سكليار: ءبىز كەن مەن كونسەنتراتتى سىرتقا شىعارۋعا مۇددەلى ەمەسپىز
استانا. KAZINFORM - پرەمەر-ءمينيستردىڭ ءبىرىنشى ورىنباسارى رومان سكليار ۇكىمەت ۇيىندەگى باسپا ءسوز ءماسليحاتىندا قازاقستان ينۆەستيسيانى قاي سالالارعا كوبىرەك تارتۋعا مۇددەلى ەكەنىن ءمالىم ەتتى.
- ىلكى ينۆەستيسيالىق جوبالارعا كەلسەك، ارينە، ءبىرىنشى كەزەكتە قايتا وڭدەۋ سالاسىنا تارتىلاتىن ينۆەستيسيانىڭ كوبەيگەنىنە مۇددەلىمىز. ودان كەيىن تاۋ-كەن ونەركاسىبى دە ءبىز ءۇشىن باسىم باعىت. بىزگە رەسۋرستىق بازامىزدى ارتتىرۋ كەرەك. قولداعى بار جانە بارلانىپ، دالەلدەنەتىن رەسۋرس بازاسى وڭدەۋ سالاسىن دامىتۋعا سەرپىن بولادى. ءبىز كەن مەن كونسەنتراتتى سىرتقا شىعارۋعا مۇددەلى ەمەسپىز. كەرىسىنشە شيكىزاتتى وزىمىزدە وڭدەۋگە مۇددەلىمىز، - دەدى ول.
ءبىرىنشى ۆيتسە-پرەمەر بۇل ۇستانىم تەك قاتتى پايدالى قازبالارعا عانا قاتىستى ەمەس ەكەنىن اتاپ ءوتتى.
- قازىر پوليپروپيلەن وندىرەتىن زاۋىت جۇمىس ىستەپ تۇرعانىن كورىپ وتىرسىزدار. پوليەتيلەن، بۋتاديەن زاۋىتتارى سالىنىپ جاتقانىن بىلەسىزدەر. وسىلايشا وڭدەۋ سالاسىمەن بايلانىستى باعىتتاردى دامىتامىز، - دەدى رومان سكليار.
ايتا كەتەيىك، كەشە رومان سكليار Airbus-تىڭ ەۋروپا بويىنشا پرەزيدەنتى جوان پەليسەمەن اۆياتسيا سالاسىنداعى ىنتىماقتاستىقتى دامىتۋ جايىن تالقىلاپ، قازاقستان اۋماعىندا ازاماتتىق جانە مەملەكەتتىك اۆياتسيا ۇشاقتارىن جوندەۋ مەن قىزمەت كورسەتۋ ورتالىعىن اشۋ قاجەتتىگىن مالىمدەگەن بولاتىن.
