«سەمەي ورمانىنداعى» ءورت شالعان اعاشتار ساتىلىپ جاتىر
سەمەي. KAZINFORM - «سەمەي ورمانى» مەملەكەتتىك ورمان تابيعي رەزەرۆاتىندا بىلتىر بولعان ورتتەن جانىپ كەتكەن اعاشتار ساتىلىمعا قويىلدى. قازىر 720 ميلليون تەڭگەنىڭ اعاشى ساتىلىپ كەتكەن.
وتكەن جىلى 8 -ماۋسىمدا سەمەي ورمان رەزەرۆاتىنان شىققان ءورت قازاقستان تاريحىنداعى ەڭ الاپات ورمان ءورتى بولدى.
14 ورمانشى قازا بولىپ، 60 مىڭ گەكتاردان استام جەر جانىپ كەتتى. سونىڭ سالدارىنان كەلتىرىلگەن ماتەريالدىق شىعىن 161555125335 تەڭگەنى قۇراعان. وتكەن ايدا رەداكسيامىزعا سۇحبات بەرگەن اباي وبلىسىنىڭ اكىمى نۇرلان ۇرانحايەۆ اپات قايتالانباس ءۇشىن قانداي جۇمىستار قولعا الىنعانىن ايتىپ بەرگەن ەدى.
«قاراعايلى ورماندى قالپىنا كەلتىرۋ ءۇشىن وبلىس اكىمدىگى جول كارتاسىن ازىرلەدى. قازىر تابيعي رەزەرۆاتتا ورتەنگەن اعاشتاردى كەسۋ، وڭدەۋ جۇمىسى جۇرگىزىلىپ جاتىر. كەسىلگەن اعاشتاردى تەرەڭدەتە وڭدەۋ ءۇشىن زاۋىت قاجەت. سوعان جەكە ينۆەستور قاراستىرىپ جاتىرمىز. ينۆەستيتسيالىق جوبانى جۇزەگە اسىرۋ ءۇشىن «ءوندىرىس» يندۋستريالدى ايماعىنان جەر ءبولىندى»، - دەدى ول.
سونداي- اق «سەمەي ورمانى» مەملەكەتتىك ورمان تابيعي رەزەرۆاتى باس ديرەكتورىنىڭ ورىنباسارى اسەت ساينوۆتان جانىپ كەتكەن اۋماقتا وسى ۋاقىتقا دەيىن قانداي جۇمىستار اتقارىلعانىن سۇراپ كورگەن بولاتىنبىز.
«وت شىرپىعان اۋماقتى اعاش وتىرعىزۋعا دايىنداپ جاتىرمىز. ياعني جانىپ كەتكەن اعاشتاردى كەسۋ، تازالاۋ جۇمىستارى جۇرگىزىلۋدە. ورتەنگەن الاڭدا ورمان ەكپەلەرىن وتىرعىزۋدىڭ جاڭا جۇمىس جوباسى قاراستىرىلدى»، - دەپ جاۋاپ بەردى ول.
ەندى كوپتىڭ كوكەيىندە «ورتەنىپ كەتكەن اعاشتاردى نە ىستەيدى؟» دەگەن سۇراق تۋىندايدى. قازىر سول ءۇشىن مەملەكەتتىك تاپسىرىستار سايتىندا «سەمەي ورمانى» قورىعىندا ورتەنگەن اعاشتار ساتىلىمعا قويىلعان. ول اعاشتار قۇنى 24 ميلليوننان 216 ميلليون تەڭگەگە دەيىنگى سوماداعى 170-كە جۋىق لوتقا ءبولىنىپ شىعارىلعان. 720 ميلليون تەڭگەنىڭ 6 لوتى ساتىلىپ كەتتى. باعاسىنا قاتىستى ايتار بولساق، قاراعايدىڭ تەكشە مەترى - 11 مىڭ تەڭگە. بۇل - ەڭ قىمباتى. قايىڭنىڭ تەكشە مەترى 1900 تەڭگەدەن، ال كوكتەرەكتىكى 1600 تەڭگەگە باعالانعان.
ايتا كەتەيىك، سەمەي ورمانىندا» 2021-2027 -جىلدارى ورمان القابىن كەڭەيتۋدىڭ كەشەندى جوسپارى جاسالعان. بارلىعى 133 ميلليون اعاش وتىرعىزۋ جوسپارلانىپ وتىر. سول ارقىلى ورتەنگەن اعاشتاردىڭ ورنىنا جاڭاسى وتىرعىزىلادى.
سول جوسپار بويىنشا:
2021 -جىلى — 3600 گەكتارعا 17 ميلليون كوشەت؛
2022 -جىلى — 4500 گەكتارعا 21 ميلليون 100 مىڭ كوشەت؛
2023 -جىلى — 2440,1 گەكتارعا 11 ميلليون 248 مىڭ كوشەت؛
2024 -جىلى — 5139,0 گەكتارعا 24 ميلليون 462 مىڭ كوشەت؛
2025 -جىلى — 4900 گەكتارعا 22 ميلليون 988 مىڭ كوشەت؛
2026 -جىلى — 4000 گەكتارعا 17 ميلليون 276 مىڭ كوشەت؛
2027 -جىلى — 4150 گەكتارعا 19 ميلليون 418 مىڭ كوشەت ەگىلەدى.
اۆتور
تالعاتجان مۇحامەتبەك ۇلى
