سازگەر ارمان دۇيسەنوۆتىڭ ۇلىنىڭ ولىمىنە بايلانىستى قىلمىستىق ءىس قوزعالدى

الماتى. KAZINFORM - قازاقستاننىڭ بەلگىلى كومپوزيتورى مارقۇم ارمان دۇيسەنوۆتىڭ ۇلكەن ۇلى ابىلاي ارمان ۇلىنىڭ ولىمىنە بايلانىستى پوليتسيا قىلمىستىق ءىس قوزعادى.

الەۋمەتتىك جەلىلەردە ەلىمىزگە بەلگىلى ونەر قايراتكەرلەرى وتباسىنا كوڭىل ايتىپ جاتىر.

سونداي-اق ءانشى ماقپال ءجۇنىسوۆا كومپوزيتوردىڭ ۇلىن بىرەۋلەر قاستاندىقپەن ءولتىردى دەپ جازدى.

«مارقۇم ارمان دۇيسەنوۆتىڭ تۇڭعىشى ابىلاي ارمان ۇلىن بىرەۋلەر قاستىقپەن ءولتىردى دەگەن سۋىق حابار جەتتى. يمانى سالامات بولسىن، ولتىرگەن ادامدى تاۋىپ جازاسىن بەرۋ كەرەك. ايسۇلۋ اينالايىن، اللا سابىر بەرسىن، كەشە ۇشىپ كەتىپ ەدىم، تۋعاندارىنا، اناسىنا، قارىنداسى مەن باۋىرىنا قايعىرىپ كوڭىل ايتامىن»، - دەپ جازدى ماقپال ءجۇنىسوۆا.

الماتى قالالىق پوليتسيا اتالعان جاعدايعا قاتىستى تۇسىنىك بەردى.

«اتالعان دەرەك بويىنشا بوستاندىق اۋداندىق پوليتسيا باسقارماسى قىلمىستىق ءىس قوزعادى. وقيعانىڭ سەبەبى مەن ءمان-جايى انىقتالۋدا»، - دەپ حابارلادى الماتى قالالىق پوليتسيا دەپارتامەنتىنىڭ باسپا ءسوز قىزمەتى.

ەسكە سالايىق، بىلتىر بەلگىلى كومپوزيتور، ق ر مادەنيەت قايراتكەرى، «قۇرمەت» وردەنىنىڭ يەگەرى ارمان دۇيسەنوۆ ومىردەن وزعان.

اۆتور

الما مۇقانوۆا