سكرينينگتىك زەرتتەۋ: 2,1 مىڭنان اسا ادامعا قاتەرلى ىسىك دياگنوزى قويىلدى
استانا. KAZINFORM - ۇلتتىق ونكولوگيالىق اۋرۋلاردى ەرتە انىقتاۋ باعدارلاماسىنىڭ شەڭبەرىندە جۇرگىزىلگەن سكرينينگتىك زەرتتەۋلەر ناتيجەسى جاريالاندى، دەپ حابارلايدى دەنساۋلىق ساقتاۋ مينيسترلىگى.
ونكولوگيالىق سكرينينگتەردىڭ اۋقىمدى باعدارلاماسى شەڭبەرىندە الدىن الا دەرەكتەر بويىنشا حالىقتىڭ نىسانالى توبىنىڭ 2,5 ميلليوننان استام ادامى زەرتتەلىپ-قارالدى.
ۇلتتىق ونكولوگيالىق اۋرۋلاردى ەرتە انىقتاۋ باعدارلاماسىنىڭ شەڭبەرىندە جۇرگىزىلگەن سكرينينگتىك زەرتتەۋلەر وبىردى ەرتە دياگنوستيكالاۋ مەن پروفيلاكتيكالاۋدا جوعارى تيىمدىلىكتى كورسەتەدى.
سكرينينگ جۇرگىزۋ كەزەڭىندە مىناداي ناتيجەلەر انىقتالدى:
* 218,8 مىڭ ادامدا وبىرعا دەيىنگى اۋرۋلار انىقتالدى.
* 2,1 مىڭنان استام ادامعا قاتەرلى ىسىك دياگنوزى قويىلدى.
وبىردىڭ جەكەلەگەن تۇرلەرى بويىنشا سكرينينگكە ەرەكشە نازار اۋدارىلادى:
ءسۇت بەزى وبىرى
40-70 جاستاعى ايەلدەردى زەرتتەپ-قاراۋ شەڭبەرىندە 830 مىڭنان استام ايەل قامتىلدى. 158 مىڭ جاعدايدا وبىرعا دەيىنگى اۋرۋلار انىقتالدى. ونىڭ ىشىندە 1,5 مىڭ ايەلدە ءسۇت بەزى وبىرى دياگنوزى راستالدى.
جاتىر موينى وبىرى
700 مىڭنان استام ايەل زەرتتەلىپ-قارالدى. 53 مىڭ جاعدايدا وبىرعا دەيىنگى اۋرۋلار انىقتالدى، ونىڭ 359 ىندا جاتىر موينى وبىرى راستالدى.
كولورەكتالدىق وبىر
سكرينينگ 50-70 جاس ارالىعىنداعى 900 مىڭنان استام ەرلەر مەن ايەلدەردى قامتىدى. وبىرعا دەيىنگى 7826 جاعداي انىقتالدى، ونىڭ 356 سىندا وبىر انىقتالدى.
دەنساۋلىق ساقتاۋ مينيسترلىگىنىڭ باستاماسىمەن 2025 -جىلدان باستاپ بارلىق ونكوسكرينينگتەر تمككك پاكەتىندە قولجەتىمدى بولادى. سونداي-اق، 2025 -جىلدان باستاپ ساقتاندىرىلۋشىلار ءۇشىن العاش رەت مىنالار ەنگىزىلەتىن بولادى:
- مي قان اينالىمىنىڭ جەدەل بۇزىلۋىن ەرتە دياگنوستيكالاۋ جانە پروفيلاكتيكالاۋ ءۇشىن براحيوتسەفاليالىق تامىرلاردىڭ ۋلترادىبىستىق زەرتتەۋى؛
- جۇرەك تامىرلارىنىڭ زاقىمدانۋىن ەرتە دياگنوستيكالاۋعا جانە ميوكارد ينفاركتىسىن پروفيلاكتيكالاۋعا ارنالعان امبۋلاتوريالىق كوروناروگرافيا.
- تۇراقتى سكرينينگتىك زەرتتەپ-قاراۋلار ونكولوگيالىق اۋرۋلاردى ەرتە انىقتاۋ مۇمكىندىگىن ايتارلىقتاي ارتتىرادى، بۇل ەمدەۋدى ەرتە كەزەڭدەردە باستاۋعا مۇمكىندىك بەرەدى. بۇل ءوز كەزەگىندە ءساتتى قالپىنا كەلتىرۋ مۇمكىندىگىن ارتتىرادى جانە اسقىنۋ ءقاۋپىن ازايتادى، - دەلىنگەن مينيسترلىك حابارلاماسىندا.
ايتا كەتەيىك، بۇعان دەيىن ءماجىلىس دەپۋتاتى اسحات ايماعامبەتوۆ 3,5 ميلليون ازاماتىمىز ونكولوگيانى ەرتە انىقتايتىن سكرينينگتەن وتە الماي وتىرعانىن ايتتى.
اۆتور
اينۇر تۋماكبايەۆا
