ەسكى كولىكتەردىڭ ساۋداسى اۆتونارىقتا توقتايدى - ساراپشى

الماتى. KAZINFORM - الماتىدا جۇرىلگەن كولىك نارىعىنا بايلانىستى كونفەرەنسيا ءوتتى.

Kazinform تىلشىسىنە قازاقستان اۆتوكولىك وداعىنىڭ پرەزيدەنتى انار ماقاشيەۆا ەلىمىزدىڭ كولىك نارىعىندا سوڭعى جىلدارى قانداي وزگەرىس بولعانىن ايتىپ بەردى. ونىڭ سوزىنشە، قازىر قازاقستاندىقتار اراسىندا ەسكى كولىكتەرگە قاراعاندا جاڭا تەمىر تۇلپارعا سۇرانىس جوعارى.

- بۇگىنگى كۇنى ەلىمىزدىڭ ازاماتتارى جاڭا كولىك تىزگىندەپ، ەسكى كولىگىن جاڭاسىنا اۋىستىرعىسى كەلەدى. بۇل جاقسى. مىنىلگەن كولىكتەردىڭ ساتىلۋى 2 جىل بۇرىنعى ۋاقىتقا قاراعاندا الدەقايدا ازايعان. ءبىراق وعان تەك قىتاي كولىكتەرىنىڭ نارىققا كىرۋى اسەر ەتتى دەي المايمىز. جالپى ەلىمىزدە جاڭا كولىكتەر كوبەيىپ، ولاردىڭ باعاسى تومەندەدى. كولىكتەردىڭ بارلىق ءتۇرى بويىنشا، مەيلى ول سەدان جانە جول تالعامايتىن كولىك بولسىن، ۇسىنىس كوبەيدى. تيىسىنشە، ەكىنشى نارىقتاعى باعالاردىڭ تومەندەۋىنە اسەر ەتتى، - دەدى ول.

سونىمەن قاتار انار ماقاشيەۆا 20 جىلدان استام ۋاقىت قولدانىستا بولعان كولىكتەر الداعى ۋاقىتتا نارىقتان مۇلدەم شىعىپ قالۋى مۇمكىن ەكەنىن اتاپ ءوتتى.

- بۇل تەندەنسياعا قاراساق، الداعى ۋاقىتتا قاتتى ەسكىرگەن كولىكتەر مۇلدەم ساتىلماي قالۋى مۇمكىن. قازىر ەلىمىزدىڭ اۆتوكولىك پاركىندە 6,4 ميلليون ماشينا بار، ونىڭ 86,6 پايىزى جەڭىل كولىكتەر. سونداي-اق جالپى كولىكتەردىڭ جارتىسىنا جۋىعى 20 جىلدان اسقان. ەۋروپا، ازيا، ا ق ش- تا مۇنداي كولىكتەر قولدانىلمايدى، ولار نارىقتان شىعىپ قالادى. قازىر ءبىزدىڭ قازاقستاندىقتار دا وسىنداي كولىكتەردى اۋىستىرۋعا نيەتتى. ەلىمىزدەگى ترەند سوعان قاراي بەت بۇردى. بولجام بويىنشا 20 جىلدىق كولىكتەر الداعى ۋاقىتتا نارىقتا وتپەي قالادى، ءبىراق 10  جىلدىق كولىكتەردىڭ ساۋداسى ءالى دە توقتامايدى، - دەدى ول.

ەسكە سالايىق، بۇعان دەيىن كولىك نارىعىنداعى جاعداي تۋرالى جازعانبىز.

اۆتور

دوسبول اتاجان