سۇلۋلىقتىڭ قۇنى قانشا؟

استانا. KAZINFORM - سۇلۋلىقتىڭ قۇنى قانشا؟ Jusan analytics ساراپشىلارىنىڭ جۇرگىزگەن زەرتتەۋىنە سۇيەنسەك، بۇكىل الەمدە سۇلۋلىق سالوندارى بويىنشا ەڭ تانىمال قىزمەتتەر - شاش كۇتىمى، ودان كەيىن تىرناق جانە تەرى كۇتىمى ەكەن. ەلىمىزدە دە تۋرا وسىنداي ءۇردىس بايقالادى.

«سۇلۋلىق الەمدى قۇتقارادى». دوستويەۆسكيدىڭ الەمگە ايگىلى ءسوزى. ارينە، بۇل ايتىلعاندى اركىم وزىنشە ءتۇسىنىپ، ءارقالاي ۇعىنۋى مۇمكىن، دەگەنمەن ەستەتيكالىق كوركەمدىككە دەگەن ۇمتىلىس ادامزاتقا ءتان قاسيەت ەكەنىن جوققا شىعارا المايمىز. وسى ۇمتىلىس سۇلۋلىق يندۋسترياسىنىڭ قالىپتاسىپ، دامۋىنا ىقپال ەتىپ، ءارى قاراي ۇلكەن سالاعا اينالۋىنا جول اشتى، ءتىپتى كەي ەلدەردە ەكونوميكانىڭ درايۆەرىنە اينالعان سالانىڭ ءبىرى بولىپ وتىر.

الپاۋىت اينالىمى بار نارىق

Euromonitor International جۇرگىزگەن ەسەپكە سۇيەنسەك، 2021 -جىلى الەمدىك كوسمەتيكا جانە تەرى كۇتىمى نارىعىنداعى اينالىم 500 ميلليارد اقش دوللارىنان اسقان. ينتەرنەتتەگى ساۋدانىڭ جانە الەۋمەتتىك جەلىنىڭ دامۋى دا نارىقتىڭ وسۋىنە ايتارلىقتاي اسەر ەتكەن.

كوسمەتيكا ونىمدەرىن ەڭ كوپ تۇتىناتىن ازيا، ەۋروپا جانە سولتۇستىك امەريكا ايماقتارى ەكەن. ال ازياداعى كوسمەتيكا نارىعىنىڭ اينالىمى 200 ميلليارد دوللاردان اسادى.

Fوrtune Business Insights دەرەكتەرى بويىنشا 2021 -جىلى الەمدىك سۇلۋلىق سالوندارى نارىعىنىڭ جالپى كولەمى 201,9 ميلليارد دوللارعا جەتكەن. 2029 -جىلعا قاراي نارىق كولەمى 355,4 ميلليارد ا ق ش دوللارى بولادى دەگەن بولجام بار.

سۇلۋلىق سالوندارى ەل دامۋىنىڭ كورسەتكىشى بولا الادى

سونىڭ ىشىندە، وسى الىپ يندۋستريانىڭ ءبىر بولىگى - سۇلۋلىق سالوندارىنىڭ الەمدىك نارىعى قارقىندى تۇردە كەڭەيىپ كەلە جاتىر. الدا دا ءوسۋىن ودان ءارى جالعاستىرادى دەگەن بولجام بار. ءار ەلدەگى سۇلۋلىق يندۋسترياسىندا كورسەتەتىن قىزمەتكە قاراي جۇمسالاتىن شىعىن كولەمى دە ءارتۇرلى. بۇل ەكونوميكالىق جانە مادەني فاكتورلارعا بايلانىستى ەكەنى بەلگىلى. سونىمەن قاتار ەل ەكونوميكاسى دامىعان سايىن، ادامدار بيۋتي قىزمەتتەرگە كوپتەپ اقشا جۇمساي باستايدى دەگەن قىزىق دەرەكتى دە كوزىمىز شالدى.

Jusan analytics ساراپشىلارىنىڭ جۇرگىزگەن زەرتتەۋىنە سۇيەنسەك، بۇكىل الەمدە سۇلۋلىق سالوندارى بويىنشا ەڭ تانىمال قىزمەتتەر - شاش كۇتىمى، ودان كەيىن تىرناق جانە تەرى كۇتىمى ەكەن. ەلىمىزدە دە تۋرا وسىنداي ءۇردىس بايقالادى.

وتاندىق نارىقتا باسەكە قىزىپ تۇر

قازاقستاندا بارلىعى 9000 شاماسىندا سۇلۋلىق سالونى مەن مونوسالون بار. 1 سۇلۋلىق سالونىنا 1000 ادامنان كەلەدى. بۇل رەتتە سۇلۋلىق سالوندارى مەن شاشتارازدار ەڭ از شوعىرلانعان قالالار تۇركىستان، اتىراۋ، شىمكەنت، قىزىلوردا، سەمەي جانە اقتوبە ەكەن.

زەرتتەۋ ناتيجەسىندە ساراپشىلار وتاندىق نارىقتا سۇلۋلىق سالوندارى اراسىندا باسەكەلەستىك جوعارى ەكەنىنە كوز جەتكىزىپتى. بۇعان سۇرانىس پەن ۇسىنىستىڭ سايكەسسىزدىگى سەبەپ بولىپ وتىر دەگەن تۇجىرىم دا ايتىلعان. ياعني، سۇرانىس جەتكىلىكسىز.

Jusan analytics دەرەگىنشە، قازاقستاننىڭ سۇلۋلىق سالوندارى 484 ميلليارد تەڭگەگە باعالانادى (شامامەن 1 ميلليارد دوللار) نەمەسە جان باسىنا شاققاندا - 14 دوللار. ال ۇلتتىق ستاتيستيكا بيۋروسىنىڭ دەرەكتەرى بويىنشا 2022 -جىلى بيۋتي-يندۋستريا سالاسىندا كورسەتىلگەن قىزمەتتەر كولەمى 34 ميلليارد تەڭگەدەن اسقان.

سۇلۋلىق سالونىنا كىم كوپ شىعىندالادى؟

ايەلدەرگە ارنالعان بيۋتي-قىزمەتتەرگە كەتەتىن شىعىنداردىڭ ورتاشا مولشەرى 31-35 جاس ارالىعىندا شارىقتاۋ شەگىنە جەتەدى ەكەن. ساراپشىلار مۇنى وسى كەزەڭدە جالاقىنىڭ ءبىرشاما جوعارى بولاتىندىعىنا جانە وسى جاس ساناتىندا ادامداردىڭ كوپ ەكەنىمەن بايلانىستىرادى.

ال ەرلەرگە ارنالعان بيۋتي-قىزمەتتەرگە جۇمسالاتىن شىعىنداردىڭ شارىقتاۋ شەگى 46-50 جاس ارالىعىنا سايكەس كەلەدى. ويتكەنى بۇل كەزەڭدە ەرلەر كوپ تابىس تابادى. بۇل ولارعا ءوزىن كۇتۋگە جانە سۇلۋلىق سالوندارىنا بارۋعا كوپ قارجى جۇمساۋعا مۇمكىندىك بەرەدى ەكەن. سۇلۋلىق سالوندارىندا ايەلدەرگە كورسەتىلەتىن قىزمەتتەردىڭ ورتاشا چەگى ەرلەرگە قاراعاندا جوعارى.

ال 60 جاستان اسقان ايەلدەر مەن ەر-ازاماتتار باسقا جاس توپتارىنا قاراعاندا ءوزىن كۇتۋگە از اقشا جۇمسايدى. ويتكەنى زەينەت جاسىنا شىققان سوڭ، قارجى جاعىنان تاپشىلىق كورە باستايدى جانە اقشا كوپ جاعدايدا ەم-دومعا جۇمسالادى دەپ تۇجىرىمدايدى ساراپشىلار.

Jusan analytics نارىقتى زەرتتەي كەلە، ەل بويىنشا سۇلۋلىق سالوندارىنىڭ ورتاشا چەگى 8700 تەڭگە دەگەن قورىتىندى شىعارعان. بۇل رەتتە، وتاندىق نارىقتاعى باعا الەمدەگى ورتاشا باعادان تومەن. Global Wellness Institute دەرەگىنە سۇيەنسەك، ءبىزدىڭ ەلدە حالىقتىڭ جان باسىنا شاققانداعى ج ءى ءو-دەگى بيۋتي-قىزمەتتىڭ ۇلەسى - 0,1 پايىز.

«ەل دامىعان سايىن، حالقى سۇلۋلىق سالوندارىنا جيىرەك بارادى» دەگەن ءاۋ باستا ايتقان تۇجىرىمدى نەگىزگە الساق، نارىقتىڭ دامۋى، اينالىمىنىڭ كەڭەيۋى جاقسىلىقتىڭ بەلگىسى دەپ تۇجىرىمداۋعا بولاتىن سياقتى. دەگەنمەن نە نارسەدە بولسىن شەكتەن شىعۋدىڭ زياندى سالدارى بارىن دا ۇمىتپاعان ءجون، ارينە.