سەمەيدە 12 جاستاعى بالانى ساباپ كەتكەن 3 جاسوسپىرىمگە قاتىستى قىلمىستىق ءىس قوزعالدى
سەمەي. KAZINFORM - سەمەي قالاسىندا 3 جاس ءوسپىرىم جەتكىنشەكتى جابىلىپ ساباپ، اۋرۋحاناعا ءتۇسىردى.
بەلگىلى بولعانداي، وقيعا قالاداعى وزەن جاعاسىندا بولعان. بالىق اۋلاپ تۇرعان 12 جاستاعى بالاعا جاسوسپىرىمدەر تيىسە جونەلگەن. ۇشەۋى وعان جابىلىپ، سوققىعا جىققان. سونىڭ سالدارىنان جەتكىنشەككە ورتاشا دارەجەدەگى دەنە جاراقاتى كەلتىرىلدى.
- جابىرلەنۋشى اۋرۋحاناعا جاتقىزىلدى. اتالعان فاكتى بويىنشا ق ك-نىڭ 107-بابى بويىنشا قىلمىستىق ءىس قوزعالدى. 3 بوزبالاعا قاتىستى ماتەريالدار جينالىپ، ولار سەمەي قالاسى اكىمدىگى جانىنداعى كامەلەتكە تولماعاندار ءىسى جونىندەگى كوميسسيانىڭ قاراۋىنا جولدانباق. بۇدان كەيىن جاسوسپىرىمدەر كامەلەتكە تولماعاندار ءىسى جونىندەگى بولىمشە ەسەبىنە الىنىپ، جەكە تاربيە جۇمىستارى جۇرگىزىلەدى، - دەپ حابارلادى اباي وبلىستىق پوليتسيا دەپارتامەنتىنىڭ باسپا ءسوز قىزمەتىنەن.
ءىستىڭ تەرگەلۋ بارىسى دەپارتامەنت باسشىلىعىنىڭ باقىلاۋىنا الىنعان.
اۆتور
تالعاتجان مۇحامەتبەك ۇلى
