ساڭىراۋقۇلاقتى زەرتتەگەن تۇڭعىش قازاق

استانا. KAZINFORM - ميكولوگيا - ساڭىراۋقۇلاقتاردى زەرتتەيتىن عىلىم. بۇل تەرميندى 1836 -جىلى مايلز بەركلي ەسىمدى اعىلشىن بوتانيگى ويلاپ تاپقان. ال قازاقتاردىڭ اراسىنان العاش بۇل جاراتىلىستى زەرتتەگەن بەردىقۇل قالىمبەتوۆ بولدى.

بەردىقۇل قالىمبەتوۆ - عالىم، بوتانيك- ميكولوگ، فيتوپاتولوگ، بيولوگيا عىلىمدارىنىڭ دوكتورى ، پروفەسسور، ۇلى وتان سوعىسىنىڭ ارداگەرى. 1920 -جىلى 15-ناۋرىزدا قىزىلوردا وبلىسىندا تۋعان. بيىل عالىمنىڭ تۋعانىنا 104 جىل تولادى. وسىعان وراي تۇلعا جايلى قىزىقتى فاكتىلەر توپتاماسىن ۇسىنامىز.

ساڭىراۋقۇلاقتاردىڭ 100 جاڭا ءتۇرىن انىقتاپ، 2000 نان استام تۇرلەرىن زەرتتەگەن. وعان قوسا قازاقستاننىڭ وڭتۇستىك- شىعىسى، تۇركىمەنستاننىڭ وڭتۇستىك- باتىسى مەن ىلە الاتاۋىنداعى ميكروفلورانى زەرتتەدى. قازاقستاندا ميكروسكوپيالىق پارازيتتى ساڭىراۋقۇلاقتاردىڭ بيولوگياسىن زەرتتەۋ مەكتەبىن قالىپتاستىرعان دا بەردىقۇل قالىمبەتوۆ بولدى.

قالىمبەتوۆ سوعىس باستالعانعا دەيىن قىزىلوردا وبلىسىنىڭ فەلدشەرلىك مەكتەبىن وقۋ وزاتى بولىپ اياقتادى. سول سەبەپتى 16-باتالوندا، ۋكراينانىڭ 4-پولكى، 128-گۆاردياسىندا 4 جىل بويى فەلدشەرلىك قىزمەت اتقاردى.

كەيىننەن 2-دارەجەلى «وتان سوعىسى»، « قىزىل جۇلدىز» وردەندەرىن يەلەندى. قالىمبەتوۆ سوعىس اياقتالعان سوڭ ماماندىعى بويىنشا جۇمىس ىستەدى. نەگىزگى عىلىمي ەڭبەكتەرى ميكولوگيا ماسەلەلەرىنە، ونىڭ ىشىندە قازاقستان مەن تۇرىكمەنستان ميكوفلوراسىنا ارنالعان. سونىمەن قاتار «سپورالى وسىمدىكتەر» ەڭبەگىن جازىپ شىقتى.

بەردىقۇل قالىمبەتوۆ 1978 -جىلى، 58 جاسىندا الماتى قالاسىندا قازا تاپتى.

اۆتورى: بانۋ ابدىعاليەۆا