سايلاۋشىلاردىڭ 3/4 بولىگى قازاقستاندا بەيبىت اتومدى پايدالانۋعا داۋىس بەردى - دەپۋتات
استانا. KAZINFORM - ءماجىلىس دەپۋتاتى نيكيتا شاتالوۆ ا ە س قۇرىلىسىنا كەلىسىم بەرۋ بويىنشا رەفەرەندۋمنىڭ ەكزيت- پۋل دەرەكتەرى جونىندە پىكىر ءبىلدىردى.
«ولاردىڭ بارلىعى شامالى ايىرماشىلىقپەن %70 اينالاسىن كورسەتىپ وتىر. ورتالىق سايلاۋ كوميسسياسىنىڭ قورىتىندى مالىمەتى دە وسى شامادا بولادى دەپ ويلايمىن - سايلاۋشىلاردىڭ تورتتەن ءۇش بولىگى قازاقستاندا بەيبىت اتومدى پايدالانۋعا مۇمكىندىك بەرۋ ءۇشىن ءوز داۋىستارىن بەردى. بۇل وتكەن ايدا حالىق شتابى وتكىزگەن ناۋقاننىڭ ناتيجەسى»، - دەپ جازدى ن. شاتالوۆ ءوزىنىڭ Telegram پاراقشاسىندا.
ونىڭ ايتۋىنشا، ناۋقان تابىسىنىڭ نەگىزگى فاكتورى - وسى ۋاقىتتا اەس ماسەلەسىندە ناقتى شەشىم تابا الماعان ازاماتتاردى - سايلاۋشىلاردىڭ جالپى سانىنىڭ %20 دان استامىن وزدەرىنە تارتا الۋىندا.
ونىڭ ىشىندە اتوم ەنەرگياسى تۋرالى ەموتسيونالدى ارگۋمەنتتەر مەن ميفتەردى باسشىلىققا العان ادامدار بولدى. ەنەرگيا كوزى تۋرالى دا، ەلدەگى ينفراقۇرىلىمنىڭ جاي-كۇيى تۋرالى دا قولجەتىمدى اقپاراتتىڭ تاپشىلىعى دا كورىندى.
«الدا ءالى كوپ نارسە بار: داۋىس بەرۋ ناتيجەسىن ساناۋ، ولاردى بەكىتۋ، سودان كەيىن ۇكىمەتتىڭ ۇلكەن قۇرىلىستىڭ بارلىق پارامەترلەرىن انىقتاۋ جونىندەگى جۇمىسى. ءقازىر رەفەرەندۋمنىڭ وتكەنى ماڭىزدى، ال قازاقستاندىقتار كونستيتۋتسيالىق قۇرىلىمنىڭ جەكەلەگەن ماسەلەلەرى ءۇشىن ەمەس، كەلەشەكتە ومىرىنە فيزيكالىق اسەر ەتەتىن ناقتى ماسەلەدە داۋىس بەرۋ مۇمكىندىگى مەن تاجىريبەسىنە يە بولدى. بۇل ءبىزدىڭ وڭىردەگى ەرەكشە جاعداي»، - دەيدى ءماجىلىس دەپۋتاتى.
ەسكە سالايىق، بۇگىن قازاقستاندىقتار اتوم ەلەكتر ستانتسياسىن سالۋ ماسەلەسى بويىنشا رەفەرەندۋمدا داۋىس بەردى.
6-قازاندا ەل بويىنشا 10249 رەفەرەندۋم ۋچاسكەسىندە داۋىس بەرۋ باستالدى.
1-شىلدەدەگى جاعداي بويىنشا ەل كولەمىندە 12176968 ادام رەفەرەندۋمدا داۋىس بەرۋگە حاقىلى.
