سۇلۋلىق پەن شىعىن: ەر كۇتىمى قانشا تۇرادى؟

استانا. KAZINFORM - قازىر ءسان الەمىندەگى ۇردىسكە ىلەسۋ ايەلدەردىڭ عانا ەمەس، ەرلەردىڭ دە ەرمەگىنە اينالدى. ازاماتتاردىڭ بەت كۇتىمى، شاش ۇلگىسى، كيىنۋ ءداستۇرى بىرتە-بىرتە جاڭا ارناعا بۇرىلعان. كەتەتىن شىعىن ۇلعايىپ، ساننەن پايدا تاپقاندار از ەمەس. وسى ورايدا ەرلەر اراسىنداعى سانگە جۇمسالاتىن قارجى مەن سالاداعى وزگەرىستەردى تالداپ كورەيىك.

Beauty-يندۋستريا: ەرلەر ۇلەسى 15 پايىزعا جەتتى

ەرلەردىڭ ساندەگى باعدارى بىرنەشە باعىتتى قامتيدى: ساقال-مۇرت كۇتىمى؛ بەت-الپەت ارلەۋ؛ شاش ۇلگىسى؛ كيىم كيۋ داعدىسى. الدىمەن مۇنىڭ بارىنە الەۋمەتتىك جەلىدەگى تانىمال ونەر يەلەرى مەن بلوگەرلەردىڭ ءجۇرىس-تۇرىسى سەبەپ بولعانىن ايتا كەتكەن ءجون. مىسالى، وتكەن عاسىردىڭ 90-جىلدارىنا دەيىن ەرلەر اراسىندا بەت كۇتىمىنە كوڭىل ءبولۋ سيرەك كەزدەسسە، قازىر قالىپتى قۇبىلىسقا اينالعان. كەڭەس كەزەڭىندە جاس جىگىتتەر اراسىندا ءبىردى-ەكىلى ۇشىراساتىن قاۋعا ساقال قازىر ساندە. سالاداعى اتالعان وزگەرىستەر beauty-يندۋسترياداعى جاڭا بەتبۇرىس - ەرلەر ءسانى ۇعىمىن جارىققا شىعاردى.

Jusan Analytics زەرتتەۋىنە سۇيەنسەك، beauty-يندۋسترياداعى ەرلەردىڭ شاش قىسقارتۋ قىزمەتى جالپى نارىقتىڭ 15 پايىزىنان اسادى، كەي ساراپشى ستاتيستيكانى 20 پايىز دەپ كورسەتۋدە. قالاي بولعان كۇندە دە ازاماتتاردىڭ سانگە جاقىنداۋ ءۇردىسىن جوققا شىعارا المايمىز. ونىڭ ۇستىنە كەيىنگى جىلدارى تەك ەرلەرگە ارنالعان سۇلۋلىق سالوندارىنىڭ، ياعني Barbershop جەلىلەرىنىڭ كوبەيۋى بايقالادى. 2GIS قوسىمشاسىنداعى مالىمەتكە سەنسەك، استانا قالاسىنىڭ وزىندە 200 دەن استام Barbershop جۇمىس ىستەيدى.

باربەر مامان راۋشان رۋسلان قىزىنىڭ ايتۋىنشا، بۇگىندە «كلاسسيكالىق شاش ۇلگىسى» دەگەن ۇعىم جوقتىڭ قاسى. بۇرىن ەرلەر اراسىندا 2-3 شاش ۇلگىسى عانا كەڭ تارايتىن، كوپ كەزىگەتىنى «كلاسسيكا» اتاۋىن ەنشىلەيتىن ەدى. قازىر كەمى ونداعان ۇلگى بار ءارى جاس ەرەكشەلىگىنە قاراي قوسىمشا جىكتەلەدى ەكەن.

- 2016-جىلدان باستاپ باربەر رەتىندە كاسىبي قىزمەت ەتەمىن. ءبىر كۇندە ورتا ەسەپپەن 10-12 ادامنىڭ شاشىن قىسقارتامىن. كاسىبي قىزمەتىمدە بايقاعانىم، 13 جاسقا دەيىنگى بالالار شاشىنا ويۋ ۇلگىسىندەگى بەلگىلەردى سالۋعا قۇمار، 18 جاسقا دەيىنگى بالالار ۇزىن شاشتى ءسان كورەدى. وسى ەكى ساناتتاعى بالالار اراسىندا وتە كوپ ۇلگى بار، كوبى تۇتىنۋشىنىڭ سۇرانىسىنا وراي ەرەكشەلەنىپ وتىرادى.

ال 30 جاسقا دەيىنگى ەرلەر اراسىندا «Undercut» ، FADE»، «Mohawk» ،«Buzz cut»، «كانادكا»، «بريتانكا» دەگەن شاش ۇلگىسى تانىمال. «بوكس»، «پولۋبوكس»، «تەننيس»، «كروپ» جانە ءارقاشان ترەندتە بولاتىن «كلاسسيكا» شاش ۇلگىسى ساندە، - دەيدى مامان.

باربەر سانگە قىزىعاتىن ەر ادامداردىڭ ەرەكشەلىگىنە توقتالدى. ايتۋىنشا، كوبى ءبىر كەلگەن سۇلۋلىق سالونىنا قايتا كەلۋدى ادەتكە اينالدىرعان. مۇنى Jusan Analytics زەرتتەۋى دە راستاپ وتىر. جىل بويى 20-30 جاس ارالىعىنداعى قازاقستاندىقتاردىڭ 41 پايىزى ءارتۇرلى سۇلۋلىق سالونىنا بارسا، 59 پايىزى 1-2 سالونمەن شەكتەلەدى.

ورتاشا چەك - 5 مىڭ تەڭگە

Fortune Business Insights دەرەگىنشە، 2029-جىلى سۇلۋلىق سالوندارىنان تۇسەتىن قارجى 355,4 ميلليارد دوللاردى قۇراماق. بۇل شىندىققا جانساتىن سەكىلدى. ۇلتتىق ستاتيستيكا بيۋروسىنىڭ مالىمەتى بويىنشا، ءساۋىر ايىندا شاشتاراز بەن سۇلۋلىق سالون قىزمەتى 2,6 پايىز قىمباتتاعان. نارىقتى باقىلاۋ بارىسىندا باعا كورسەتكىشى ەرلەر ءسان الەمىنە دە اسەر ەتكەنىن كورەمىز. شارتتى تۇردە سۇلۋلىق سالونى سەگمەنتىن ءۇش ساتىعا بولسەك - «ەكونوم-كلاسس»، «ورتا سانات»، VIP - بارىندە ءوسىم بار.

قولجەتىمدى سانالاتىن «ەكونوم-كلاسستا» بالالارعا شاش قىسقارتۋ 2000-3000 تەڭگەدەن باستالسا، ەرەسەكتەر ءۇشىن 3500 تەڭگەدەن كەم ەمەس. «ورتا ساناتتا» ءداستۇرلى شاش قىسقارتۋدان بولەك ساقال-مۇرت باستىرۋ، دەپيلياتسيا، كۇتىم ماسكاسى كىرەدى، مۇنداعى ورتاشا باعا - 6000-7000 تەڭگە. ال VIP ساناتتاعى ەڭ تومەنگى باعا 7000 تەڭگەدەن باستادى.

ستاتيستيكا بيۋروسىنىڭ مالىمەتىنشە، ەرلەردىڭ شاش قىسقارتۋعا جۇمسايتىن شىعىنى ورتا ەسەپپەن 2604 تەڭگەنى قۇرايدى. بيۋرو مالىمەتىنشە، الماتىدا ستاتيستيكا 3601 تەڭگەنى، ورالدا - 1795 تەڭگەنى كورسەتكەن. وزگە قالالاردا 1,9 مىڭ تەڭگە مەن 3,4 مىڭ تەڭگە اينالاسىندا. وتكەن جىلى 9 ايدا سۇلۋلىق سالوندارى مەن شاشتاراز قىزمەتى 49,2 ميلليارد تەڭگە تابىس تاپقان.

ماڭىزدىسى، ەلدەگى سۇلۋلىق سالونىنىڭ 65 پايىزى - «ەكونوم-كلاسس» ، 28 پايىزى - «ورتا- سانات»، 7 پايىزى - VIP ساناتىنا جاتادى. دەمەك، حالىقتىڭ باسىم دەنى جانە سۇرانىس اۋقىمى «ەكونوم-كلاسقا» تيەسىلى.

جالپى، ستاتيستيكا بويىنشا ەرلەر سالونعا ەگدە تارتقاندا ءجيى بارادى ەكەن، ياعني 46-50 جاستا سۇلۋلىق سالونىن ارالايدى. ونىڭ ۇستىنە كەيىنگى جىلدارى ەرلەر ساقال-مۇرتىن بۇرىنعىداي ۇيىنەن الماي، ارنايى سالونعا بارۋدى ادەتكە اينالدىرعان. ءتىپتى شۋگارينگ، پيلينگ قىزمەتىنە جيى جۇگىنەتىندەر كوبەيۋدە.

تۇتىنۋشىدان مامانعا دەيىن

بايقاساق، ەرلەر ءسان الەمىندەگى تۇتىنۋشى عانا ەمەس، سۇلۋلىق سالونى ماماندارىنا دا اينالىپ ۇلگەرگەن. الەۋمەتتىك جەلىدە ايەلدەردىڭ سۇلۋلىق سالونىندا جۇمىس ىستەيتىن ەر ماماننىڭ كوبەيگەنىن بايقايمىز. قىزىعى، ولاردىڭ قىزمەتى ايەل ۆيزاجيست، شاش ارلەۋشىگە قاراعاندا جوعارى. نازىك جاندىلار دا رەتى كەلسە، ەر مامانعا جۇگىنۋگە قۇمار.

اتىراۋلىق ادي تاجيەۆ - العاشقى ۆيزاجيست ەر مامانداردىڭ قاتارىندا. ول 17 جاسىنان بەت ارلەۋمەن شۇعىلدانىپ كەلەدى. قازىر اۋقىمدى اۋديتورياسى بار ۆيزاجيسكە اينالعان.

- ەڭ العاش اتىراۋ قالاسىندا ۆيزاجيست كۋرسىنىڭ باستاپقى ءبولىمىن مەڭگەرسەم، كەيىن الماتى قالاسىندا بىلىكتىلىكتى جەتىلدىرۋ سىنىبىنان ءوتتىم. وسى سالانى جەتىك مەڭگەرىپ الۋ ءۇشىن، ماسكەۋ قالاسىنىڭ اتاقتى ۆيزاجيسى گوار اۆەتيسياننىڭ شەبەرلىك ساباعىنا قاتىستىم. ءالى كۇنگە ءاردايىم ءوزىمدى شىڭداپ وتىرامىن.

وسىعان دەيىن كوپ شاكىرت دايىنداپ، شىعاردىم دەپ ايتا الامىن. وقۋلاردى جەكە جانە توپپەن وتكىزەمىن. وسى كۇنگە دەيىن 100 گە جۋىق قىزدى وقىتتىم. كۋرستى كەمى 10 كۇن وقيدى. كوپ شاكىرتتەرىم 5 ساباق وقىپ، كليەنت قابىلداپ جاتادى. بۇل مەن ءۇشىن قۋانتارلىق جايت. شاكىرتتەرىمنىڭ ساپالى ءبىلىم الىپ، ساپالى جۇمىس جاساۋى باستى قاعيدا. قانشاما قىز-كەلىنشەكتەردىڭ سۇلۋلىقتارىنا سۇلۋلىق قوسۋ، بوياۋدى جاراسىمدى ەتىپ ورنىمەن قولدانۋ وڭاي جۇمىس ەمەس. ۇلكەن شىدامدىلىق پەن توزىمدىلىكتى تالاپ ەتەدى، - دەدى ادي تاجيەۆ.

ترانسپلانتاتسيا دا تابىسقا اينالعان

ساراپشىلار ەرلەر اراسىنداعى كەلبەت كۇتىمىنىڭ ءبىر تارماعىنا شاش پەن ساقال وسىرۋگە ارنالعان ونىمدەر مەن قىزمەتتى ەنگىزگەن. جوعارىدا اتاپ وتكەنىمىزدەي، ەر ازاماتتار اراسىندا قالىڭ شاش پەن قاۋعا ساقال ءسان. الايدا ۇردىسكە ىلەسۋ كەيبىرىنە بۇيىرا بەرمەيتىنى بار. وعان دەنساۋلىق جاعدايى، گەنەتيكالىق احۋال، ەكولوگيا سەبەپ بولىپ وتىر. ال 30-40 جاس ارالىعىنداعىلاردا شاشتىڭ ءتۇسۋى كوپ كەزدەسەدى. وسى تۇرعىدان قاراساق، كوپ ەر شاش وسىرۋگە ارنالعان ءونىمدى قولدانۋعا اۋەس. قىمبات سۋسابىن، ءدارى-دارمەك، كوسمەتيكالىق ونىمدەردىڭ ساۋداسى ءجۇرىپ تۇر. ەڭ سوڭعى امالعا شاش ترانسپلانتاتسياسىن جاتقىزۋعا بولادى.

قازىر استانا، الماتى، شىمكەنت قالالارىندا جالپى سانى 25 كە جۋىق شاش ترانسپلانتاتسياسىن جاسايتىن ورتالىق بار. ورتاشا باعا - 50000 تەڭگە مەن 750000 تەڭگە ارالىعىندا. بۇرىن مۇنداي وپەراتسيا ءۇشىن تۇركيا ەلىنە باراتىن، قازىر قازاقستاندا دا جاساتۋعا مۇمكىندىك تۋعان. سودان بولار، بۇل قىزمەتكە جۇگىنەتىن ەرلەردىڭ قاتارى ارتىپ جاتىر.

الايدا تريحولوگ دارىگەر ايگەرىم يسامالينوۆا شاش وتىرعىزۋ وپەراتسياسىنا بايىپپەن قاراۋعا شاقىردى. سەبەبى بۇل پروتسەدۋرا جوعارى بىلىك پەن تاجىريبەنى قاجەت ەتەدى. ال جارناماسى جەر جارعانىمەن، كەي شاش ترانسپلانتاتسياسىمەن اينالىساتىن ماماننىڭ قابىلەتى تومەن. زاردابىن حالىق تارتىپ وتىر دەگەن پىكىردە.

- شاش ترانسپلانتاتسياسىن جاساۋ ماماننان اسا شەبەرلىكتى قاجەت ەتەدى. كەز كەلگەن ترانسپلانتولوگ شاشتى ءساتتى ورناتا الادى دەۋگە سەنۋ قيىن. ورناتۋ باعىتى مەن جولىن ءدال تاپپاسا، ەككەن شاشتان پايدا جوق. ول ازداي. سالدارىنان شاش قيسىق ءوسۋى مۇمكىن. سوندىقتان بەتالدى جاساۋعا بولمايدى. دونور ايماقتاعى شاش قالىڭ با، ادامنىڭ دەنساۋلىق جاعدايى جاقسى ما، تەرىنىڭ جايى قالاي، ءبارىن ەسكەرگەن ءجون، - دەيدى دارىگەر.

ەسكە سالا كەتەيىك، بۇعان دەيىن قىزدار قاۋىمىنىڭ «سۇلۋلىققا» قانشا اقشا جۇمسايتىنىن جازعان بولاتىنبىز.