالايمىز. پرەزيدەنتىمىز قاسىم-جومارت كەمەل ۇلى توقايەۆ اتاپ وتكەندەي: «قازاقستان مەن جاپونيانىڭ اراسى الىس بولعانىمەن، دوستىعىمىز بەرىك». ديپلوماتيالىق بايلانىس ورناعالى بەرى ەلدەرىمىز اراسىنداعى ىنتىماقتاستىق كەڭەيتىلگەن ستراتەگيالىق سەرىكتەستىك دەڭگەيىنە جەتتى. ءبىزدىڭ مەملەكەتتەرىمىزدىڭ جاھاندىق جانە وڭىرلىك كۇن تارتىبىندەگى كوپتەگەن ماسەلەلەر بويىنشا ۇستانىمدارى سايكەس كەلەتىنىن ايرىقشا اتاپ وتكەن ءجون. پارلامەنتارالىق ىنتىماقتاستىقتى نىعايتۋعا دا ۇلكەن كوڭىل ءبولىپ وتىرمىز. ءبىز سىزدەردىڭ ەلدەرىڭىزدەگى زاڭ شىعارۋ قىزمەتىنە، ونىڭ ىشىندە الەۋمەتتىك-ەكونوميكالىق جانە يننوۆاتسيالىق دامۋدى قۇقىقتىق تۇرعىدان قامتاماسىز ەتۋ سالاسىنا قاتىستى تاجىريبە الماسۋعا مۇددەلىمىز. الداعى ۋاقىتتا جاپونيالىق ارىپتەستەرىمىزبەن وسى باعىتتا بىرلەسىپ جۇمىس ىستەۋگە دايىنبىز، - دەپ، ماۋلەن اشىمبايەۆ «ورتالىق ازيا +جاپونيا» ديالوگىنىڭ تابىستى قىزمەتى جونىندە ايتتى.

سونىمەن قاتار تاراپتار ساۋدا-ەكونوميكالىق جانە ينۆەستيتسيالىق ىنتىماقتاستىق، ەكولوگيا، سونداي-اق، باسقا دا سالالارداعى بىرلەسكەن باستامالاردى ىسكە اسىرۋ ماسەلەلەرىن تالقىلادى. اتاپ ايتقاندا، ۇلتتىق ەكونوميكانى دەكاربونيزاتسيالاۋدى ودان ءارى ىلگەرىلەتۋ جانە جاسىل ەكونوميكاعا كوشۋ جونىندەگى جوبالارعا ەرەكشە ءمان بەرىلدى.

كەزدەسۋ بارىسىندا سۇحباتتاسۋشىلار قازىرگىدەي زاماناۋي سىن-قاتەرلەر بەلەڭ العان كەزەڭدە رۋحاني ديپلوماتيانى دارىپتەۋدىڭ ماڭىزىنا قاتىستى دا پىكىر الماستى. بۇل رەتتە سەنات ءتوراعاسى بيىلعى قىركۇيەكتە وتەتىن الەمدىك جانە ءداستۇرلى دىندەر كوشباسشىلارىنىڭ VIII سەزىنە دايىندىق بارىسىنا جانە وسى باعىتتاعى باسقا دا ءىس-شارالارعا توقتالدى.

ءوز كەزەگىندە ياسۋماسا يدجيما قازاقستاننىڭ جاپونيامەن ىنتىماقتاستىعىن ودان ءارى نىعايتۋعا جانە ماڭىزدى باستامالاردى بىرلەسىپ ىسكە اسىرۋعا مۇددەلى ەكەنىن جەتكىزدى.

ەسكە سالا كەتەيىك، بۇعان دەيىن ماۋلەن اشىمبايەۆ بيۋدجەتتى شاعىن توپپەن جوسپارلاۋدى قويۋ كەرەك دەگەن ەدى.