سايرامدا شەتەلدىكتەر اراسىندا اتىس بولدى - فەيك

تۇركىستان. KAZINFORM - تۇركىستان وبلىسى پوليتسيا دەپارتامەنتىنىڭ باسپا ءسوز قىزمەتى «سايرام اۋدانىندا اتىس بولدى» دەگەن اقپاراتتىڭ شىندىققا جاراسپايتىنىن مالىمدەدى.

الەۋمەتتىك جەلىلەردە سايرام اۋدانىنداعى قارابۇلاق اۋىندا اتىس بولعانى جايىندا اقپارات تاراپ جاتىر. وندا شەتەلدىكتەر اراسىنداعى كەلىسپەۋشىلىك سوڭى اتىسقا ۇلاسقانى ايتىلعان. ال ۆيدەودان سيرەنا قوسىپ العان پوليتسيا اۆتوبۋستارى مەن كولىكتەرىنىڭ ۇلكەن جىلدامدىقپەن اۋىل ىشىندە جۇرگەنىن كورۋگە بولادى. تۇركىستان وبلىسى پوليتسيا دەپارتامەنتىنىڭ باسپا ءسوز قىزمەتى كوپشىلىكتى تەك رەسمي دەرەككوزدەرگە سەنۋگە جانە جالعان اقپارات تاراتپاۋعا شاقىردى.

«تۇركىستان وبلىسىنىڭ سايرام اۋدانىندا قۇقىقتىق ءتارتىپ پەن جول قاۋىپسىزدىگىن قامتاماسىز ەتۋ بويىنشا جوسپارلى جەرگىلىكتى ءىس-شارالار ءجۇرىپ جاتىر. ءىس-شارا بارىسىندا 500 دەن استام اكىمشىلىك قۇقىق بۇزۋشىلىق انىقتالدى، ولار بويىنشا ءتيىستى شارالار قابىلداندى. بۇل باعىتتاعى جۇمىس جالعاسىپ جاتىر»، - دەلىنگەن ۆەدومستۆا تاراتقان اقپاراتتا.

ال تۇركىستان وبلىسى پوليتسيا دەپارتامەنتىنىڭ باستىعى مۇرات قابدەنوۆ جەلىدەگى پاراقشاسىندا وبلىس ورتالىعىنان بولەك اۋداندار اۋماعىندا دا ءتارتىپ پەن زاڭدىلىقتى قامتاماسىز ەتۋ ماقساتىندا رەيدتىك شارالاردى كۇشەيتىلىپ جاتقانىن جازدى.

«بۇل جولى سايرام اۋدانى اۋماعىندا پوليتسياعا قاراستى بارلىق سالا بويىنشا جۇمىستاردى اتقاردىق. قوعامدىق قاۋىپسىزدىككە باسىمدىق بەرىلگەن ءىس-شارانىڭ العاشقى تاۋلىگىندە پوليتسيا باسقارماسىنا 52 جەرگىلىكتى تۇرعىندى جەتكىزدىك. پروفيلاكتيكالىق ەسەپتە تۇراتىن 64 ادامدى مەكەنجايى بويىنشا تەكسەردىك. ۇساق بۇزاقىلىق بابىمەن 22 دەرەك، قوعامدىق ورىندا ماس حالدە ءجۇرۋ بويىنشا 8 دەرەك، بەلگىلەنبەگەن ورىندا ساۋدا جاساۋمەن 3 دەرەك انىقتالىپ، قۇقىق بۇزۋشىلارعا اكىمشىلىك شارا كورىلدى. جىلدامدىقتى اسىرىپ، وزگە دە كولىك جۇرگىزۋشىلەرىنە قاۋىپ تۋدىرعان اۆتوكولىكتەر انىقتالىپ، ايىپتۇراققا قويىلدى»، - دەپ جازدى مۇرات قابدەنوۆ.

ايتا كەتەيىك، بۇدان بۇرىن اتىراۋدا 6 ايدا زاڭسىز اينالىمنان 8 كەلىدەن استام ەسىرتكى تاركىلەنگەنىن جازعان بولاتىنبىز.