سۋدان زارداپ شەككەندەردىڭ زاقىمدانعان دۇنيە-مۇلكى قالاي باعالانادى
پەتروپاۆل. KAZINFORM - سولتۇستىك قازاقستان وبلىسى قىزىلجار اۋدانىندا تابيعي اپاتتان زارداپ شەككەن تۇرعىنداردىڭ شىعىنى ەسەپتەلە باستادى. قازىر ماماندار سۋدا قالعان باسپانالار مەن دۇنيە-مۇلىكتى زەرتتەپ، باعالاپ جاتىر.
س ق و- دا سۋ تاسقىنىنىڭ زاردابىن قىزىلجار اۋدانى ەڭ كوپ تارتتى. جەرگىلىكتى اكىمدىكتىڭ مالىمەتىنشە، اۋدان بويىنشا 1485 ءۇي سۋعا كەتتى. ونىڭ 197 ءسى - بەسكول اۋىلىندا. قازىرگى ۋاقىتتا تاسقىن سۋدىڭ بەتى قايتقان. تۇرعىنداردىڭ كەيبىرى ۇيلەرىنە كىرۋگە مۇمكىندىك الدى.
«13-ءساۋىر كۇنى سۋ كەلدى. ءۇيدىڭ قابىرعاسىنان-اق كورۋگە بولادى، سۋ ءبىر مەتردەن استام كوتەرىلدى. ال ءۇيدىڭ ىشىندە بيىكتىگى 10-15 س م دەي بولدى. سوعان قاراماستان دۇنيە- مۇلىككە زيان كەلدى. جاڭا ءۇي، 2018-جىلى عانا كىرگەن ەدىك. جوندەۋ قاجەت، تەحنيكامىز ىستەن شىقتى. قازىر مامان تەحنيكالىق زەرتتەۋ جۇرگىزىپ، كەلگەن شىعىندى باعالاپ جاتىر. تاڭەرتەڭ حابارلاسىپ، ءوتىنىش تاستادىم، كەشكە كەلدى»، - دەيدى بەسكول اۋىلىنىڭ تۇرعىنى ەرمەك ماۋىتوۆ.
19-ساۋىردەن باستاپ قىزىلجار اۋدانىندا باعالاۋشى كومپانيا وكىلدەرى جۇمىس ىستەپ جاتىر.
«بۇگىنگە دەيىن 100 دەن استام ءۇي قارالدى. سۋ كەتكەن باسپانالارعا تەحنيكالىق زەرتتەۋ جۇرگىزىپ جاتىرمىز. ەشكىم ۇمىت قالمايدى، بۇل جۇمىستى تەز ارادا اياقتاۋدى جوسپارلاپ وتىرمىز. ەڭ الدىمەن زاقىمدانعان مۇلىكتى قاراپ، سۋرەتكە تۇسىرەمىز. ەدەندەرىن، قابىرعالارىن كورەمىز، ەلەكتريكاسىن قارايمىز. تۇرمىستىق تەحنيكاعا سەرۆيس ورتالىقتان سەرۆيستىك قورىتىندى كەرەك بولادى، ونىڭ ىستەن شىعىپ، قالپىنا كەلتىرۋگە بولمايتىندىعى جونىندە. ياعني سۋدان بۇلىنسە، باعالاۋ ءۇشىن سەرۆيستىك ورتالىقتىڭ قورىتىندىسى قاجەت. ويتكەنى ءبىز ونداي قورىتىندى بەرە المايمىز»، - دەيدى «گرۋپپا كومپاني ا ك بارس-فينانس» ج ش س باس ديرەكتورى ميدحات فاسحۋتدينوۆ.
سونداي-اق ۇيگە باعالاۋشى ماماندى شاقىرعان تۇرعىندار قۇجاتتارىن - جەكە كۋالىك پەن ءۇيدىڭ تەحنيكالىق قۇجاتىن تۇگەندەپ وتىرۋى كەرەك.
ەستەرىڭىزگە سالايىق، سۋ تاسقىنى كەزىندە س ق و- دا 3,5 مىڭعا جۋىق تۇرعىن ءۇي سۋ استىندا قالدى. 14 مىڭنان استام ادام قاۋىپتى اۋماقتان ەۆاكۋاتسيالاندى.
بىرنەشە كۇن سۋدا تۇرعان ۇيلەردىڭ كەيبىرىنىڭ قابىرعالارى قۇلاپ جاتىر.
22-ساۋىردە وبلىستىق اكىمدىكتە جيىن ءوتىپ، باسپاناسىنان ايىرىلعان تۇرعىنداردى ۇيمەن قامتۋ ماسەلەسى قارالدى.
س ق و- دا تاسقىننىڭ سالدارىمەن كۇرەسۋگە 100 دەن استام ارنايى مەحبريگادا قۇرىلىپ جاتىر.
