سەمەي ورمانىنداعى الاپات ورتتەن قازا بولعان ءورت سوندىرۋشىلەر مەن ورمانشىلارعا ەسكەرتكىش اشىلدى
سەمەي. KAZINFORM - «سەمەي ورمانى» رەزەرۆاتىندا بىلتىر شىققان الاپات ورتتەن 14 ادام كوز جۇمعان ەدى. كەيىن جالىننىڭ تاعى دا ءبىر ادامنىڭ ءومىرىن جالماعانى بەلگىلى بولدى. مارقۇمداردىڭ قۇرمەتىنە اباي وبلىسى بورودۋليحا اۋدانىندا ەسكەرتكىش اشىلىپ وتىر.
بورودۋليحا اۋدانىنداعى كامىشەنكا ورمانشىلىعىنىڭ ماڭى مەن رەسپۋبليكالىق كۇرە جولدىڭ بويىندا ورنالاسقان. باتىلدىق پەن ادالدىقتىڭ سيمۆولىنا اينالىپ، تابيعاتتى قورعايمىن دەپ مەرت بولعان ءورت سوندىرۋشىلەر مەن ورمانشىلاردى قۇرمەتتەۋ ماقساتىندا قويىلعان كومپوزيتسيانىڭ اۆتورى - ءمۇسىنشى نۇربول قاليەۆ.
گرانيت تۇعىرعا ورناتىلعان سەگىز مەترلىك ەسكەرتكىش مارقۇمداردىڭ باتىلدىعى مەن ءوز ىستەرىنە دەگەن ادالدىعىن بەينەلەيتىن رەلەفتەرمەن بەزەندىرىلگەن. ەسكەرتكىشتىڭ اشىلۋىندا ءسوز العان اباي وبلىسىنىڭ اكىمى نۇرلان ۇرانحايەۆ باتىرلاردىڭ ەرلىك داڭقى وشپەيتىندىگىن ايتتى.
«قارا ورماندى قادىرلەپ، باتىلدىق پەن باتىرلىقتىڭ جارقىن ۇلگىسىن كورسەتكەندەر ۇرپاق جادىندا ماڭگى ساقتالادى. بۇل تۇعىرتاس تابيعاتتىڭ توسىن مىنەزىنە توتەپ بەرگەن ازاماتتاردىڭ اتىن ايگىلەۋ ءۇشىن ارنايى قويىلىپ وتىر. ەسىمدەرى تاريح تاقتاسىنا التىن ارىپپەن جازىلىپ، ۇرپاعى ماقتان ەتەر جەرلەستەرىمىزگە، ءبىز قاشاندا باسىمىزدى يەمىز!»، - دەدى ول.
شارادا قازا بولعان ورمانشىلاردىڭ تۋىستارى ءسوز سويلەدى. سولاردىڭ ءبىرى اراي ءامىرحانوۆا ەسكەرتكىش باتىرلارعا قۇرمەت ەكەنىن اتاپ ءوتتى.
«اشىلعان ەسكەرتكىش بەيبىت كۇننىڭ باتىرلارىنا كورسەتىلگەن قۇرمەت دەپ ەسەپتەيمىن. مەملەكەت تاراپىنان كورسەتىلگەن قولداۋدى سول قايعىلى كۇننەن بەرى سەزىنىپ كەلەمىز. ءبىرى جارىنان، ءبىرى ۇلىنان، ءبىرى اعا-باۋىرىنان ايىرىلعان قايعىلى جاعدايدى ەل بولىپ بىرگە وتكەردىك. بۇگىن مىنە ەڭسەلى ەسكەرتكىش ورناتىلدى. العاش رەت بىزبەن كەزدەسكەندە مەملەكەت باسشىسى قاسىم-جومارت توقايەۆ بارلىق كومەكتى الاسىزدار دەپ ايتقان بولاتىن. پرەزيدەنتىمىزگە قولداۋ كورسەتىپ، كومەك قولىن سوزعانى ءۇشىن زور العىس بىلدىرەمىن. بارلىق كومەكتى الدىق، وعان مىڭ دا ءبىر العىس» - دەدى اراي ءامىرحانوۆا.
ەسكە سالساق، بىلتىر «سەمەي ورمانىندا» ءورت شىعىپ، 15 ادامنىڭ ءومىرىن جالماعان بولاتىن. وسىدان كەيىن 12-ماۋسىم ەلىمىزدە جالپىۇلتتىق ازا تۇتۋ كۇنى بولىپ جاريالانعان.
اۆتور
تالعاتجان مۇحامەتبەك ۇلى
