سەمەي قىزىلعا ءوتىپ كەتكەن جۇرگىزۋشى سالدارىنان 7 ادام اۋرۋحاناعا ءتۇستى
سەمەي. KAZINFORM - سەمەي قالاسىندا جول اپاتىنان 7 ادام زارداپ شەكتى.
وبلىستىق پوليتسيا دەپارتامەنتى باسپا ءسوز قىزمەتىنىڭ مالىمەتىنە سۇيەنسەك، گازەل جۇك كولىگىنىڭ 38 جاستاعى جۇرگىزۋشىسى يبرايەۆ كوشەسى مەن قايىم مۇحامەدحانوۆ داڭعىلىنىڭ قيىلىسىندا باعدارشامنىڭ قىزىل تۇسىنە تۇسىنە ءوتىپ كەتكەن. سونىڭ سالدارىنان ول Toyota Highlander كولىگىمەن سوقتىعىستى.
وسىدان كەيىن گازەل ينەرتسيامەن تاعى ەكى «ۆاز 2109» جانە «Lexus RX 300» كولىكتەرىنە سوعىلدى. جول- كولىك وقيعاسىنان بارلىعى 7 ادام اۋرۋحاناعا ءتۇستى.
«قازىرگى ۋاقىتتا ءبىرقاتار سوت-مەديتسينالىق ساراپتاما تاعايىندالدى. سونىڭ ناتيجەلەرى بويىنشا پروتسەسسۋالدىق شەشىم قابىلدانادى. جول اپاتتارىن بولدىرماۋ، جاقىندارىڭىز بەن تۋىستارىڭىزدىڭ ءومىرى مەن دەنساۋلىعىن ساقتاۋ ماقساتىندا ءاربىر جۇرگىزۋشىگە جولدا مۇقيات بولۋعا جانە جول قوزعالىسى ەرەجەلەرىن مۇلتىكسىز ساقتاۋعا كەڭەس بەرەمىز»، - دەلىنگەن اقپاراتتا.
